کراچی : ایم کیو ایم پاکستان کے رہنما کنور نوید جمیل نے کہا ہے کہ فاروق ستار مسلسل میڈیا میں ٖغلط بیانی کر رہے ہیں، انہوں نے کامران ٹیسوری کی ایما پر انیس قائم خانی سے ملاقاتیں کیں۔
یہ بات انہوں نے متحدہ قومی موومنٹ کے مرکز بہادرآباد میں میڈیا سے گفتگو کرتے ہوئے کہی ، انہوں نے کہا کہ کوئی دانستہ طور پر پارٹی کو نقصان پہنچانے کی کوشش کرے یہ بات کسی کو بھی برداشت نہیں ہے۔
ان کا کہنا تھا کہ غیرقانونی عمل کو روکنےکیلئے ہی فارق ستار کو کنوینر شپ سے ہٹایا گیا تھا، گزشتہ رات بھی فاروق ستار سے بہادرآباد آنے کی درخواست کی گئی لیکن وہ پھر بھی نہیں آئے۔
ایک سوال کے جواب میں انہوں نے کہا کہ انٹرا پارٹی کے غیر قانونی الیکشن میں ایک ایک آدمی 10۔10 ووٹ کاسٹ کررہاہے، ووٹنگ میں کارکنان کے ساتھ ساتھ عوام کو بھی بلایا گیا ہے۔
کنور نوید جمیل نے بتایا کہ فاروق ستار نے کامران ٹیسوری کی ایما پر انیس قائم خانی سے خفیہ ملاقاتیں کیں، فاروق ستار اس لائن پر کئی ماہ پہلے چلے تھے، ہم فاروق بھائئی سے تنظیمی باتوں کو چھپانے کی باتیں کیا کرتے تھے، لیکن اب باقی باتوں سے پردہ اٹھایا جائے گا۔
اسلام آباد : ایم کیو ایم پاکستان کے ڈپٹی کنوینئر کامران ٹیسوری نے اپنا استعفیٰ فاروق ستار کو پیش کردیا ان کا کہنا ہے کہ انٹرا پارٹی انتخابات کاحصہ نہیں بنوں گا۔
تفصیلات کے مطابق متحدہ قومی موومنٹ میں اختلافات کی وجہ بننے والے کامران ٹیسوری نے بڑا فیصلہ کرلیا، متحدہ کے ڈپٹی کنوینئر کامران ٹیسوری نے اپنا استعفیٰ پارٹی کے سربراہ ڈاکٹر فاروق ستار کو بھیج دیا ہے۔
میڈیا سےگفتگو کرتے ہوئے ان کا کہنا تھا کہ میں اس وقت اسلام آباد میں ہوں، فاروق ستار سے 4 دن سے رابطے میں نہیں ہوں، کافی دنوں سے یہ تاثر دیا جارہا تھا کہ میں فاروق ستار کے فیصلوں پر اثر انداز ہورہا ہوں۔
انہوں نے کہا کہ غلط تاثرکی وجہ سے گزشتہ دنوں اپنے اہل خانہ کے ہمراہ اسلام آباد آگیا تھا، لہٰذا اب میں نے اپنا استعفیٰ پارٹی کے سربراہ کو پیش کردیا ہے۔
ڈاکٹر فاروق ستار ہی میرے سربراہ ہیں وہ جو فیصلہ کریں گے مجھے منظور ہوگا، انہوں نے کہا کہ میں انٹرا پارٹی انتخابات کا حصہ بھی نہیں بنوں گا۔
کراچی : ایم کیو ایم کے رہنما ڈاکٹر فاروق ستار نے کہا ہے کہ رابطہ کمیٹی کے تحلیل شدہ اراکین سینیٹرز کے نام دے دیں ان کا اعلان میں خود باضابطہ طور پر کررہاہوں، ان کے دیئے گئے نام ہی میرے نام ہوں گے۔
یہ بات انہوں نے پی آئی بی میں پریس کانفرنس سے خطاب کرتے ہوئے کہی، فاروق ستار کا کہنا تھا کہ تحریک کے شہداء کی قربانیوں، مہاجرقوم، تنظیم کو بچانے،40سال کی جدوجہد بچانےکیلئے بڑا فیصلہ کیا ہے۔
انہوں نے کہا کہ سینیٹ کی چارسیٹوں کیلئے بہادرآباد اپنی مرضی کے نام دے دے، میں سینیٹ کیلئے ناموں سے دستبردار ہوگیا ہوں، باقی لوگوں کے نام میں کل میں خارج کردوں گا۔
بہادرآباد میں تحلیل شدہ رابطہ کمیٹی ارکان چار نام دیں، میری طرف سے بھی وہی چار نام بطور امیدوار ہوں گے، ان میں کامران ٹیسوری ہو یا کوئی بھی ہو، یہ میرا مسئلہ نہیں۔
ان کا کہنا تھا کہ میں ان ناموں کا اعلان کردوں گا، میرامقصد تنظیم کو تقسیم ہونے سے بچانا ہے، یہ مسئلہ نہیں تھا، بنا دیا گیا،اس لئے میں نے پہل کرکے اعلان کردیا۔
انہوں نے واضح کیا کہ سینیٹ الیکشن کیلئے اب میرا کوئی نام یا کوئی امیدوار نہیں، تنظیم کی بڑی تعداد میرے ساتھ ہے، کارکنان میں بدگمانی نہ پھیلائی جائے کہ فاروق ستار بھائی ضد پراڑے ہوئے ہیں۔
انہوں نے کہا کہ میں 3 مرتبہ بہادرآباد جارہا تھا، وہیں سے کوئی نہ کوئی رکاوٹ آئی، شرط رکھی گئی کہ جنرل ورکرز اجلاس ملتوی کروں، عامر خان بھائی پی آئی بی جنرل ورکرزاجلاس میں آجاتے تو معاملہ حل ہوجاتا۔
فاروق ستار کا مزید کہنا تھا کہ میرا یہ مسئلہ ہے کہ کچھ معاملات میں آخری فیصلے کا اختیارسربراہ کا ہونا چاہئے، سربراہ کی عزت ہونی چاہئے، بااختیار سربراہ بننے میں میری مدد کریں۔
انہوں نے کہا کہ گلشن اقبال میں کالعدم، نہیں تحلیل شدہ رابطہ کمیٹی ارکان اجلاس کررہے ہیں، وہاں کااجلاس غیر آئینی وغیر قانونی ہے۔
میرا بھی دل دکھا ہوا ہے، بہت افسوس ہے، پپوسارے پرچوں میں فیل ہے، آج وہ بھی فیصلہ آجائے گا، الیکشن کمیشن نے ہمارے انٹرا پارٹی الیکشن کو روکنےسے منع کیا ہے۔
کراچی : ایم کیو ایم رابطہ کمیٹی کے رکن بیرسٹر فروغ نسیم نے کہا ہے کہ فاروق ستار پارٹی کا نام اور انتخابی نشان اب استعمال نہیں کرسکتے، ایم کیوایم صرف وہ ہے جو بہادرآباد میں ہے۔
ان خیالات کا اظہار انہوں نے میڈیا سے گفتگو کرتے ہوئے کیا، بیرسٹر فروغ نسیم نے کہا کہ فاروق ستار اب ایم کیوایم پاکستان کا نام اور انتخابی نشان پتنگ استعمال نہیں کرسکتے کیونکہ رابطہ کمیٹی نے دو تہائی اکثریت سے ڈاکٹر فاروق ستار کو کنوینر کے عہدے سے ہٹایا ہے۔
ایم کیو ایم کے عارضی مرکز بہادرآباد میں میڈیا سے گفتگو کرتے ہوئے ان کا کہنا تھا کہ ایم کیوایم صرف وہ ہے جو بہادرآباد میں ہے۔ فاروق ستار انتخابی نشان چرخی رکھنا چاہتے ہیں، اگر الیکشن کمیشن اجازت دے تو ضرور رکھ لیں۔
ایم کیو ایم پاکستان کا مرکزی دفتر صرف بہادرآباد میں ہے، رہنما ایم کیوایم فروغ نسیم کا کہنا ہے کہ فاروق ستار سے پارٹی سنبھالی نہیں جارہی تھی، ایم کیو ایم پاکستان کے دو دھڑےنہیں ہیں۔
انہوں نے کہا کہ پارٹی آئین کےتحت رابطہ کمیٹی جسے چاہےٹکٹ دے سکتی ہے، ایم کیوایم رابطہ کمیٹی نے دوتہائی اکثریت سے سارے فیصلے کئے ہیں، ایم کیوایم کا جو آئین ہے اسی پرسب کو عمل کرناچاہیے۔
کراچی : ایم کیو ایم کے رہنما ڈاکٹر فاروق ستار نے رابطہ کمیٹی کے اختیارات اور اس کو تحلیل کرتے ہوئے نئے انٹرا پارٹی انتخابات کرانے کا اعلان کردیا، انہوں نے کہا ہے کہ بہادرآباد والوں کے تمام اقدامات غیر آئینی ہیں۔
تفصیلات کے مطابق کے ایم سی گراؤنڈ پی آئی بی میں جنرل ورکرز اجلاس سے خطاب کرتے ہوئے ان کا کہنا تھا کہ چھوٹی موٹی چارج شیٹ میرے پاس بھی موجود ہے،5فروری سےمسلسل غیر آئینی اجلاس پر اجلاس کئے جارہے ہیں، پارٹی آئین توڑنے کا اب تک ریکارڈ قائم کردیا گیا ہے۔
انہوں نے کہا کہ پاکستان کےانتخابی قوانین کی سنگین خلاف ورزیاں کی گئیں، غیرآئینی فیصلے کرکے 6 دن سے پارٹی آئین کی دھجیاں اڑائی جارہی ہیں، کسی کو شوکاز نہیں، جب چاہا جس کو چاہا پارٹی یا عہدے سے فارغ کردیا گیا۔
اجلاس سے خطاب کرتے ہوئے فاروق ستار نے نئے پارٹی انتخابات کرانے کا بھی اعلان کردیا،انہوں نے کہا کہ17فروری کو اسی گراؤنڈ میں ووٹنگ ہوگی، ان کا کہنا تھا کہ پارٹی سے وڈیروں کو نکالنے کا وقت آگیا ہے، اگران میں ہمت ہے تو نئی پارٹی بنا کر دکھائیں۔
فاروق ستار کا کہنا تھا یہ لوگ ایک طرف تو کہتے ہیں کہ سربراہ اختیار مانگتا ہے، دوسری طرف کہتے ہیں کہ آئین میں ترمیم کرکے اختیارات لے لئے، اگر اختیارات لے لئے ہوتے تو کیا آج ان کی یہ ہمت ہوتی؟ کیا ڈنڈے والاسربراہ ہوتا تو کیا ان کی مجھے نکالنےکی ہمت ہوتی؟
ان کا مزید کہنا تھا کہ کامران ٹیسوری کا مسئلہ ہوتا تو شب خون نہ مارا جاتا، غیر آئینی طور پر پارٹی سربراہ کا اختیار چھینا گیا، آپ کے قول و فعل میں تضاد ہے، آپ نےخود کامران ٹیسوری کو ٹکٹ دیا ہے، انہوں نے سربراہ کو نہیں ایم کیوایم کے ایک ایک کارکن کو نکالا ہے۔
ان کو اچانک پارٹی کا آئین، اصول اور قواعد وضوابط کیسے یاد آگئے؟ فاروق ستار نے کہا کہ انہیں یہ یقین ہوگیا تھا فاروق ستار کسی کو چائنا کٹنگ کرکے کراچی پر قبضہ نہیں کرنے دینگے اور کراچی میں جرائم پیشہ عناصر کو دوبارہ سر اٹھانے نہیں دیں گے۔
انہوں نے کہا کہ میں نے پارٹی میں جاگیرداروں کیخلاف آوازاٹھائی یہ میرا قصور ہے، میں ایم کیوایم کو نظریاتی طور پر1986کی پارٹی بنانا چاہتا ہوں، پارٹی میں نئے آنے والوں کو روکا جاتا ہے،میں نے نئے لوگوں کو متعارف کرایا۔
فاروق ستار نے کہا کہ گھر کی لڑائی گھر کےاندر ہونی چاہیے یہ کہنا کیا میری غلطی تھی؟ بانی کے زمانے کے اختیارات نہیں مانگتا لیکن ممنون حسین بن کر بھی نہیں رہنا چاہتا۔
کراچی: ایم کیو ایم کی رابطہ کمیٹی نے فاروق ستار کو کنونیئر شپ کے عہدے سے ہٹا دیا، کنور نوید کا کہنا ہے کہ پارٹی نے فیصلہ بہت مجبوری میں کیا، فاروق ستاراب ایم کیوایم کے کارکن ہیں۔
اس موقع پر عامر خان، خالد مقبول صدیقی، نسرین جلیل اور دیگر متحدہ رہنما موجود تھے، اس بات کا اعلان ڈپٹی کنونیئر نے رابطہ کمیٹی کے ہمراہ عارضی مرکز پی آئی بی میں پریس کانفرنس کے ذریعے کیا، ایم کیوایم پاکستان میں مائنس مائنس کا گیم جاری ہے، بانی ایم کیوایم کے بعد رابطہ کمیٹی نے فاروق ستار کی بھی چھٹی کردی۔
پریس کانفرنس سے خطاب کرتے ہوئے متحدہ قومی موومنٹ پاکستان کے رہنما کنور نوید جمیل کا کہنا تھا کہ فاروق ستار نےخود کومطلق العنان سربراہ بنایا، ان کے پاس پارٹی کیلئے نہیں پر این جی اوز کیلئے وقت تھا،اگر فاروق ستار اپنی اصلاح کرتے ہیں تو وہ دوبارہ کنوینر بن سکتے ہیں۔
کنور نوید جمیل نے کہا کہ فاروق ستار نےدھوکے سے پارٹی آئین تبدیل کرنے کوشش کی، بحالت مجبوری یہ فیصلہ کیاگیا، فاروق ستار نے رابطہ کمیٹی کے اختیارات خود سنبھال لیے، پارٹی رجسٹریشن کی منسوخی کےذمہ دارفاروق ستار تھے۔
ان کی غفلت کی وجہ سے ایم کیو ایم کی الیکشن کمیشن میں رجسٹریشن منسوخ ہوئی، باربار توجہ دلانے کے باوجود فاروق ستار نے گوشوارے جمع نہیں کروائے۔
انہوں نے کہا کہ فاروق ستار کو منانے گئے تو وہاں ہم سے بد تمیزی کی گئی، خاص لوگوں کو بلا کر اپنے حق میں نعرے بازی کرائی گئی، عامرخان اور وسیم اختر سے نازیبا اندازمیں گفتگو کی گئی۔
کے ایم سی گراؤنڈ میں ہونے والے ایم کیوایم ورکرزاجلاس میں پی ایس پی اور حقیقی کے کارکنان کا کیا کام تھا؟
کراچی میں سیاسی جماعتوں کے درمیان ماضی جیسی کشیدگی نہیں چاہتے، پی ایس پی اورحقیقی سے اب اچھے تعلقات ہیں۔
اس موقع پر خالد مقبول صدیقی نے خطاب کرتے ہوئے کہا کہ فاروق ستارکی سربراہی میں4 لوگوں کو4نشستوں کیلئےمنتخب کیا گیا تھا، فاروق ستارنے کہا ایک کی قربانی دیں کامران ٹیسوری کا نام ڈالیں، جس پر ہم نے کہا کہ کامران ٹیسوری کا میرٹ بتادیں، تعلیم اور تجربہ کیا ہے؟
کامران ٹیسوری ہر اہم اجلاس میں فاروق ستارکے ساتھ شامل ہوتے تھے، سینیٹ کے ٹکٹ سے متعلق رابطہ کمیٹی میں ووٹنگ ہوئی تو کامران ٹیسوری ووٹنگ کے لحاظ سے چھٹے نمبر پر آئے۔
خالد مقبول صدیقی کا مزید کہنا تھا کہ یہ فیصلہ بڑی مشکل سے کیا گیا ہے اور اگر اس وقت یہ فیصلہ نہ کیا ہوتا تو پھر اگلے انتخابات کے بعد ایوان ٹیسوریوں سے بھرا ہوتا۔
واضح رہے کہ گزشتہ روز فاروق ستار بحیثیت سربراہ ان 20 ارکان کو شوکاز نوٹس جاری کرچکے ہیں جس میں ان سے وضاحت طلب کی گئی ہے کہ وہ بتائیں کہ ڈپٹی کنوینر کامران ٹیسوری کو کس بات پر معطل کیا گیا۔
کراچی : ایم کیو ایم پاکستان کے سربراہ ڈاکٹر فاروق ستار نے کہا ہے کہ بلی تھیلےسےباہرآگئی ہے، اصل مسئلہ کامران ٹیسوری کا نہیں بلکہ پارٹی کی سربراہی کا ہے، رابطہ کمیٹی کا الیکشن کمیشن کو خط مجھ پرعدم اعتماد کا اظہار ہے، بہادر آباد کیسے جاؤں؟
یہ بات انہوں نے پی آئی بی کالونی میں اپنی رہائش گاہ کے باہر میڈیا سے گفتگو کرتے ہوئے کہی، فاروق ستار کا کہنا تھا کہ رابطہ کمیٹی اجلاس کیلئے جاتا توحسب منشا بات کرتا، اب کیسےکروں؟
حلفیہ کہتا ہوں کہ میری نیت میں کوئی فتور نہیں، میرے وہاں جانے میں تین رکاوٹیں آئیں، میری اجازت کے بغیرالیکشن کمیشن کو خط لکھاگیا۔
رابطہ کمیٹی کاخط مجھ پرعدم اعتمادکااظہارہے، اگر خط نہ لکھاجاتا تو میں شام7بجے بہادرآباد جاتا، میں ناراض نہیں صدمے میں ہوں ،جو مزید بڑھ گیاہے، میرا مسئلہ عزت نفس اور رٹ کا ہے، کارکن کہیں توپارٹی کی سربراہی سے دستبردار ہونے کیلئے تیار ہوں۔
ان کا مزید کہنا تھا کہ رابطہ کمیٹی کو الیکشن کمیشن کو خط لکھنے کی کیا جلدی تھی؟ خط میں دیگر الیکشن کا اختیارلینے کابھی لکھا گیا ہے، اختیارصرف سینیٹ کے ٹکٹ کا واپس نہیں لیاگیا،خط میں دیگرالیکشن کااختیار لینے کا بھی لکھا گیاہے۔
بلی تھیلےسےباہرآگئی ہے، اب یہ صرف کامران ٹیسوری کا مسئلہ نہیں پارٹی کی سربراہی کا مسئلہ ہے، خود ہی فیصلہ کرلیا گیا تو مجھے بہادرآباد جانے کی کیاضرورت ہے؟ میری نیت اور خلوص پرشک نہ کیا جائے، مجھے ساتھیوں کے مشورے کا انتظار ہے۔
کراچی : ایم کیو ایم کے سربراہ ڈاکٹر فاروق ستار نے کہا ہے کہ بات صرف کامران ٹیسوری کی نہیں بلکہ عامر خان گروپ پوری پارٹی پر قبضہ کرنا چاہتا ہے، اجلاس میں ذمہ داران نے فاروق ستار کو ویٹو پاورز دے دیئے۔
تفصیلات کے مطابق پی آئی بی میں فاروق ستار کی زیرصدارت ہنگامی اجلاس ختم ہوگیا، اجلاس میں اراکین قومی و صوبائی اسمبلی شریک تھے، فاروق ستار نے خواجہ سہیل منصورکو منا لیا ہے جس کے بعد وہ بھی اجلاس میں شرکت کے لیے پی آئی بی کالونی پہنچ گئے۔
اس حوالے سے ذرائع کا کہنا ہے کہ اجلاس کے دوران فاروق ستار نے اراکین قومی و صوبائی اسمبلی کے سامنے اختلافات کی تمام تر کہانی بیان کردی۔
اجلاس سے خطاب کرتے ہوئے فاروق ستار کا کہنا تھا کہ بات صرف کامران ٹیسوری کو سینیٹ کا ٹکٹ دینے کی نہیں ہے بلکہ عامرخان گروپ پوری پارٹی پر قبضہ کرنا چاہتا ہے، عامر خان ایک بار پھر حقیقی ٹو بنانا چاہتے ہیں۔
ذرائع کے مطابق فاروق ستار نے اراکین اسمبلی سے سوال کیا کہ کیا آپ لوگ ایسا ہونے دینگے؟ جس پر اراکین اسمبلی نے کہا کہ آپ جس کو ٹکٹ دیں گے ہمیں منظور ہوگا۔
ذرائع کا مزید کہنا ہے کہ اجلاس میں اراکین اور ذمہ داران نے فاروق ستارکو ویٹو پاورز دے دئیے، اجلاس میں بہادر آباد کا کسی بھی قسم کا دباؤ قبول نہ کرتے ہوئے متفقہ طور پر فیصلہ کیا گیا کہ بہادر آباد والے مؤقف سے پیچھے ہٹیں گے تو پھر بہادر آباد آنے کا سوچیں گے۔
کراچی: سینیٹ انتخابات میں ٹکٹ دینے کے معاملے پر متحدہ قومی موومنٹ پاکستان میں ایک بار پھر اختلافات شدت اختیارکر کرگئے، اجلاس کے دوران فاروق ستار ناراض ہوکر اپنی رہائش گاہ چلے گئے، فاروق ستار نے کارکنان اور اراکین اسمبلی کو پی آئی بی طلب کرلیا۔
تفصیلات کے مطابق ایم کیو ایم پاکستان کے سربراہ ڈاکٹر فاروق ستاراور رابطہ کمیٹی کے کچھ اراکین کے درمیان سینیٹ الیکشن کیلئے ٹکٹ دینے کے معاملے پر اختلافات سامنےآئے ہیں۔
مرکزی دفتر بہادرآباد میں جاری رابطہ کمیٹی کے اجلاس میں فاروق ستار اورعامرخان کے اختلافات کھل کرسامنے آگئے، اس دوران جھگڑا ہوا اور بات تلخ کلامی تک پہنچ گئی جس کے بعد فاروق ستار ناراض ہوکر اپنی رہائش گاہ چلے گئے۔
وہاں پہنچ کرانہوں نے کارکنان، اراکین اسمبلی کو پی آئی بی طلب کرلیا ہے، اس حوالے سے ذرائع کا کہنا ہے کہ فاروق ستار بڑا اعلان کرنے والے ہیں، اسی لیے سب کوپی آئی بی بلایا ہے۔
دوسری جانب عامر خان نے بہادرآباد میں اجلاس طلب کرلیا ہے، خواجہ اظہار الحسن ، کنور نوید جمیل ، فیصل سبزواری اور ڈاکٹر خالد مقبول صدیقی بھی ان کے ہمراہ ہیں۔
سربراہ ایم کیو ایم کا کہنا ہے کہ کچھ لوگ پارٹی پرقبضہ کرنا چاہتے ہیں، یہ لوگ پارٹی سے جانا بھی نہیں چاہتے لیکن قابض ہونا چاہتےہیں، خالد مقبول اور کنور نوید بھی انہیں لوگوں کا ساتھ دے رہےہیں، پارٹی میں من مانیاں نہیں چلنے دوں گا۔
اختلافات کامران ٹیسوری کو سینیٹربنانے کےمعاملے پر ہوئے، جبکہ فاروق ستار ہرحال میں کامران ٹیسوری کو سینیٹر بنانا چاہتے ہیں، دوسری جانب رہنماؤں کا مؤقف ہے کہ سینیٹ ٹکٹ پر پارٹی کیلئے خدمات دینے والوں کاحق ہے۔
ذرائع کے مطابق ایم کیوایم کی پوری قیادت فاروق ستار کے فیصلے کےخلاف ہوگئی، رابطہ کمیٹی کی اکثریت نے پی آئی بی جانے سے انکار کردیا۔
تمام اہم رہنما پی آئی بی کالونی کے بجائے ایم کیو ایم کے مرکز بہادرآباد پہنچ گئے، عامرخان، خالد مقبول، کنورنوید، فیصل سبزواری بہادرآباد میں ہی موجود ہیں۔
ایم کیوایم پاکستان کےاہم رہنماؤں کا مؤقف ہے کہ کارکنوں کو نظر انداز کرکے کامران ٹیسوری کو نوازا گیا ان پر صوبائی اسمبلی کا ٹکٹ، ڈپٹی کنوینئر کا عہدہ اوردیگرنوازشات کی گئیں، کارکنوں کا حق مارنے کی اجازت نہیں دے سکتے۔
پارٹی ارکان کا کہنا تھا کہ رابطہ کمیٹی نے4 ناموں کو ووٹنگ کے ذریعے منتخب کیا تھا، جس میں فروغ نسیم ، نسرین جلیل، امین الحق، شبیر قائم خانی شامل تھے۔
فاروق ستارایک کا نام ڈراپ کرکے کامران ٹیسوری کو سینیٹربنوانا چاہتے ہیں، روز روز روٹھنا اورمنانا اب نہیں چلےگا، کامران ٹیسوری کی وجہ سے پوری پارٹی تباہ ہورہی ہے۔
تازہ ترین اطلاعات کے مطابق بہادرآباد اور پی آئی بی میں کارکنان جمع ہونا شروع ہوگئے، آدھے کارکنان بہادر آباد اور آدھے پی آئی بی پہنچ گئے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پرشیئر کریں۔
کراچی : متحدہ قومی موومنٹ پاکستان کے سربراہ ڈاکٹرفاروق ستار نے کہا ہے کہ امریکہ میں چلنے والی کراچی مخالف مہم کی سخت مذمت کرتے ہیں، پاکستان کے خلاف کسی سازش کو کامیاب نہیں ہونے دینگے۔
ان خیالات کا اظہار انہوں نے بہادر آباد کراچی کے دفتر میں پریس کانفرنس سے خطاب کرتے ہوئے کیا، صحافیوں سے گفتگو کرتے ہوئے ان کا کہنا تھا کہ امریکا میں بیٹھ کر ندیم نصرت کراچی مخالف مہم چلارہا ہے، اس کو پاکستان یا کراچی کیخلاف سازش نہیں کرنے دینگے۔
فاروق ستار نے کہا کہ پرامن جدوجہد سے اپنے حقوق حاصل کرنے کیلئے اب کراچی کے لوگ قومی دھارے کی سیاست کریں گے، عدم تشددکی پالیسی پر عمل کیا جائے گا۔
ان کا مزید کہنا تھا کہ ایم کیوایم پاکستان کی اڑان کو اب کوئی نہیں روک سکتا، کراچی کیخلاف مہم کے خاتمے کے لئے بھرپور کردارادا کیا جائے گا۔
نقیب اللہ قتل کیس سے متعلق ایک سوال کے جواب میں سربراہ ایم کیو ایم کا کہنا تھا کہ نقیب کے قتل کی پرزور الفاظ میں مذمت کرتے ہیں۔
ضرورت اس امر کی ہے کہ محکمہ پولیس سے راؤ انوار جیسے کرداروں کا خاتمہ کیا جائے، سندھ حکومت کو کیا پہلے معلوم نہیں تھا کہ ایس ایس پی ملیر کیا کر رہا ہے ؟
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
