پیرس : فرانس میں رقم منتقل کرنے والی بکتر بند گاڑی کا ڈرائیور لاکھوں یورو اور گاڑی کے ہمراہ فرار ہوگیا، پولیس نے ملزم کی تلاش شروع کردی ہے۔
تفصیلات کے مطابق فرانس کے دارالحکومت پیرس شمال مشرق میں واقع ٹاؤن بوبگنی سے بینک اور منی ایکسینج کمپنیوں میں رقم پہنچانے والی کمپنی کا ڈرائیور بکتربند گاڑی اور بھاری رقم کے ہمراہ لاپتہ ہوگیا۔
غیر ملکی خبر رساں ادارے کا کہنا تھا کہ 28 سالہ وین ڈرائیور نے دو روز قبل ویسٹر یونین کے سامنے 6 بجے کے قریب گاڑی روکی اور پھر کچھ دیر بعد اپنے دو ساتھیوں کے ہمراہ وہاں سے چلا گیا۔
ذرائع کا کہنا تھا کہ مفرور ڈرائیور کے ساتھی کچھ وقت بعد واپس آگئے لیکن ڈرائیور کا تاحال کچھ پتہ نہیں چل سکا ہے۔
غیر ملکی میڈیا کا کہنا ہے کہ بکتر بندگاڑی کچھ فاصلے پر ایک گلی سے برآمد ہوگئی تاہم ڈرائیور اور گاڑی میں موجود پیسوں کے تھیلے غائب ہیں جن میں 10 لاکھ یورو کی رقم موجود تھی، فرانس کے اینٹی گینگ اسکارڈ کی جانب سے ملزم کی تلاش شروع ہوگئی ہے ۔
رقم کی منتقلی پر مامور کمپنی لومیس کی جانب سے تاحال واقعے کسی قسم کا کوئی ردعمل سامنے نہیں آیا ہے۔
غیر خبر رساں ادارے کا کہنا تھا کہ ڈکیتی کی ایسی ہی واردات سنہ 2009 میں پیش آئی تھی جب بکتر بندگاڑی کا ڈرائیور 11 اعشاریہ 5 ملین یورو کی رقم لے کر فرار ہوگیا تھا تاہم پولیس نے ملزم کو کچھ ہفتے بعد ہی گرفتار کرلیا تھا۔
