اسلام آباد : وزارت سمندر پار پاکستانیز میں چار ہزار ملازمین کی بوگس بھرتیوں کا انکشاف ہوا ہے، یہ بھرتیاں ایم کیو ایم کے ڈاکٹر فاروق ستار کے دورمیں کی گئیں۔
تفصیلات کے مطابق ایم کیو ایم پاکستان کے سابق رہنما ڈاکٹر فاروق ستار کی اپنی پارٹی سے سبکدوشی کے بعد ایک اور مشکل آن پڑی، اس حوالے سے ذرائع کا کہنا ہے کہ وزارت اوورسیز پاکستانیز میں چار ہزار ملازمین کی بوگس بھرتیوں کا انکشاف ہوا ہے.۔
مذکورہ بھرتیاں فاروق ستار کے دور وزارت میں کی گئیں، یہ بھرتیاں سال2010 اور2011 کے عرصے میں کی گئیں، اس دوران جعلی ڈگریوں پر سیکڑوں افراد بھرتی کیے گئے۔
ایسے افراد کا ڈیٹا ملا ہے جو وزارت کے ملازم ہیں مگر آج تک ڈیوٹی پر نہیں آئے، بوگس بھرتیوں کے باعث قومی خزانے کو کروڑوں روپے کا نقصان پہنچایا گیا۔
وزیر اعظم عمران خان کے معاون خصوصی برائے اوورسیز پاکستانیز زلفی بخاری نے بھی بوگس بھرتیوں کی تصدیق کردی ہے، ان کا کہنا ہے کہ بہت جلد کیس تیار کرکے نیب کو بھجوایا جائے گا، بھرتی ہونے والے بوگس ملازمین کی ڈگریوں کی تصدیق بھی کرائی جارہی ہے۔
مزید پڑھیں : پارٹی رکنیت ختم کرنے کی وجوہات نہیں بتائی گئیں، فاروق ستار
زلفی بخاری نے مزید کہا کہ اس کے علاوہ ڈاکٹر فاروق ستار کے دور میں ہونے والی مالی بےضابطگیوں کا بھی جائزہ لیاجارہا ہے، کرپشن کے واضح ثبوت ملنے پر نیب کو دستاویزات فراہم کردیں گے۔
