ARYNews.tv | Urdu – Har Lamha Bakhabar

Tag: donates

  • امارات کا دہشت گردی سے متاثرہ مصری اسپتال کیلئے لاکھوں‌ ڈالر امداد کا اعلان

    امارات کا دہشت گردی سے متاثرہ مصری اسپتال کیلئے لاکھوں‌ ڈالر امداد کا اعلان

    ابوظبی : اماراتی حکومت نے دہشت گردانہ حملے میں متاثر ہونے والے مصر کے کینسر اسپتال کی دوبارہ تعمیر کےلیے لاکھوں ڈالر امدادکا اعلان کردیا۔

    تفصیلات کے مطابق متحدہ عرب امارات کی فوج کے ڈپٹی سپریم کمانڈر اور ابوظبی کے ولی عہد شیخ محمد بن زید النہیان نے رواں ماہ دھماکے کے باعث متاثر ہونے والے مصر ی دارالحکومت قاہرہ کے کینسر اسپتال کی ایک مرتبہ پھر تعمیر کےلیے 1 کروڑ 19 لاکھ درہم کی امداد دےکرانسانیت کی مثال قائم کردی۔

    اماراتی خبر رساں ادارے کا کہنا تھا کہ ابوظبی کے ولی عہد کی جانب سے دیا جانے والا چندہ اماراتی اورمصری عوام کے برادرانہ تعلقات میں اضافے کےلیے حوصلہ افزائی کا باعث ہے۔

    مصر میں تعینات اماراتی سفیر جمہ مبارک الجونیبی کا کہنا ہے کہ شیخ محمد مصر کی ترقی، سیکیورٹی اور استحکام کی حمایت کرتے ہیں، متحدہ عرب امارات دہشت گردی کے خلاف جنگ میں مصر کے ساتھ ہے۔

    یاد رہے کہ کچھ روز قبل مصری دارالحکومت قاہرہ کے کینسر اسپتال کے باہر دھماکے کے نتیجے میں 19 افراد جاں بحق اور 30 شدید زخمی ہوگئے تھے۔

    غیرملکی خبررساں ادارے کے مطابق مصری دارالحکومت قاہرہ کے کینسر اسپتال کے باہر غلط سمت سے آنے والی ایک کار تین گاڑیوں سے ٹکرا گئی جس کے نتیجے میں دھماکا ہوا اور 19 افراد زندگی بازی کی ہار گئےتھے۔

  • میئرکراچی اوران کی اہلیہ کا ڈیمزکی تعمیر کے لئے ایک لاکھ کا عطیہ

    میئرکراچی اوران کی اہلیہ کا ڈیمزکی تعمیر کے لئے ایک لاکھ کا عطیہ

    کراچی : میئر کراچی وسیم اختر اور ان کی اہلیہ نے دیامر بھاشا اور مہمند ڈیم کیلئے ایک لاکھ روپے کا عطیہ جمع کرادیا، وسیم اختر کا کہنا ہے کہ تمام پاکستانیوں کو چاہئے کہ وہ ڈیمز کی تعمیر میں اپنا حصہ ڈالیں۔

    تفصیلات کے مطابق دیامر، بھاشا اور مہمند ڈیم کی تعمیراتی فنڈز میں میئر کراچی وسیم اختر اور ان کی اہلیہ نائلہ واجد خان کی جانب سے ایک لاکھ روپے عطیہ کردیا۔

    وسیم اختر کا کہنا تھا کہ فنڈز میں عطیہ اپنے اکاونٹ سے دیا ہے، تمام پاکستانیوں کو چاہیئے کہ وہ ڈیمز کی تعمیر میں اپنا حصہ ڈالیں، ڈیمز کی تعمیر ملک کیلئے ناگزیر ہے۔

    انھوں نے کہا کہ اگر ملک بھر میں ڈیمز تعمیر نہ ہوئے تو ہمارا ملک بھی ساوتھ افریقہ کی طرح ایک دن زیرو ڈے منائے گا، سپریم کورٹ کی جانب سے ڈیمز کی تعمیر میں پیش رفت خوش آئند ہے۔

    یاد رہے گذشتہ روز مسلح افواج نے ڈیموں کی تعمیر کے کار خیر میں بڑھ چڑھ کر حصہ لینے کا اعلان کیا تھا اور کہا تھا کہ تینوں مسلح افواج کے افسران 2دن کی تنخواہ فنڈ میں جمع کرائیں گے۔

    اس سے قبل چیف جسٹس میاں ثاقب نثار نے ڈیمز کی تعمیر کے لئے دس لاکھ روپے کا عطیہ جمع کرایا تھا جبکہ میئر کراچی اور پیر پگارا نے ہر قسم کے تعاون کی پیشکش کی تھی اور میئر کراچی بنے اپنی اور کے ایم سی افسران کی طرف سے ایک ایک لاکھ روپے فنڈ عطیہ کرنے کا اعلان کیا تھا۔

    یاد رہے گزشتہ دنوں کالا باغ ڈیم کی تعمیر سے متعلق ہونے والی سماعت چیف جسٹس آف پاکستان نے دیامیر بھاشا اور مہمند کو فوری تعمیر کرنے کے احکامات جاری کرتے ہوئے فنڈز قائم کرنے کا اعلان کیا تھا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • چیف جسٹس نے ڈیمز کی تعمیر کیلئے 10لاکھ روپے کا عطیہ جمع کرادیا

    چیف جسٹس نے ڈیمز کی تعمیر کیلئے 10لاکھ روپے کا عطیہ جمع کرادیا

    اسلام آباد : ملک میں پانی کا بحران سر پر کھڑا ہے، چیف جسٹس میاں ثاقب نثار نے ڈیمز کی تعمیر کے لئے دس لاکھ روپے کا عطیہ جمع کرادیا جبکہ میئر کراچی اور پیر پگارا نے ہر قسم کے تعاون کی پیشکش کر دی ہے۔

    تفصیلات کے مطابق پانی بحران ملک کی طرف بڑھ رہا ہے، اس بحران پر قابو پانے کا واحد حل ڈیمز کی تعمیر ہے، چیف جسٹس میاں ثاقب نثار نے ڈیموں کی تعمیر کا نوٹس لیتے ہوئے نہ صرف مہم شروع کی بلکہ ڈیمز فنڈ کے نام پر سپریم کورٹ کے رجسٹرار کے نام سے اکاؤنٹ کھولا اور سب سے پہلے 10 لاکھ روپے عطیہ خود جمع کرایا۔

    چیف جسٹس کی تحریک نے اثر دکھایا، فنکشنل لیگ کے سربراہ پیر پگارا نے ڈیمز کی حمایت کرتے ہوئے جسٹس ثاقب نثار کے نام خط لکھا اور کہا کہ بھاشا ڈیم کی تعمیر کیلئے ہرقسم کے تعاون کے لیے تیار ہیں۔

    پیر پگارا کے بعد میئر کراچی بھی میدان میں آگئے، وسیم اخترنے اپنی اور کے ایم سی افسران کی طرف سے ایک ایک لاکھ روپے فنڈ کا اعلان کیا۔

    مزید پڑھیں : سپریم کورٹ: بھاشا اور مہمند ڈیم کی فوری تعمیر اور کالا باغ کے لیے کمیٹی قائم کرنے کا حکم

    فنانس ڈویژن نے ایک قدم مزید آگے بڑھاتے ہوئے دیامربھاشا ڈیم فنڈز قائم کرنے کیلئے مختلف اداروں کو خط لکھ دیا،خط میں آڈیٹر جنرل، کنٹرولرجنرل اکاؤنٹس، اکاؤنٹنٹ جنرل پاکستان اور دیگر اداروں کے حکام سے لوگوں کی رقوم اسٹیٹ بینک اورنیشنل بینک کی برانچزمیں جمع کرنے کا انتظام کرنے کا کہا۔

    یاد رہے دو روز قبل سپریم کورٹ آف پاکستان نے ڈیموں کی تعمیر سے متعلق مختصر لیکن تاریخی فیصلہ سناتے ہوئے حکم دیا تھا کہ دیامر بھاشا اور مہمند ڈیم فوری طور پر تعمیر کیے جائیں۔

    سپریم کورٹ کی جانب سے ملک میں ڈیموں کی تعمیر کے لیے جاری کیے گئے حکم پر عمل در آمد شروع ہوگیا ہے، اس سلسلے میں ایک کمیٹی بھی تشکیل دے دی گئی، کمیٹی اس امر کی نگرانی کرے گی کہ عدالتی حکم پر عمل در آمد کیا جا رہا ہے یا نہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • لازوال محبت، سالگرہ پر شوہر نے بیوی کو گردہ عطیہ کردیا

    لازوال محبت، سالگرہ پر شوہر نے بیوی کو گردہ عطیہ کردیا

    فلوریڈا: امریکی شہری نے شادی کی 23ویں سالگرہ پر اپنی اہلیہ کی جان بچانے کے لیے انہیں گردہ بطور تحفہ عطیہ کر کے محبت کی نئی مثال قائم کردی۔

    تفصیلات کے مطابق میاں بیوی کا رشتہ محبتوں سے بھرا ہوتا ہے جس کی لازوال کہانیاں آئے روز سننے اور دیکھنے کو ملتی ہیں، کسی بھی معاشرے میں شوہر اور اہلیہ کو ایک قلب دو جان یا پھر ایک گاڑی کے دو پہیوں کی تشبیہ دی جاتی ہے جس کا مقصد یہ بتانا ہوتا ہے کہ دونوں کا ساتھ ایک دوسرے کے لیے کس قدر ضروری ہے۔

    امریکی میڈیا کے مطابق ریاست فلوریڈا کی رہائشی خاتون مونیکا کے دونوں گردے ناکارہ ہوگئے تھے جس کے باعث وہ کافی عرصے سے ڈائیلاسز پر تھیں اور ڈاکٹرز نے انہیں صحت مند زندگی گزارنے کے لیے گردہ لگوانے کا مشورہ دیا تھا۔

    ڈاکٹرز کی تجویز کو مدنظر رکھے ہوئے امریکی جوڑے نے کئی دن تک کسی ایسے شخص کو تلاش کرنے کی کوشش کی جو اپنا ایک گردہ عطیہ کردے تاکہ خاتون کی زندگی اچھے سے گزر سکے تاہم انہیں اس میں ناکامی کا سامنا رہا۔

    مزید پڑھیں: کینسر میں مبتلا لڑکی کی اسپتال میں شادی اور انتقال، عزم اور محبت کی مثال

    مونیکا کے شوہر کیسر کلے نے ٹیسٹ کروایا اور رپورٹ سامنے آنے کے بعد فیصلہ کیا کہ انہوں نے فیصلہ کیا کہ وہ اپنی اہلیہ مونیکا کو شادی کی 23ویں سالگرہ پر انوکھا تحفہ دیں گے جس کا تذکرہ انہوں نے اپنے اہل خانہ تک سے نہیں کیا اور ڈاکٹرز سے مشورہ کر کے آپریشن کی تاریخ فائنل کی۔

    ڈاکٹرز نے جب مریضہ کو گردے کی پیوندکاری کی تاریخ کے حوالے سے آگاہ کیا تو پہلے وہ کافی پریشان ہوئیں اور انہوں نے اسپتال عملے کے متعدد بار اُس شخص کا نام و تفصیل پوچھنےکی کوشش کی جو انہیں گردہ عطیہ کررہا ہے تاہم ڈاکٹرز نے وعدے کے مطابق نام ظاہر نہیں کیا۔

    ایک ہفتے قبل ڈاکٹرز نے کامیاب آپریشن کے بعد کیسرے کا گردہ مونیکا کے لگا دیا، امریکی جوڑے کو آپریشن کے بعد انتہائی نگہداشت وارڈ میں رکھا گیا بعد ازاں دونوں ہوش میں آئے تو اہلیہ کو علم ہوا کہ جو گردہ اُن کے لگایا گیا ہے وہ کسی اور کا نہیں بلکہ اپنے ہی شوہر کا ہے۔

    مونیکا نے گردہ عطیہ کرنے پر شوہر کا شکریہ ادار کرتے ہوئے کہا کہ مجھے ایسا لگتا ہے کہ میں دنیا کی سب سے خوش نصیب بیوی ہوں کیونکہ خدا نے اتنے اچھے شخص کو میرا شوہر بنایا جو میری زندگی کے لیے کچھ بھی کرسکتا ہے۔

    یہ بھی پڑھیں: بچوں کی آپسی محبت نے دل جیت لیے، ویڈیو وائرل

    چار روز قبل امریکی جوڑے نے اسپتال سے چھٹی کے بعد عملے کے ساتھ شادی کی 23ویں سالگرہ منائی اور کیک بھی کاٹا، ڈاکٹرز اور نرسوں کی جانب سے دونوں کو مبارک بادیں پیش کی گئیں جبکہ اس موقع پر تقریب میں شریک کئی لوگوں کی آنکھیں بھی نم ہوگئیں تھیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • امریکی خاتون اول میلانیا ٹرمپ نے اپنا مشہور لباس عطیہ کردیا

    امریکی خاتون اول میلانیا ٹرمپ نے اپنا مشہور لباس عطیہ کردیا

    واشنگٹن : امریکی خاتون اول میلانیا نے ٹرمپ کے صدر منتخب ہونے کے بعد انوگریشن تقریب کا لباس عطیہ کردیا، نیلامی سے حاصل رقم چیریٹی میں دی جائے گی۔

    امریکی صدر ڈونلڈ ٹرمپ کی اہلیہ میلانیا ٹرمپ کی خوش لباسی کے چرچے پورے امریکہ میں ہیں ، میلانیا ٹرمپ نے اپنے شوہر ڈونلڈ ٹرمپ کے صدر منتخب ہونے کے بعد افتتاحی تقریب پہنا گیا لباس اب تاریخ کا حصہ بن گیا۔

    میلانیا نے اپنا گاؤن امریکی تاریخ پر مبنی سمتھ سونین نیشنل میوزیم کو عطیہ کردیا،جسے امریکی پرچم کے ساتھ میوزیم میں سجا دیا گیا ہے۔

    امریکی خواتین اول کے کریم کلر کے گاؤن سمیت سابق امریکی خاتون اول کے چھبیس گاؤنز کی نمائش کا انعقاد کیا جائے گا، نیلامی سے حاصل رقم چیریٹی میں دی جائے گی، یہ گاؤن فرانسیسی نژاد امریکی ڈیزائنر ہروے پیئر نے تیار کیا تھا۔

    اس موقع پر میلانیا نے نہ صرف امریکی تاریخ کو ایک جگہ سمیٹ کر رکھنے پر میوزیم کی انتظامیہ کا شکریہ ادا کیا بلکہ اپنے شاندار گاؤن کے ڈیزائنر پر بھی بات کی۔

    خیال رہے کہ میلانیا ٹرمپ نے اپنے شوہر ڈونلڈ ٹرمپ کے صدر منتخب ہونے کے بعد افتتاحی تقریب میں اس لباس میں ڈانس کیا تھا جبکہ صدر ٹرمپ نے نے بھی اس لباس پر ڈیزائنر کی تعریف کی تھی۔

    اس موقع پر میلانیا ٹرمپ کا کہنا تھا کہ میرے لیے اعزاز کی بات ہے کہ میں نے اپنا لباس امریکی تاریخ پر مبنی سمتھ سونین نیشنل میوزیم کو عطیہ کیا ، یہ روایت افتتاحی تقریبات یاد دلانے میں مدد کرے گی۔

    انھوں نے کہا کہ جیسا کہ سب زیادہ جانتے ہیں، صدر بننے سے پہلے میرے شوہر کبھی سیاست میں نہیں رہے اور آپ تصور کر سکتے ہیں کہ الیکشن جیتنے کے بعد ہم سب کس حد تک مصروف ہوگئے ہوں گے، افتتاحی تقریب میں مجھے کیا پہننا چاہیے یہ سوچ میرے ذہن میں سب سے آخر میں آئی، اور ڈیزائنر کو اس گاؤن کو تیار کرنے کے لیے صرف دو ہفتے ملے۔

    یاد رہے کہ امریکی صدر ڈونلڈ ٹرمپ کی حلف برادری کی تقریب میں خاتون اول کے اسٹائل کے چرچے رہے، آئس بلو لباس میچنگ گلوز،میچنگ شوز،سلیقے سے باندھے بال،ہمیشہ کی طرح اس خاص تقریب میں بھی میلانیا کا فیشن اسٹائل لوگوں کی توجہ کا مرکز بن گیا تھا۔

     اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • پاکستانی بچی کے علاج کیلئے بھارتیوں نے ساڑھے چارلاکھ روپے عطیہ کردیئے

    پاکستانی بچی کے علاج کیلئے بھارتیوں نے ساڑھے چارلاکھ روپے عطیہ کردیئے

    ممبئی  / کراچی : بھارتی شہریوں نے پاکستانی لڑکی کے علاج کیلئے لاکھوں روپے عطیہ کردیئے۔

    تفصیلات کے مطابق کراچی کی رہائشی پندرہ سالہ صباء جو ولسن ڈیزیز نامی بیماری میں مبتلا ہے، صبا اس وقت ممبئی کے جسلوک اسپتال میں زیر علاج ہے، جہاں اس کا کامیابی سے علاج جاری ہے۔

    صبا کی والدہ نازیہ طارق نے بتایا کہ میں صرف اسّی ہزار روپے لے کر بھارت آئی تھی،اور میری بیٹی کا علاج کرانا میرے بس سے باہر ہورہا تھا۔

    انہوں نے بتایا کہ  ممبئی کے ایک اخبار نے اس حوالے سے ایک رپورٹ شائع کی تھی جس کے بعد ممبئی کے شہریوں نے خود اسپتال آکر انسانی ہمدردی کے ناتے صبا کے علاج کیلئے خطیر رقوم چندے میں دیں۔ اور اب تک تقریباً ساڑھے چار لاکھ روپے سے زائد رقم جمع ہوچکی ہے۔

    جسلوک اسپتال کے ایک ڈاکٹر ابھا نگرال جو امراض جگر ماہر بھی ہیں نے بتایا کہ جیسے ہی اخبار میں رپورٹ شائع ہوئی تو اسی دن سے لوگوں نے جوق در جوق اسپتال آکر صبا سے اظہاری ہمدردی کیا، بھرپور مالی اعانت کی۔

    انہوں نے بتایا کہ مریضہ کا علاج پہلے کی نسبت بہتر طریقے سے ہو رہا ہے، صبا کی والدہ نازیہ طارق چالیس دن بعد اپنی بچی کو وہیل چیئر پر بٹھا کر دعا مانگنے درگاہ حاجی علی بھی لے گئیں اور مزار پر دعا مانگتے ہوئے صبا ء بہت خوش دکھائی دے رہی تھی۔

    ان کا کہنا تھا کہ بچی کا علاج کافی لمبا ہے، تاہم اس میں اب کچھ بہتری آئی ہے۔ صبا کی والدہ نازیہ طارق نے بتایا کہ کراچی کے ڈاکٹرز نے مرض کی  تشخیص غلط کی تھی اور غلط علاج بھی شروع کردیا تھا۔

    انہوں نے کہا کہ چندہ دینے والے لوگ میرے لئے فرشتہ سے کم نہیں، ہم بہت پریشان تھے اب بہت خوشی محسوس ہو رہی ہے، سماجی کارکن شبیہہ والیا نے بتایا کہ معروف فلمی اداکارہ جوہی چاؤلہ نے صبا کے علاج کیلئے پچیس ہزار روپے عطیہ کئے۔

      سب سے پہلے ایک کاروباری شخصیت کرسی دوباش نےصبا کے علاج کیلئے اسپتال کو فوری طور پر ایک لاکھ روپے عطیہ کئے،کرسی دوباش اپنے کاروبار کے سلسلے میں اکثر پاکستان آتے رہتے ہیں، کرسی دوباش کا کہناہے کہ میں نے وہ پیار اور اپنائیت  لوٹانے کی کوشش کی ہے جو مجھے پاکستان میں ملتا ہے۔