کراچی : ماڈلنگ ریمپ پر راج کرنے والی ڈالر گرل آج 23 برس کی ہوگئیں۔
تفصیلات کے مطابق ماڈل گرل ایان علی 30 جولائی 1993 کو دبئی میں پیدا ہوئیں ، انہوں نے ماڈلنگ کا آغاز2010 میں کیا جس وقت اُن کی عمر صرف 16 سال تھی۔
ریمپ پر تیزی سے ابھرتی ماڈل لکس اسٹائل ایوارڈ سمیت ایمرجنگ ایوارڈ اپنے نام کرنے میں کامیاب ہوئیں، انہوں نے 2010 میں سال کی خوبصورت ماڈل کا پہلا ایوارڈ حاصل کیا بعدا زاں ایان علی بحیثیت برانڈ ایمبسٹر کے طور پر نامزد ہوئیں۔اسی سال ایان علی کو لکس اسٹائل ایوارڈ میں ایمرجنگ ایوارڈ کے لیے نامزد کیا گیا پھر وہ 2011 میں بہترین خاتون ماڈل کا ایوارڈ جیتنے میں کامیاب ہوئیں۔
ماڈل گرل کے ترقی کے سفر کو اُس وقت نظر لگی کہ جب وہ بے نظیر ائیرپورٹ پورٹ سے بیرون ملک جاتے ہوئے کسٹم اہلکاروں کے ہاتھوں 5 لاکھ ڈالرز بیرونِ ملک منتقل کرتی ہوئی پکڑی گئیں، کسٹم حکام کے ہاتھوں پکڑے جانے کے بعد ماڈل گرل کو حوالات کی ہو ا کھانی پڑی اور انہیں عدالت میں پیش کر کے چودہ روزہ جسمانی ریمانڈ طلب کیا گیا، تاہم آج تک عدالت میں اُن کا جرم ثابت نہیں ہوسکا۔
منی لانڈرنگ کیس میں گرفتاری کے بعد ایان علی ڈالر گرل کے نام سے مشہور ہوئیں اور ہر عام و خاص میں اب اُن کی پہچان اسی نام سے ہونے لگی۔ ضمانت ملک کے بعد ایان علی گزشتہ کئی ماہ سے بیرون ملک جانے کے لیے سرتوڑ کوششوں میں مصروف ہیں تاہم وہ بیرون ملک جانے میں ناکام رہی ہیں۔
سندھ ہائی کورٹ کی جانب سے ایان علی کا نام نکالنے کے احکامات جاری کیے جاچکے ہیں تاہم اب مقتول کسٹم اہلکار کی اہلیہ نے راولپنڈی کے سول جج کی عدالت میں اپنے شوہر کے قتل کی وجہ ڈالر گرل کو قرار دیتے ہوئے درخواست دائر کروادی ہے، جس کے بعد اُن کا نام دوبارہ ای سی ایل میں شامل کرلیا گیا ہے۔
کرنسی اسمگلنگ کیس کی پیروی سابق اٹارنی جنرل و گورنر پنجاب لطیف کھوسہ صاحب کررہے ہیں، ایان علی کے وکیل کی جانب سے مقتول انسپیکٹر کی اہلیہ کی جانب سے دائر کیس پر ضمانت کے لیے عدالت سے رجوع کیا گیا تھا جس پر عدالت نے ماڈل گرل کے وارنٹ گرفتاری 21 ستمبر تک ملتوی کردیے ہیں۔
