اسلام آباد: پاکستان کو بین الاقوامی ڈونرز کانفرنس میں ستر کڑوڑ ڈالرز امداد کی یقین دہانی کرادی گئی ہے، تفصیلات کےمطابق اسلام آباد میں ہونے والی ایک روزہ بین الاقوامی ڈونرزکانفرنس میں برطانوی مالیاتی ادارے ڈیفڈ، عالمی بینک، ایشیائی ترقیاتی بینک، یورپی یونین، اسلامک ڈولپمنٹ بینک، جاپان، اٹلی اور دیگر ممالک نے آپریشن ضربِ عضب، شمالی وزیرستان کے متاثرین کی بحالی اور سیلاب زدگان کے نقصانات کا ازالہ کرنے کے لیے ستر کڑوڑ ڈالرز کی امداد دینے کی حامی بھرلی ہے۔
ابتدائی طور پر آپریشن ضرب عضب اور سیلاب سے ہونے والے نقصانات کا ابتدائی تخمینہ ایک ارب چالیس کڑور ڈالرز لگایا گیا تھا۔ وزارت خزانہ کے مطابق نقصانات کا مکمل تخمینہ لگانے کے بعد مزید بین الاقوامی امداد ملنے کا امکان ہے۔
کانفرنس کے اختتام پر وزیرخزانہ اسحاق ڈار نے کانفرنس میں شرکت کرنے والے بین الاقوامی مالیاتی اداروں اور ممالک کے نمائندوں کا شکریہ ادا کیا اور انہیں یقین دلایا کہ اُن کی جانب سے ملنے والی رقم کو شفاف طریقے سے خرچ کیا جائے گا۔
