اسلام آباد : برطانوی وزیر خارجہ ڈومینک راب کی وزارت خارجہ آمد پر وزیر خارجہ مخدوم شاہ محمودقریشی نے استقبال کیا ،دونوں ۔وزرائے خارجہ کے مابین اور وفودکی سطح پر مذاکرات ہوں گے۔
تفصیلات کے مطابق برطانوی وزیر خارجہ ڈومینک راب وفدکےہمراہ وزارت خارجہ پہنچے ، جہاں وزیر خارجہ مخدوم شاہ محمودقریشی نےبرطانوی ہم منصب کاخیرمقدم کیا ، اس موقع پر برطانوی وزیرخارجہ نےوزارت خارجہ کے سبزہ زارمیں یاد گاری پودا بھی لگایا۔
دونوں وزرائے خارجہ کے مابین اور وفودکی سطح پرمذاکرات ہوں گے ، جس میں دو طرفہ تعلقات،باہمی دلچسپی کےشعبوں میں دو طرفہ تعاون پرگفتگوہوگی اور افغانستان کی صورتحال پرتفصیلی تبادلہ خیال کیا جائے گا۔
دورے کے دوران برطانوی وزیرخارجہ پاکستان کی اعلیٰ قیادت سےبھی ملاقاتیں کریں گے۔
یاد رہے گذشتہ رات برطانوی وزیرخارجہ ڈومینک راب افغانستان سے غیرملکی انخلا مکمل ہونے کے بعد اہم ترین دورے پر پاکستان پہنچے تھے ، برطانوی وزیرخارجہ ڈومینک راب دورے میں طورخم بارڈر کا دورہ کریں گے، اُن کے ساتھ دیگر برطانوی حکام بھی موجود ہوں گے۔
ذرائع کے مطابق برطانیہ پاکستان کے ساتھ مل کر افغان مہاجرین کی آبادکاری اور مدد کے لیے کام کرنے کا خواہش مند ہے، وزیرخارجہ اپنے دورے میں اس مسئلے کو زیادہ اہمیت دیں گے۔
وزارتِ خارجہ کے ذرائع کا کہنا تھا کہ افغانستان کی صورت حال کے بعد بہت سے ممالک کے وزرائے خارجہ اور اعلیٰ حکام کا دورۂ پاکستان متوقع ہے۔
