ریاض: سعودی مجلس شوریٰ نے ایئر ٹکٹس، فیول اور کارگو کے نرخوں کے حوالے سے مناسب اقدامات کرنے کی ہدایت کی ہے، معذوروں کو 50 فیصد رعایتی ٹکٹ کے اجرا کو یقینی بنانے کی بھی ہدایت کی گئی ہے۔
اردو نیوز کے مطابق سعودی مجلس شوریٰ نے محکمہ شہری ہوا بازی سے کہا ہے کہ بین الاقوامی اور علاقائی ایئر پورٹس کے ساتھ مسابقت کے پیش نظر ٹکٹوں، فیول اور کارگو کے نرخوں کے حوالے سے مناسب اقدامات کیے جائیں۔
مجلس شوریٰ نے منگل کو صدر شیخ ڈاکٹر عبداللہ آل الشیخ کی زیر صدارت اجلاس کے دوران اس حوالے سے ایک قرارداد منظور کی ہے۔
شوریٰ نے قرارداد کی منظوری سے قبل ٹرانسپورٹ، کمیونیکیشن اینڈ انفارمیشن ٹیکنالوجی کمیٹی کا مؤقف بھی سنا ہے۔
شوریٰ نے محکمہ شہری ہوا بازی سے کہا کہ وہ فضائی کمپنیوں کو پروازوں سے متعلق معاہدوں پر تیزی سے عملدر آمد کا پابند بنائے، ان فضائی کمپنیوں کو اس کا پابند کیا جائے جو مسافر پروازیں چلانے کے وعدے کر چکی ہیں۔
شوریٰ نے محکمہ شہری ہوا بازی سے مطالبہ کیا کہ معذوروں کو 50 فیصد رعایتی ٹکٹ کے اجرا کو یقینی بنایا جائے اور انہیں ہر درجے کی بکنگ پر رعایت دی جائے۔
شوریٰ نے محکمہ شہری ہوا بازی کو فضائی کمپنیوں کے خلاف مسافروں کی شکایات دور کرنے کی بھی ہدایت کی ہے۔
