واشنگٹن: امریکی محکمہ خارجہ کی ترجمان ٹیمی بروس نے پریس بریفنگ میں کہا ہے کہ اگر امریکی صدر ڈونلڈ ٹرمپ بھارت کے زیر قبضہ کشمیر کے معاملے پر ثالثی کی کوشش کرتے ہیں تو یہ کوئی تعجب کی بات نہیں ہوگی۔
صدر ٹرمپ کی کشمیر پر ثالثی کی پیش کش کے بارے میں اے آر وائی کے بیورو چیف کی ایک سوال کے جواب میں ٹیمی بروس نے کہا کہ ظاہر ہے کہ میں صدر کے ذہن یا منصوبے پر بات نہیں کر سکتی، لیکن میں جو جانتی ہوں وہ یہ ہے کہ مجھے لگتا ہے کہ ہم سب اس بات کو تسلیم کرتے ہیں کہ صدر ٹرمپ جو بھی قدم اٹھاتے ہیں، اس کا مقصد ملکوں کے درمیان نسلی اختلافات کو حل کرنا اور نسلی جنگیں ختم کرنا ہے۔ لہٰذا، یہ کسی کے لیے حیران کن نہیں ہونا چاہیے کہ اگر صدر ٹرمپ اس تنازعہ کو حل کر دیں۔
ٹیمی بروس نے کہا کہ صدر ٹرمپ وہ واحد شخص ہے جو کچھ ان لوگوں کو بات چیت کرنے کی میز پر لانے میں کامیاب رہے ہیں جو کسی نے کبھی سوچا بھی نہیں تھا۔ انھوں نے یہ بھی بتایا کہ امریکا نے گزشتہ ماہ ہندوستان اور پاکستان کے درمیان 4 روزہ تنازعہ میں جنگ بندی کے لیے مداخلت کی تھی۔
ٹرمپ کیخلاف احتجاج میں شدت، لاس اینجلس میں کرفیو نافذ
ٹیمی بروس نے مزید کہا کہ یہ ایک پرجوش وقت ہے کہ اگر ہم اس مخصوص تنازعہ [ہندوستان اور پاکستان کے درمیان] میں کسی نقطہ پر پہنچ سکتے ہیں، تو خدا کا شکر ہے، لیکن اس کے ساتھ ساتھ سیکریٹری آف اسٹیٹ مارکو روبیو، صدر ٹرمپ اور نائب صدر جے ڈی وینس کا بھی شکریہ۔
جب پاکستانی پارلیمانی وفد کے ڈی سی کے دورے کے بارے میں پوچھا گیا تو ٹیمی بروس نے کہا کہ انڈر سیکریٹری برائے سیاسی امور ایلیسن ہوکر نے وفد سے ملاقات کی اور انسداد دہشت گردی تعاون سمیت اہم دو طرفہ امور پر تبادلہ خیال کیا۔
