کراچی : متحدہ قومی موومنٹ کے رہنما ڈاکٹر فاروق ستار نے کہا ہے کہ مخالفین سانحہ12مئی کا ملبہ ایم کیوایم پر ڈالنے کی کوشش میں ناکام رہے، خواجہ اظہار کا کہنا ہے کہ کچھ جماعتوں نے اپنی سیاست کو چمکایا۔
ان خیالات کا اظہار انہوں نے سانحہ12مئی کے حوالے سے میڈیا سے گفتگو کرتے ہوئے کیا، ڈاکٹر فاروق ستار نے کہا کہ 12مئی ایک قومی سانحہ ہے اس پرجتنا افسوس کیا جائے کم ہے، اس دن سیاسی جماعتوں کے48کارکنان جاں بحق ہوئے تھے۔
مخالفین نے سانحہ کا ملبہ ایم کیوایم پر ڈالنے کی کوشش کی گئی مگر وہ ناکام رہے، فاروق ستار نے کہا کہ 12مئی کی سازش کس نے کی؟ اس کا ہدف کون تھا یہ ابھی تک معلوم نہیں ہوسکا ہے،12مئی کے واقعات ایم کیوایم پاکستان کے خلاف ایک سازش تھی۔
سندھ اسمبلی میں اپوزیشن لیڈر خواجہ اظہار الحسن نے کہا کہ اس شہر کو جان بوجھ کر12مئی کو نشانہ بنا کر شب خون مارا گیا، اس دن ایم کیو ایم کے14سے زائد کارکنان شہید ہوئے، 12مئی پرباقی سیاسی جماعتوں نےاپنی سیاست کوچمکایا, پیپلزپارٹی اور پی ٹی آئی کس بات کا جلسہ کررہی ہیں، ان دونوں جماعتوں کو کس بات کی خوشی ہے۔
واضح رہے کہ سانحہ 12 کو گزرے گیارہ سال بیت گئے، ملک کی وکلاء برادری یوم سیاہ منا رہی ہے، وکلاء صرف اہم نوعیت کے مقدمات میں سیاہ پٹیاں باندھ کرعدالتوں میں پیش ہو رہے ہیں جب کہ یوم سیاہ کی مناسبت سے باررومزکی چھتوں پرسیاہ پرچم بھی لہرائے گئے۔
اسلام آباد : اسلام آباد ہائی کورٹ نے ایم کیو ایم کنونیر شپ کیس کی سماعت کے دوران ایڈوکیٹ فروغ نسیم نے کہا کہ منشور کے تحت کنونیئر پارٹی کا اجلاس طلب نہیں کرسکتا، جسٹس عامر فاروق نے آئندہ سماعت تک حکم امتناعی برقرار رکھنے کا حکم دے دیا۔
تفصیلات کے مطابق اسلام آباد ہائی کورٹ میں الیکشن کمیشن کی جانب سے فاروق ستار کو کنوینئر شپ سے ہٹانے اور انٹرا پارٹی الیکشن کالعدم قرار دینے کے فیصلے کے خلاف درخواست پر سماعت ہوئی، ڈاکٹر فاروق ستار کی دائر درخواست کی سماعت جسٹس عامر فاروق نے کی۔
ڈاکٹر فاروق ستار کی جانب سے عدالت میں بیرسٹر بابر ستار پیش ہوئے، دوران سماعت بابر ستار ایڈووکیٹ نے کہا ہے کہ ایم کیو ایم بہادرآباد گروپ کے رہنما خالد مقبول صدیقی کے پاک سر زمین پارٹی سے خفیہ تعلقات ہیں۔
خالد مقبول صدیقی کی جانب سے بیرسٹر فروغ نسیم ہائی کورٹ میں پیش ہوئے تھے، ایڈوکیٹ فروغ نسیم نے عدالت کو بتایا کہ متحدہ قومی موومنٹ کے منشور کے تحت کنونیئر کو پارٹی کا اجلاس طلب کرنے کے اختیارات نہیں ہیں۔
دونوں فریقوں کے دلائل سننے کے بعد جسٹس عامر فاروق نے کیس سماعت کل تک ملتوی کردی ہے، جسٹس عامر فاوق کل کورٹ میں فاروق ستار کے خلاف توہین عدالت کیس کی سماعت بھی کریں گے۔
فاروق ستار کے خلاف توہین عدالت کی درخواست بیرسٹر فروغ نسیم نے خالد مقبول صدیقی کی جانب سے دائر کی ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : ایم کیو ایم پاکستان کے رہنما اور میئر کراچی وسیم اختر نے کہا ہے کہ ایم کیو ایم کے دونوں دھڑوں کو مل جانا چاہیئے، فاروق بھائی یوم پاکستان کے دن کی خاطر بہادر آباد آجائیں۔
ان خیالات کا اظہار انہوں نے یوم پاکستان کے موقع پر مزارقائد پر حاضری کے بعد میڈیا سے گفتگو کرتے ہوئے کیا۔ وسیم اختر نے کہا کہ وقت کی ضرورت ہے کہ ایم کیوایم کےدونوں دھڑوں کومل جاناچاہیئے۔
کراچی میں عالمی کرکٹ بحال ہورہی ہےفاروق ستار بھائی بھی تعلقات بحال کرلیں۔ ان کا کہنا تھا فاروق بھائی کو متعدد بار کہا ہے کہ آجائیں رابطہ کمیٹی آپ ہی کی ہے، فاروق بھائی کے نہ ماننے کے پیچھے نامعلوم وجوہات ہیں۔
ہمارے ووٹرز چاہتے ہیں کہ ایم کیو ایم کے دونوں دھڑے مل جائیں اورایم کیو ایم متحدہوئی تو2018 کے انتخابات میں کلین سوئپ کرینگے۔
مئیر کراچی وسیم اختر کا کہنا تھا ایم کیوایم پاکستان کو یکجا کرنے کی تمام تر ذمہ داری فاروق ستار پر ہے،وہ آکر ایم کیو ایم کی سربراہی کریں،ویسی ہی عزت دیں گے۔
ایک سوال کے جواب میں میئر کراچی کا کہنا تھا کہ کچرے کی صورتحال پراب تک اطمینان بخش صورتحال نہیں ہے،کچھ اضلاع میں کچرا جلانے والے کے ایم سی کے ورکرز نہیں ہیں۔
کراچی : سندھ اسمبلی میں قائد حزب اختلاف اورایم کیوایم بہادر آباد کے رہنما خواجہ اظہارالحسن ڈاکٹر فاروق ستارکو منانے کیلئے اہم پیغام لے کر پی آئی بی کالونی پہنچ گئے۔
تفصیلات کے مطابق ایم کیو ایم بہادرآباد کی جانب سے فاروق ستار کو منانے کی کوششیں تاحال جاری ہیں لیکن روٹھنے اور منانے کا یہ معاملہ اب تک کسی نتیجے پر نہیں پہنچ سکا۔
اس حوالے سے ذرائع کا کہنا ہے کہ خواجہ اظہارالحسن کی پی آئی بی کالونی میں ڈاکٹر فاروق ستار سے اہم ملاقات ہوئی ہے، ملاقات میں خواجہ اظہارالحسن نے بہادر آباد کا مصالحتی پیغام فاروق ستار کو پہنچادیا۔
خواجہ اظہار کا کہنا تھا کہ آپ یوم تاسیس سے پہلے بہادرآباد آجائیں، جواب میں فاروق ستار نے کہا کہ میری طرف سے کوئی ضد اور انا نہیں میں 18مارچ کو مشترکہ یوم تاسیس منانے کی پیشکش پہلے ہی کرچکاہوں کہ ایم کیو ایم کا یوم تاسیس مزارقائد باغ جناح میں مشترکہ طور پر منائیں۔
ان کا کہنا تھا کہ اس یوم تاسیس میں خالد مقبول صدیقی اور میں تقریرکریں، پارٹی معاملات اور رابطہ کمیٹی سے متعلق بھی خالد مقبول اور مجھے فیصلہ کرنے دیں، انہوں نے کہا کہ میں ثالثوں کی کوشش کو سراہتاہوں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
کراچی : ایم کیو ایم پاکستان کے رہنما سینیٹر فروغ نسیم نے کہا ہے کہ فاروق ستار پر میرے کئی احسانات ہیں، مجھ پر لگائے گئے الزامات بے بنیاد ہیں، میں نے تو ان کو امریکی صدر بننے کا بھی مشورہ دیا تھا، عامر خان یا خواجہ اظہار کو نکالنے کیلئے کبھی نہیں کہا۔
یہ بات انہوں نے اے آر وائی نیوز سے خصوصی گفتگو کرتے ہوئے کہی، بیرسٹر فروغ نسیم نے فاروق ستار کے الزامات کو جھوٹ قرار دیتے ہوئے کہا کہ فاروق ستار کی بات میں وزن نہیں ہے، ان کے پاس اب کچھ ہے نہیں، جوالزامات وہ لگارہے ہیں میں نے ان کو اس کے برعکس مشورے دیئے۔
فاروق ستارنے ایک بات آپ کو نہیں بتائی، میں نے تو فاروق ستار کو امریکا کا صدر بننے کا مشورہ بھی دیا تھا، فروغ نسیم کا کہنا تھا کہ فاروق ستار نے جو پرچہ دیا وہ میری لکھائی نہیں ہے، فاروق ستار اپنی خواہش دوسرے پر ڈال رہے ہیں، اگرپرچہ اصلی ہے توان کے پاس کیسےآیا؟ پروگرام کے دوران فروغ نسیم نے ایک پرچے پر اپنی ہاتھ کی تحریر لکھ کر بھی دکھائی۔
انہوں نے کہا کہ فاروق ستار گزشتہ11سال سے میرے دفتر آرہے ہیں، وکیل اور ڈاکٹر اپنے کلائنٹ کے نوٹس لکھتا ہے ، اب ان ہی سے ان سے پوچھا جائے ان کے پاس میرے نوٹس کیسے آئے؟ وہ نوٹس کہیں فاروق ستار چوری چھپے اٹھا کرتو نہیں لےگئے؟
انہوں نے کہا کہ خواجہ اظہار چھوٹے بھائیوں کی طرح ہیں،ان کو ہٹانےکی بات کیسے کروں گا، عامرخان اور خواجہ اظہار کو پارٹی سے نکال کر کامران ٹیسوری کو چیمپئن بنانے سے مجھے کیا فائدہ ہوگا؟ فاروق ستارکو چھوڑ کرجو بھی لوگ مجھے جانتے ہیں ان سے میرا کردار کے بارے میں پوچھ لیں۔
فروغ نسیم کا مزید کہنا تھا کہ فاروق ستار اور کامران ٹیسوری کو کہا تھا کہ میں نسینیٹ کا امیدوارنہیں ہوں لیکن ان دونوں نے ضد کی کہ فروغ نسیم ہی سینیٹ کے امیدوارہوں گے، بہادر آباد والوں نے بحالت مجبوری کہا تھا کہ فروغ نسیم اور کامران ٹیسوری کو ڈراپ کردیں، لیکن فاروق ستار نہیں مانے۔
ایک سوال کے جواب میں سینیٹر فروغ نسیم نے کہا کہ فاروق ستار پر میرے کئی احسانات ہیں، اےٹی سی کے40کیسز اور فاروق ستارسمیت 3لوگوں کو سپریم کورٹ میں معافی میں نے دلوائی تھی، حضرت علیؓ کا یہ قول کبھی غلط نہیں ہوسکتا کہ جس پراحسان کرو اس کےشر سے ڈرو۔
پارٹی آئین میں ترمیم سے متعلق ان کا کہنا تھا کہ فاروق ستار مجھ سے مسلسل یہ شکایت کررہے تھے کہ عامرخان پارٹی نہیں چلانے دے رہے، وہ آئین میں ترمیم کے لئے میرے پاس آئے، میں نے فاروق ستارکے کہنے پر پارٹی آئین کے3سے4ڈرافٹ تیار کیے۔
بعد ازاں رابطہ کمیٹی کے شور مچانے پر فاروق ستار نے آئین میں تبدیلی کا ملبہ مجھ پر ڈالنے کی کوشش کی، جس پر میں نے رابطہ کمیٹی کو وضاحت دی کہ ڈرافٹ فاروق ستار کے کہنے پر بنائے، رابطہ کمیٹی کو یقین دلایا کہ ڈرافٹ ان کے سامنے رکھوں گا، فاروق ستار کو ویٹو پاور ملنے سے میرا کیا فائدہ ہے؟
فروغ نسیم کا مزید کہنا تھا کہ ایم کیوایم صرف وہ ہے جو بہادرآباد میں ہے،اس پر فاروق ستار ایسا ردعمل دے رہے ہیں، اس تحریرکا مجھ سے کوئی تعلق نہیں، فاروق ستار معاملے کو طول دے رہے ہیں، ایک مشترکہ دوست نے فون کیا اور کہا کہ یہ لکھائی فاروق ستار کے ایک کوآرڈینیٹرکی ہے۔
فروغ نسیم نے میرے سامنے فاروق ستار کو مشورے دیئے، کامران ٹیسوری کا دعویٰ
دوسری جانب پروگرام کے دوران ایم کیو ایم کے رہنما کامران ٹیسوری نے رابطہ کرکے انکشاف کیا کہ میں حلفیہ کہہ سکتا ہوں فروغ نسیم نے ہی فاروق ستار کو مشورے دیئے تھے، یہ تمام مشورے میرے سامنے دیئے گئے اس کا چشم دید گواہ ہوں۔
کراچی : ایم کیو ایم کے رہنما ڈاکٹر فاروق ستار نے کہا ہے کہ سینیٹ الیکشن میں کارکنوں کوجو توقع تھی وہ نتائج نہ دے سکے، چودہ ارکان اسمبلی نے اپنے ضمیر کا سودا کیا، ایک سیٹ کی فتح کاجشن مناناافسوس کی بات اور بے حسی ہے۔
ان خیالات کا اظہار انہوں نے پی آئی بی کالونی میں پریس کانفرنس سے خطاب کرتے ہوئے کیا، انہوں نے کہا کہ پانچ خواتین رکن اسمبلی اور سلیم بندھانی نے صبح ہی کہیں اور ووٹ بھگتا دیا تھا، کامران ٹیسوری کو ووٹ دینے والوں نے بھی دھوکا دیا۔
تین ارکان نے ووٹ مسترد کرایا اور پانچ نے بھی کسی اور کو ووٹ ڈال دیا۔ 6ایم پی ایزکا ہمیں پتہ ہے، باقی کیلئے بہادرآباد والےساتھ دیں، جن کے بارےمیں پتہ ہے ان کےخلاف تادیبی کارروائی کا آغاز کریں، سلیم بندھانی اور5بہنوں کےخلاف کارروائی کاآغازکیاجائے۔
انہوں نے کاہ کہ کس نے کتنے پیسے دیئےاور کس نے لئے، اس کی بھی تحقیقات ہونی چاہیے، پروپیگنڈے میں پارٹی سربراہ، تنظیمی بحران کو مورد الزام ٹھہرایا جارہا ہے، ایم کیوایم کے12اراکین کی وفاداری تبدیل کرائی گئی، پہلی بارسندھ کو بلوچستان کی طرح ہارس ٹریڈنگ کا حب بنایا گیا۔
فاروق ستار نے سوال کیا کہ جن جماعتوں کا مینڈیٹ چھینا گیا کیا وہ خاموش رہیں گی؟ کیا سینیٹ الیکشن کےایسے نتائج کومان لیاجائے؟ دھاندلی زدہ الیکشن کوکالعدم قراردینے کیلئےالیکشن کمیشن کردار ادا نہیں کریگا؟ کیا ارباب اختیار اور الیکشن کمیشن کوئی ایکشن نہیں لیں گے؟ کیا چیف جسٹس بھی وفاداری تبدیل کرانےکا نوٹس نہیں لیں گے؟
بہادر آباد والوں سے متعلق گفتگو کرتے ہوئے انہوں نے کہا کہ بہادرآباد والوں نےایک سیٹ کی کامیابی پرجشن منایا، جشن منانا افسوس کی بات ہے، یہ بےحسی ہے، شرم، رونے اور مرنےکا مقام ہے۔
کیا یہ میری کوتاہی ہے کہ ہمارےایم پی ایز پرندوں کی طرح پھڑپھڑاتے ہوئے اڑگئے، خریدنے والا منہ بولے دام اور بکنےوالا دھڑلے سےخود کو بیچ رہاہے، وفاداری تبدیل کرنے یاخود کو بیچنےکی ایسی تعلیم دی جارہی ہے۔
فاروق ستار نے کہا کہ بکنےوالوں کے گھروں کے شہداء کا الزام راؤانوار جیسےافسران پر ہے، ایسا غصہ نکالا گیا کہ مہاجروں کے شہداء کا ہی سودا کرلیا گیا، خود کو ہر قسم کے احتساب کیلئے کارکنوں کی عدالت میں پیش کرونگا۔
فاروق ستار نے کہا کہ بانی کےپاس22اگست سے پہلے کیاطریقہ تھا کوئی بکنے کاسوچتا بھی نہیں تھا، بہادر آباد والے ساتھی اتفاق کریں تو کیا وہی پالیسی یا طریقہ اختیارکریں؟
کراچی : ایم کیو ایم پاکستان کے رہنما ڈاکٹر فاروق ستار نے کہا ہے کہ پیپلز پارٹی نے ہارس ٹریڈنگ کر کے سینیٹ الیکشن کو غیر شفاف بنادیا، نیلام گھر سجانے کی مذمت کرتا ہوں، منحرف اراکین کےخلاف سخت کارروائی کریں گے۔
تفصیلات کے مطابق متحدہ قومی موومنٹ کے بیشتر اراکین کی جانب سے سینیٹ الیکشن میں پیپلزپارٹی کے امیدوار کو ووٹ دینے پرمتحدہ قومی موومنٹ کی قیادت کو پریشانی میں مبتلا کردیا۔
فاروق ستار کا کہنا ہے کہ پیپلزپارٹی کی ہارس ٹریڈنگ نے آج کے الیکشن کو غیرشفاف بنادیا، ایم پی ایز کی مجبوری اور بےبسی کا فائدہ اٹھا کر انہیں یرغمال بنایا گیا، آج سینیٹ انتخابات میں جو نیلام گھر سجایا گیا ہے میں اس کی پرزور الفاظ میں مذمت کرتاہوں۔
انہوں نے کہا کہ پیپلزپارٹی جو آج کررہی ہے وہ اپنے لئے خود گڑھا کھود رہے ہیں، الیکشن شفاف نہیں ہوئے، الیکشن کمیشن کو خط لکھوں گا کہ ہارس ٹریڈنگ کا نوٹس لے، یہ منظر آج پاکستان کے میڈیا اوران کے کیمروں نے دیکھا۔
ایک سوال کے جواب میں فاروق ستار کا کہنا تھا کہ ناصرشاہ کے کامران ٹیسوری سے متعلق بیان پر صرف یہ کہوں گا کہ ہارس ٹریڈنگ جس کا مشغلہ ہے وہ ہی ایسی بات کرسکتا ہے۔
فاروق ستار نے پیشکش کی کہ کامران ٹیسوری کی تجوری کے گوشوارے میں پیش کرادوں گا، آصف زرداری کے گوشوارے آپ پیش کرادیں، سمندر کے قطرے کا مقابلہ سمندر سے کرینگے توشرما جائیں گے۔
انہوں نے کہا کہ سینیٹ الیکشن کے نتائج کچھ بھی آئیں، ہارس ٹریڈنگ ختم ہونی چاہئے، اراکین کی خرید و فروخت کاسلسلہ بند کیا جائے، جن باجیوں نے وفاداری بدلی وہ ہمیں بتاتیں کہ کیا دباؤ اور وجہ تھی کہ جس کی باعث انہیں یہ قدم اٹھانا پڑا۔
انہوں نے کہا کہ منحرف اراکین کے خلاف سخت کارروائی کریں گے، اگر پارٹی میں ڈسپلن نہیں تو ایسی سیاسی جماعت کو عوام میں جانے کا حق نہیں ہے، مہاجر ووٹ بینک بہت سمجھدارہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
اسلام آباد : ایم کیو ایم پاکستان کے رہنما ڈاکٹر فاروق ستاراورخالد مقبول صدیقی نے سینیٹ کے انتخابات میں مشترکہ امیدوارلانے کا اعلان کیا ہے، انہوں نے کہا کہ ہم نہیں چاہتے کہ ایم کیوایم پاکستان اور اس کا ووٹ بینک تقسیم ہو۔
ان خیالات کا اظہار انہوں نے نیشنل پریس کلب اسلام آباد میں مشترکہ پریس کانفرنس سے خطاب کرتے ہوئے کیا، فاروق ستار نے بتایا کہ پانچ نام اتفاق رائے سے منظور کیے گئے ہیں۔
جنرل نشست پر فروغ نسیم، کامران ٹیسوری امیدوار ہیں، ٹیکنوکریٹ نشست پرعبدالقادرخانزادہ، خاتون کی نشست پرنگہت شکیل جبکہ اقلیت کی نشست پرسنجے پروانی ہمارے امیدوار ہیں، حامی جماعتوں سےبات چیت جاری ہے، ہم پانچوں سیٹوں پر کامیاب ہونگے۔
اسلام آباد میں فاروق ستار اور خالد مقبول صدیقی کافی عرصے بعد پریس کانفرنس کرتے ہوئے ٹیبل پرایک ساتھ بیٹھے نظر آئے۔
اپنی گفتگو میں فاروق ستار کا مزید کہنا تھا کہ اختلاف رائے کے باوجود ہم اپنی اپنی پوزیشنز پر قائم نظر آئے، اس تمام عرصے کے دوران ہمارے درمیان ثالثی کا عمل بھی چلتا رہا اور براہ راست بھی ایک دوسرے سے رابطے میں رہے، جس کی تصدیق خالد مقبول صدیقی کریں گے۔
فاروق ستار کا کہنا تھا کہ ہم نے سینیٹ الیکشن کے معاملےپر یکسوئی پیدا کی ہے، سینیٹ الیکشن سے متعلق ہمارے درمیان اتفاق رائے ہوگیا ہے، سینیٹ الیکشن کیلئے ہمارے5امیدوارہیں، ہم نہیں چاہتے کہ ایم کیوایم پاکستان تقسیم ہو یا اس کا ووٹ بینک تقسیم ہو۔
انہوں نے کہا کہ حتی الامکان یہی کوشش ہے کہ ایم کیوایم پاکستان کو یکجا رکھیں، مدد کرنے پر میرے اور خالدمقبول کے ساتھیوں کا شکریہ ادا کرتا ہوں۔ فاروق ستار کا کہنا تھا کہ نئی شروعات کیلئےسینیٹ الیکشن پہلامرحلہ تھا،اس پراتفاق ہوگیا۔
اس موقع پر گفتگو کرتے ہوئے خالد مقبول صدیقی نے کہا کہ ہم نے خواتین، ٹیکنوکریٹ کی نشست پر امیدواروں کا مل کراعلان کردیا ہے، جنرل نشست پرہمارے امیدوار فروغ نسیم،ہیں اور فاروق بھائی کے امیدوارکامران ٹیسوری ہیں، کل سندھ کے شہری علاقوں کوان کاحق ملے گا۔
خالد مقبول صدیقی کا مزید کہنا تھا کہ یہ فارمولہ میں نے ہی فاروق بھائی کو دیا تھا، فاروق بھائی کو کہا تھا کہ یہ سیٹ امانت ہے، میری جگہ کوئی اورہوتا تو آج خلیج مزید بڑھ جاتی۔
اس موقع پر ڈاکٹر فاروق ستار کا کہنا تھا کہ سینیٹ کی سیٹ پر اختلاف علامتی تھا اصل وجہ کوئی اور ہے، کامران ٹیسوری اور فروغ نسیم کو میری تین تہائی اکثریت نے امیدوارنامزد کیا ہے، فروغ نسیم کو بھی اپنا ہی امیدوارمانتا ہوں، ہم ایک کھلی کتاب ہیں، عنوان مل کرطےکرلیں گے۔
کراچی : ایم کیوایم پاکستان کے رہنما کنور نوید جمیل نے کہا ہے کہ فاروق ستار غیرسنجیدہ اقدامات سے اپنی عزت خراب کرارہے ہیں، انہیں آج ایم کیوایم حقیقی، پی ایس پی کارکنان کا سہارا لینا پڑا، اللہ پاک فاروق ستارکو ہدایت دے۔
یہ بات انہوں نے ایم کیو ایم کے عارضی مرکز دفتر بہادر آباد کے باہر پریس کانفرنس کرتے ہوئے کیا، انہوں نے کہا کہ فاروق ستارکو غیرتنظیمی، غیرآئینی ہتھکنڈے استعمال کرنے کی ضرورت نہیں ہے۔
انہوں نے کہا کہ فاروق ستار کو رابطہ کمیٹی بار بار بہادرآباد بلاتی رہی لیکن وہ نہیں آئے، وہ اپنے تمام غیرقانونی اقدامات کو کالعدم کرکے بہادرآباد واپس آجائیں تو انہیں ویلکم کہیں گے۔
کنورنوید نے کہا کہ غیرآئینی انٹرا پارٹی الیکشن میں ایم کیوایم حقیقی اور پی ایس پی کارکنان کا سہارا لے کر اور اپنے غیرسنجیدہ اقدامات سے فاروق ستار اپنی عزت خود خراب کروا رہے ہیں۔
کنور نوید جمیل کا مزید کہنا تھا کہ ایم کیوایم کے تمام ووٹرز آج بھی بہادرآباد کے ساتھ کھڑےہیں، ایم کیوایم کے ووٹرز تنظیم کو جانتے ہیں فرد واحد کو نہیں، کارکنوں کو انٹراپارٹی الیکشن ناکام بنانے پر مبارکباد دیتا ہوں، عام انتخابات سے بہت پہلے ساری صورتحال کلیئر ہوجائے گی۔
انہوں نے بتایا کہ 10فروری کو فاروق ستارکو کہہ دیا تھا کہ ہمارے لئے سینیٹ کی سیٹیں مسئلہ نہیں انہیں آپ لےلیں، کنورنوید نے کہا کہ ہمارا انتخابی نشان پتنگ ہے، بہادرآباد کا دفترہی ایم کیوایم کا مرکزی دفتر ہے، اگر فاروق ستاراپنے اقدامات کالعدم کرکے یہاں آتے ہیں تو یہ ان کا دفتر ہے۔
ان کا کمزید کہنا تھا کہ فاروق ستار نے جورابطہ کمیٹی بنائی وہ کامران ٹیسوری گروپ کی ہے، ایم کیوایم کا ایک ہی آئین ہےجو2000میں بنا،2016میں کچھ ترمیم ہوئی، انہوں نے دعا کی کہ اللہ پاک فاروق ستارکو ہدایت دے کہ وہ اپنے تمام غیرآئینی اقدام ترک کرکےہمارے ساتھ آجائیں۔
کراچی: ایم کیو ایم پاکستان کے رہنما فاروق ستار نے کہا ہے کہ سربراہ میں ہوں اور پارٹی دوسرے چلائیں اب یہ ایم کیو ایم پاکستان میں نہیں چلے گا، کل جذبہ خیرسگالی کے تحت بہادرآباد جاؤں گا، میرےلئےیہ 10سے12روزتکلیف دہ تھے۔
ان خیالات کا اظہار انہوں نے پی آئی بی کالونی میں انٹرا پارٹی الیکشن کے موقع پر میڈیا سے گفتگو کرتے ہوئے کیا، فاروق ستار نے کہا کہ آج ثابت ہوگیا کہ کسی بھی تحریک یاجماعت کو کارکن ہی چلاتے ہیں۔
انہوں نے کہا کہ اگر کسی رابطہ کمیٹی کا کوئی وجود ہے، آئین ہے تو وہ صرف کارکنوں کی وجہ سے ہے، پارٹی سربراہ میں ہوں، پارٹی کوئی اورچلارہاہو، اب یہ ایم کیوایم پاکستان میں نہیں چلےگا، بہادرآباد میں سربراہ تو بہت سارے ہیں،
فاروق ستار نے کہا کہ انٹراپارٹی الیکشن میں کارکنان کے ووٹ سے سربراہی کا معاملہ حل ہوگا،5فروری سے آج تک لوگ ذہنی اذیت کاشکار ہیں، میرے لئے یہ10سے12روز تکلیف دہ تھے،خوشی کی بات نہیں۔
فاروق ستار نے کہا کہ رابطہ کمیٹی، بلدیاتی نمائندگی، میئرکراچی اور چیئرمین ڈی ایم سیز کارکنوں اور عوام کی حمایت اور تائید کی وجہ سے ہیں۔
انہوں نے کہا کہ ریحان ہاشمی کو مبارکباد پیش کرتا ہوں، وہ ثابت قدم رہے، ہرطرح کے دباؤ کے باوجود اپنی جگہ پر ڈٹے رہنے والوں کو خراج تحسین پیش کرتاہوں، ایم کیوایم پاکستان کی بہنیں، بیٹیاں سیسہ پلائی دیوارکی طرح اپنی جگہ قائم رہیں، نظریے پرثابت قدمی کا مظاہرہ کرنے پرانہیں شاباش دیتا ہوں۔
فاروق ستار کا مزید کہنا تھا کہ پوراہاتھی نکل کر یہاں آگیا ہے صرف دُم بہادر آباد میں رہ گئی ہے، پوری اے پی ایم ایس او میرے ساتھ کھڑی ہے۔
