کراچی : ملک بھر میں ڈالر کا بھاؤ گرنے کا سلسلہ آج بھی جاری رہا، انٹربینک میں ڈالر کی قیمت میں مزید کمی ریکارڈ کی گئی۔
تفصیلات کے مطابق حکومتی اقدامات کے پیش ںطر گزشتہ کئی روز سے ملکی کرنسی کی قدر میں مسلسل اضافہ ہو رہا ہے جبکہ امریکی ڈالر کی قیمت میں مسلسل کمی کا رجحان جاری ہے۔
سماجی رابطے کی ویب سائٹ ایکس پر جاری اسٹیٹ بینک آف پاکستان کے اعداد و شمار کے مطابق انٹر بینک میں آج کاروبار کے اختتام پر ڈالر کا بھاؤ 280 روپے 51پیسے پر بند ہوا۔
ایس بی پی کے مطابق کاروباری ہفتے کے دوسرے روز امریکی کرنسی کی قیمت میں 1 روپیہ 14پیسے کی کمی ریکارڈ کی گئی۔
Interbank closing #ExchangeRate for today https://t.co/NDEA8exty1#SBPExchangeRate pic.twitter.com/3SZJwpG3Bp
— SBP (@StateBank_Pak) October 10, 2023
ذرائع کے مطابق غیرقانونی کرنسی کی تجارت اور اسمگلنگ کے خلاف کریک ڈاؤن کے نتیجے میں اوپن مارکیٹ میں 900ملین ڈالر سرپلس ہوئے اور بینکوں میں جمع کرائے گئے۔
خیال رہے کہ گزشتہ کاروباری روز انٹربینک میں ڈالر کی قیمت 281 روپے 65پیسے ریکارڈ کی گئی تھی۔ حالیہ کئی روز کے دوران پاکستانی روپے کی قدر میں نمایاں اضافہ ریکارڈ کیا گیا ہے۔
دوسری جانب پاکستان اسٹاک ایکسچینج میں آج بھی تیزی کا رجحان ہے۔ پاکستان اسٹاک ایکسچینج میں 70 دن کے بعد 48 ہزار پوائنٹس کی حد بحال ہوگئی۔
پاکستان اسٹاک ایکسچینج میں مسلسل ساتویں سیشن میں تیزی کا رجحان ہے۔ہنڈریڈ انڈیکس کی 307پوائنٹس کے اضافے سے 48030 پوائنٹس پر ٹریڈ کررہا ہے۔