Tag: disable

روم: اطالوی پولیس نے برسوں معذور بن کر حکومت سے وظیفہ لینے والے جعل ساز کو گرفتار کرلیا، جعل ساز گزشتہ 12 برس میں 118.000 پونڈ کا فائدہ حاصل کر چکا ہے۔

تفصیلات کے مطابق اطالوی عدالت میں اپنی نوعیت کا انوکھا مقدمے پیش ہوا، پراسیکیورٹر نے بتایا کہ55 سالہ رابرٹو گولییلمی نے حکومت کو دھوکہ دیا، خود کو معذور ظاہر کرکے برسوں سے فوائدحاصل کر تا رہا، اس نے 2007 میں کا رحادثے کے بعد ویل چیئر پر آنے کا دعوی کیا تاہم حقیقت یہ تھی کہ کار حادثہ اور اس کے نتیجے میں ہونے والی معذوری جعلی تھی۔

غیر ملکی خبر رساں ادارے کا کہنا ہے کہ رابرٹو گولییلمی کو جعل سازی کا خیال اپنے معذور پڑوسی کو دیکھ کر آیا جسے حکومت ماہانہ وظفیہ دیتی تھی، بے روزگار رابرٹو نے متعلقہ ادارے میں خود کو معذور ظاہر کیا، اس نے جعلی میڈیکل رپورٹ بھی حاصل کر لی جس میں کہا گیا تھا کہ رابرٹو ٹریفک حادثے میں معذور ہوگیا۔

رابرٹو مخصوص ویل چیئر پر برسوں گھومتا رہا اس دوران اسکے پڑوسیوں اور عزیزوں کو بھی یہ شک نہ ہوسکا کہ وہ معذور نہیں، اس قدر فنکاری سے خود کو معاشرے میں پیش کرتا رہا جیسے وہ حقیقی طور پر معذور ہے، اس نے اپنے پیروں کے مسلز کمزور کرنے کے لیے انجکشن کا سہارا لیا اور ڈاکٹروں کو بھی بے وقوف بناتا رہا۔

گولییلمی رابرٹواس دوران فزیکل فٹنس کلب اور میڈیکل سینٹر کے ذمہ داروں کو بھی چکمہ دینے میں کامیاب رہا جہاں اسے فریوتھراپی کرائی جاتی تھی، بالاخر اسکی جعل سازی پولیس پر عیاں اس وقت عیاں ہو گئی جب رابرٹو سالانہ تعطیلات پر ٹوگو گیا جہاں سے واپسی پر وہ یہ بھول گیا کہ وہ معذوری کا ڈرامہ رچائے ہوئے ہے۔

رابرٹو چھٹیاں گزار کر فلورنس پہنچا تو بے خیالی میں چلتے ہوئے جہاز کی سیڑھیوں سے اتر گیا، فضائی کمپنی کے قانون کے مطابق معذور افراد کے لیے ویل چیئر جہاز کے دروازے تک پہنچائی جاتی ہے، اسے چلتے ہوئے دیکھ کر جہاز کا عملہ حیران رہا گیا کیونکہ انہیں ہدایات ملی تھی کہ رابرٹو معذور ہے اور وہ ایک قدم بھی چل نہیں سکتا۔

پولیس نے رابرٹو کو جعل سازی کے الزام میں گرفتار کر کے عدالت میں چالان پیش کردیا جہاں اسے حکومت کو دھوکا دینے کے الزام کا سامنا ہے، مزید تفتیش کی جا رہی ہے۔