Tag: dossier

اسلام آباد: پاکستان نے مقبوضہ کشمیر کی صورتحال پر 131 صفحات کا ڈوزیئر جاری کردیا، ڈوزیئر میں کیمیکل ہتھیار کے استعمال اور اجتماعی قبروں کے ثبوت موجود ہیں۔

تفصیلات کے مطابق پاکستان نے مقبوضہ کشمیر کی صورتحال پر 131 صفحات کا ڈوزیئر جاری کردیا۔ ڈوزیئر میں کیمیکل ہتھیار کے استعمال، اجتماعی قبروں کے ثبوت، خواتین اور بچوں پر تشدد، قابض فوج کے تشدد اور جعلی مقابلوں کے شواہد شامل کیے گئے ہیں۔

ڈوزیئر میں بھارتی اور عالمی اداروں کے حوالے بھی شامل ہیں۔ اس حوالے سے وزیر خارجہ شاہ محمود قریشی کا کہنا ہے کہ بھارتی فورسز کشمیر پر قابض اور مسلط ہے، سید علی گیلانی کی وفات پر بھارت کی سوچ سب کے سامنے تھی۔

وزیر خارجہ کا کہنا تھا ک سید علی گیلانی کے جسد خاکی کو بھارتی فورسز نے قبضے میں لیا، ان کے گھر جانے والے راستوں کو بند کیا گیا، ان کے جنازے میں لوگوں کو شامل کرنے کی اجازت بھی نہیں دی گئی۔

انہوں نے کہا کہ یہ صورتحال دیکھ کر دنیا میں بسنے والے ہر کشمیری کو تکلیف ہوئی۔ دنیا نے بھارت کا اصلی چہرہ دیکھ لیا ہے۔ مقبوضہ کشمیر میں کمیونیکیشن گیپ ہے۔ مقبوضہ کشمیر میں صحافیوں کو جانے کی اجازت نہیں۔

وزیر خارجہ کا کہنا تھا کہ لوگوں نے دیکھا کہ بھارت حقائق توڑ مروڑ کر پیش کرتا ہے، آج کی دنیا میں انسانی حقوق کا پرچار ہوتا ہے۔ انسانی حقوق کو اس انداز میں پامال کرنا نامناسب ہے۔

انہوں نے بتایا کہ یہ ڈوزیئر 131 صفحات پر مشتمل ہے، ڈوزیئر میں وار کرائمز کا تذکرہ بھی ہے۔ سلامتی کونسل کی کس طرح نفی کی جا رہی ہے وہ بھی ڈوزیئر میں درج ہے۔ ایک مسلم علاقے کو اقلیت میں تبدیل کرنا بھی اس ڈوزیئر میں شامل ہے۔

وزیر خارجہ کا کہنا تھا کہ ڈوزیئر میں 41 حوالے ایسے ہیں جن کی سورس انڈین ہے، 32 حوالے ایسے ہیں جن کا تعلق عالمی اداروں سے ہے، پاکستان کے 113 میں سے صرف 14 حوالے ہیں۔ ان لوگوں کی نشاندہی کی گئی ہے جو وار کرائم کو مرتب کرنے میں ملوث ہیں، ان میں میجر جنرل، میجرز، ڈی آئی جیز، کرنلز اور کیپٹن ہیں۔