کراچی: ایم کیو ایم پاکستان کے سربراہ ڈاکٹر فاروق ستار نے کہا ہے کہ اہلی اور نااہلی کے ملکی سیاست پر دور رس اثرات مرتب ہوں گے، فریقین عدلیہ کا فیصلہ تسلیم کریں، سانحہ ماڈل ٹاؤن کے ذمہ داروں کو سزا ملنی چاہیئے۔
ان خیالات کا اظہار انہوں نے کراچی کے ایک مقامی ہوٹل میں کتاب کی تقریب رونمائی سے خطاب کرتے ہوئے کیا، اپنے خطاب میں ان کا کہنا تھا کہ عمران خان کی اہلی اور جہانگیر ترین کی نااہلی کا عدالتی فیصلہ ملکی سیاست پر دوررس اثرات مرتب کرے گا۔
فریقین کو چاہیئے کہ عدالتی فیصلے کو تسلیم کریں اور فیصلے کی آڑ میں اداروں پر تنقید نہ کی جائے۔
ایم کیو ایم پاکستان کے سربراہ نے مزید کہا کہ ایم کیو ایم کا تحریک انصاف اور پی اے ٹی سے رابطہ ہے، اگر سانحہ ماڈل ٹاؤن میں پنجاب حکومت ذمہ دار ہے تو بھرپور کارروائی ہونی چاہیے۔
فاروق ستار نے کہا کہ احتساب کا مؤثر قانون اور نظام بنایا جائے، چئیرمین نیب کی تقرری کے عمل میں سیاسی جماعتوں کو دور رکھا جائے، اگر احتساب کا قانون مؤثر ہوجائے تو نواز شریف کو بھی مجھے کیوں نکالا کا سوال نہ پوچھنا پڑے۔
علاوہ ازیں ایم کیو ایم پاکستان اور پی اے ٹی کے درمیان ٹیلیفونک رابطہ ہوا ہے، ذرائع کے مطابق ڈاکٹر فاروق ستار نے ڈاکٹر طاہرالقادری کو ٹیلی فون کرکے سانحہ ماڈل ٹاؤن اورملکی سیاسی صورتحال پربات چیت کی۔
اس موقع پر فاروق ستار کا کہنا تھا کہ سانحہ ماڈل ٹاؤن سیاست سے بالاتر ہے، انصاف کے حصول کیلئے شہداء کے لواحقین کے ساتھ ہیں، ڈاکٹر طاہرالقادری نے سا نحہ ماڈل ٹاؤن پر فاروق ستارکی حمایت کا شکریہ ادا کیا۔
اسلام آباد : وفاقی وزیر ریلوے اور مسلم لیگ ن کے رہنما خواجہ سعد رفیق نے ایم کیو ایم پاکستان کے سربراہ ڈاکٹر فاروق ستار سے ٹیلیفونک رابطہ کیا ہے۔
ٹیلی فونک گفتگو میں کراچی کی سیاسی صورتحال، پی ایس پی سے ایم کیو ایم کے اتحاد ، کراچی پیکج ، ایم کیو ایم کے تحفظات اور ایم کیو ایم ، مسلم لیگ ن ورکنگ ریلیشن شپ پر بات چیت ہوئی۔
اپنی گفتگو میں خواجہ سعد رفیق کا ایم کیو ایم کے تحفظات کے ازالے کی یقین دہانی کراتے ہوئے کہنا تھا کہ متحدہ قومی موومنٹ کا قومی دھارے میں رہ کر سیاست کرنا ملکی امن اور پائیدار استحکام کے لیے انتہائی اہم ہے۔
خواجہ سعد رفیق نے کراچی پیکج پر ہونے والی پیش رفت سے بھی فاروق ستار کو آگاہ کیا۔
اس موقع پر ڈاکٹر فاروق ستار کا کہنا تھا کہ ہمیشہ دباؤ اور زبردستی کی سیاست سے ملکی امن اور استحکام کو نقصان پہنچا ہے، پر امن جمہوری عمل کا تسلسل تمام فریقین کی اہم ذمےداری ہے۔
انہوں نے کہا کہ صوبے کی ترقی اورامن کیلئے سب کو مل کر کام کرناہوگا، ایم کیو ایم کی سیاسی آزادی ، لاپتہ کارکنان کی بازیابی سمیت ایم کیو ایم کے تحفظات کو دور کیا جائے۔
کراچی : ایم کیوایم کی سابق رہنما ارم عظیم فاروقی نے کہا ہے کہ فاروق ستار کے ارد گرد کچھ لوگ ہیں جو انہیں کام کرنے نہیں دے رہے، عامرخان اور ان کا گروپ پارٹی کیلئے اچھا نہیں کررہا۔
ان خیالات کا اظہار انہوں نے اے آر وائی نیوز کے پروگرام پاور پلے میں میزبان صدف عبد الجبار سے خصوصی گفتگو کرتے ہوئے کیا۔
ارم عظیم فاروقی نے ایم کیو ایم اور پی ایس پی کے اتحاد پر تبصرہ کرتے ہوئے کہا کہ اگرڈاکٹرفاروق ستار اور مصطفیٰ کمال کی نیت اچھی ہے اور دونوں ساتھ مل کرکام کرناچاہتےہیں تو ضرور کرناچاہیے۔
دونوں رہنماؤں کو سمجھنا چاہیے کہ نئی پارٹی کو کیسے لے کرچلنا ہے، تاہم کسی شخصیت کو ہدف بنا کر اس کی کردارکشی سے پارٹی کو کوئی فائدہ نہیں ہوگا۔
انہوں نے کہا کہ یہ بھی دیکھنا چاہیے کہ کراچی والوں کی اس ساری صورتحال میں کیا بھلائی ہے؟ ان کا مزید کہنا تھا کہ پی ایس پی اور ایم کیوایم پاکستان میں معاملات کافی عرصے سےچل رہےتھے، میرا بھی شروع سے یہ ہی پیغام تھا کہ پی ایس پی اورایم کیوایم پاکستان ساتھ ملیں۔
ایک سوال کے جواب میں ارم عظیم فاروقی نے کہا کہ ڈاکٹر فاروق ستار کے ارد گرد ایسے کچھ لوگ ہیں جو انہیں کام کرنے نہیں دے رہے، ڈپٹی کنوینئرعامر خان اور ان کا گروپ پارٹی کیلئے اچھا نہیں کررہا۔
ان کا کہنا تھا کہ ایک دم سے یہ کہنا کہ پارٹی ختم ہوگئی ہے ناممکن سا لگتاہے، مصطفیٰ کمال کی انتظامی خوبیوں سے کوئی اختلاف نہیں کرسکتا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
کراچی : ایم کیوایم پاکستان آج لیاقت آباد کراچی میں سیاسی قوت کا مظاہر ہ کرے گی، جلسے کی تیاریوں کے دوران متحدہ اور پی ایس پی کے کارکنوں میں نعرے بازی کے مقابلے سے کشیدگی پھیل گئی، فاروق ستار نے مطالبہ کیا ہے کہ جلسے کی سکیورٹی کے خصوصی انتظامات کیے جائیں۔
تفصیلات کے مطابق ایم کیوایم پاکستان کے زیر اہتمام حالیہ مردم شماری کے نتائج کیخلاف لیاقت آباد میں جلسہ عام کی تیاریاں زور شور سے جاری ہیں، شہر بھر میں جگہ جگہ کیمپ لگائے گئے ہیں جہاں کارکنان کی بڑی تعداد میں موجود ہیں اور پارٹی ترانے گونج رہے ہیں۔
سربراہ ایم کیوایم پاکستان فاروق ستار، میئر کراچی وسیم اختر اور اپوزیشن لیڈر خواجہ اظہار نے بھی جلسے کی تیاریوں کے لیے مختلف علاقوں کا دورہ کیا، جلسہ آج دوپہر دو بجے شروع ہوگا۔
ایم کیوایم پاکستان کے سربراہ ڈاکٹر فاروق ستار نے میڈیا سے گفتگو کرتے ہوئے کہا کہ شہر کراچی کس کا ہے اس کا فیصلہ آج ہوجائے گا۔
انہوں نے کہا کہ ہمیں احتجاج کے حق سے روکا جا رہا ہے، پارٹی بینرز اتارے جا رہے ہیں، حکومت سکیورٹی فراہم کرے، جلسہ میں مردم شماری کے نتائج کے خلاف بھرپور آواز اٹھائیں گے
لیاقت آباد میں جلسے کی تیاری کے دوران ایم کیوایم اور پی ایس پی کے کارکن آمنے سامنے آگئے،اس دوران نعروں کا مقابلہ شروع ہوگیا، پی ایس پی کارکنان نے مصطفی کمال کے حق میں نعرے لگائے۔
کراچی : منی لانڈرنگ اور کراچی میں دہشتگردی کیلئے بھارتی فنڈنگ کے مقدمےمیں مزید انکشافات سامنے آگئے، بینک اکاؤنٹس کی مجازاتھارٹی میں ڈاکٹر فاروق ستار، مصطفیٰ کمال سمیت اعلیٰ قیادت کےناموں کا انکشاف ہوا ہے۔
تفصیلات کے مطابق بانی ایم کیو ایم کیخلاف منی لانڈرنگ کے مقدمہ میں تیرہ جوائنٹ بینک اکاؤنٹس کی مجازاتھارٹی میں بڑےنام سامنےآگئے، انسداد دہشت گردی عدالت میں رپورٹ پیش کردی گئی۔
تحقیقاتی رپورٹ کے مطابق منی لانڈرنگ کیلئے13جوائنٹ بینک اکاؤنٹس استعمال ہوئے جو عزیز آباد کے نجی بینکوں کی مختلف برانچوں میں کھولے گئے تھے، جس میں ایم کیو ایم پاکستان کے سربراہ ڈاکٹر فاروق ستار پی ایس پی چیئرمین مصطفیٰ کمال، ڈپٹی میئر کراچی ارشدوہرا سمیت اعلیٰ قیادت کےنام شامل ہیں۔
یہ انکشاف بھی ہوا کہ مذکورہ اکاؤنٹس ایم کیوایم، کےکےایف، سن اکیڈمی کے نام پرکھولے گئے، اس کے علاوہ نذیرحسین یونیورسٹی اور طارق میر کے نام پربھی اکاؤنٹ ہیں۔
رپورٹ کے مطابق تیرہ میں سے ایک اکاؤنٹ ختم اور چارغیر فعال ہیں، ان بینک اکاؤنٹس میں فاروق ستار،مصطفی کمال، ڈپٹی میئر کراچی ارشدوہرا دستخط کرنے کے مجاز رہے، جبکہ بابرغوری، رؤف صدیقی، خالد مقبول صدیقی کےنام بھی رپورٹ کا حصہ ہیں۔
رپورٹ میں احمدعلی، کنور خالد یونس، شیعب بخاری مرحوم سمیت نازیہ جمیل، عادل صدیقی اور طارق میرکے نام بھی شامل ہیں، عدالت میں ارشد وہرا اپنابیان ریکارڈ کراچکے ہیں۔
تفتیشی ذرائع کے مطابق بڑےناموں کے سامنے آنے پر تفتیش کادائرہ بھی بڑھائے جانے کا امکان ہے۔ تفتیشی ذرائع کا مزید کہنا ہے کہ ڈپٹی میئر ارشد وہرا کا نام مقدمے سے نکالنے کا تاثرغلط ہے۔
حیدر آباد : ایم کیوایم پاکستان کے سربراہ ڈاکٹر فاروق ستار نے کہا ہے کہ حکومت شہریوں کے جان ومال کے تحفظ میں ناکام ہوچکی ہے، ڈاکٹرنوشاد کا قتل دہشت گردی ہے، ہمیں سیاسی طور پردیوار سے لگایا جارہا ہے۔
ان خیالات کا اظہار انہوں نے حیدرآباد میں صحافیوں سے گفتگو کرتے ہوئے کیا، فاروق ستار نے کہا کہ آج ہمیں ایک اور غم دیا گیا ہے، ہم کب تک لاشیں اٹھاتے رہیں گے؟ ڈاکٹر نوشاد کو گھات لگا کر قتل کیا گیا۔
ان کا کہنا تھا کہ حکومت ایم کیوایم کے رہنماؤں کی سکیورٹی میں غفلت کو ترک کرکے شہریوں کے تحفظ کو یقینی بنائے، ہمیں سیاسی طور پردیوار سے لگایا جارہا ہے یہ سلسلہ بند ہونا چاہیئے۔
انہوں نے مطالبہ کیا کہ شہید ڈاکٹر نوشاد کے قاتلوں کو فوری گرفتار کر کے کیفر کردار تک پہنچایا جائے۔
علاوہ ازیں ایم کیوایم رہنما ڈاکٹرنوشاد شیخ کے قتل میں پیش رفت سامنے آئی ہے، اس حوالے سے ایس ایس پی پیرمحمد شاہ کا کہنا ہے کہ ڈاکٹرنوشاد کا قتل ذاتی دشمنی ہے ٹارگٹ کلنگ نہیں۔
انہوں نے بتایا کہ نوشاد شیخ کے قتل میں کامران کریلا اورشاہد ڈانسر ملوث ہے، شاہد ڈانسر کچھ عرصہ پہلے جیل سے ضمانت پر رہا ہوا تھا، ملزم کا کرمنل ریکارڈ موجود ہے۔
کراچی: متحدہ قومی موومنٹ پاکستان کے سربراہ ڈاکٹر فاروق ستار نے سلمان مجاہد بلوچ کا یہ الزام غلط ہے کہ میں بالواسطہ طور پر الطاف حسین سے رابطے میں ہوں، اگر انہیں پتا تھا تو اسی دن ہم سے الگ کیوں نہیں ہوگئے؟ پی ایس پی اور لندن کو چیلنج دیتا ہوں کہ ہمارے استعفوں سے خالی ہونے والے نشستوں پر انتخابات میں ہمارا مقابلہ کرلیں آئے دال کا بھاؤ پتا چل جائے گا۔
یہ بات انہوں نے اے آر وائی نیوز کے پروگرام الیونتھ آور میں میزبان وسیم بادامی کو خصوصی انٹرویو دیتے ہوئے کہی۔
ایک سوال پر انہوں نے کہا کہ میں بہت محتاط ہوں اور میں نے ایک لائن ڈرا کر رکھی ہے احتیاط کی، جو پی ایس پی جارہا ہے میں اسے بھی فون نہیں کرتا کہیں وہ اسے دھمکی کے زمرے میں نہ لے۔
الطاف حسین سے کوئی رابطہ نہیں، الزام غلط ہے
سترہ ستمبر کو الطاف حسین کی سالگرہ منائی کہ نہیں؟ اس سوال پر فاروق ستار نے کہا کہ ہم اپنے کام پر تھے، ہمارا ان سے کوئی رابطہ نہیں، کوئی خفیہ یا کسی کے ذریعے مبارک باد کا پیغام نہیں دیا، سلمان مجاہد بلوچ کا یہ الزام غلط ہے کہ میں بالواسطہ طور پر الطاف حسین سے رابطے میں ہوں۔
انہوں نے کہا کہ یہ الزام ایسے لوگ لگارہے ہیں جن کی سیاست ہی الزامات پر ہے ، اس ایم این اے کو چاہیے تھا کہ اسی وقت پارٹی چھوڑ دیتا جب اس کے علم میں یہ بات آئی۔
ملک سے متعلق مہاجروں کا ریفرنڈم کرایا جائے
انہوں نے کہا کہ کچھ لوگوں اور ریفرنڈم میں بڑا فرق ہے، کچھ سیٹوں کے بجائے سب کی بات کرتے ہیں ریفرنڈم کرایا جائے تو سامنے آجائے گا کتنے مہاجر ملک کے خلاف ہیں؟ کتنے ملک دشمنی پر مبنی نعروں کے حامی ہیں اور کتنے نظریہ اور آئین پاکستان کے ساتھ ہیں۔
فاروق ستار کا پی ایس پی اور متحدہ لندن کو چیلنج
فاروق ستار نے کہا کہ ہم نے خود کو آزمائشوں میں ڈالا پی ایس پی نے نہیں، انہوں نے صرف دعوے کیے ہیں، میں پی ایس پی اور ایم کیو ایم لندن دونوں کو چیلنج دیتا ہوں کہ ہمارے استعفوں سے خالی ہونے والے نشستوں پر ہونے والے انتخابات میں پی ایس پی، لندن اور پاکستان آجائیں پھر ہم دیکھتے ہیں کسے ووٹ ملتے ہیں، آٹے دال کا بھاؤپتا چل جائے گا۔
انہوں نے کہا کہ میں چیلنج دیتا ہوں آئیں اور الیکشن لڑیں، اخلاقیات کا درس دینا اور بات ہے اور پائنچے چڑھا کر پانی میں اترنا اور بات ہے، یہ ہم نے کہا ہے کہ ہمارے استعفی قبول کیے جائیں اور انتخابات کرائے جائیں۔
مسنگ پرسن کےگھرانے روز گھر پر آتے ہیں
ایک سوال پر سربراہ ایم کیو ایم نے کہا کہ مجھ پر مسنگ پرسنز کے گھرانوں کے دباؤ ہیں، روزانہ پانچ سے چھ گھرانے آتے ہیں جو مجھ سے دفتر یا گھر پر آکر ملاقات کرتے ہیں، میں اپنے بات پر قائم ہوں کہ اگر میرے سوالات کے جوابات نہ ملے یا میرا کوئی اور ایم پی اے پارٹی چھوڑتا ہے تو میں استعفی دے دوں گا، میں اپنے بیان پر قائم ہوں۔
نیب کو آج نہیں تو کل یہ گرفتاریاں کرنی تھیں
ڈاکٹر فاروق ستار نے شرجیل میمن کے معاملے پر کہا کہ نیب کو آج نہیں تو کل یہ کرنا تھا، نیب یا تو سب کو بلا کر سوالات کرے اگر ضرورت محسوس ہو تو گرفتاری کرلے، دوسرا طریقہ یہی ہے کہ براہ راست گرفتار کرلے، شرجیل میمن پتا نہیں کیا سوچ کر باہر گئے اور کیا سوچ کر واپس آئے۔
انہوں نے کہا کہ میں نے پی پی کے خلاف وائٹ پیپر جاری کیا تھا وہ فہرست سپریم کورٹ نے بنائی تھی جس میں اربوں روپے کی کرپشن کے الزامات ہیں، میں کسی کو بغیر ثبوت کے کرپٹ نہیں کہہ سکتا۔
کراچی : ایم کیو ایم کے سربراہ ڈاکٹر فاروق ستار نے کہا ہے کہ پیپلز پارٹی عملی طور پر فرینڈلی اپوزیشن کا کردارادا کر رہی ہے جبکہ شاہ محمود قریشی کا کہنا ہے کہ اپوزیشن میں کوآرڈینیشن کمزور ہونے کااعتراف کرنا ہوگا۔
یہ بات انہوں نے مشترکہ پریس کانفرنس سے خطاب کرتے ہوئے کہی، تفصیلات کے مطابق ایم کیوایم اور پی ٹی آئی رہنماؤں نے ملاقات کے بعد میڈیا سے گفتگو کی، جس میں صحافیوں کو ملاقات کی تفصیلات سے آگاہ کیا۔
اس موقع پر ڈاکٹر فاروق ستار کا کہنا تھا کہ آج سے پی ٹی آئی،ایم کیو ایم میں باقاعدہ مکالمےکاآغازہوگیا ہے، پی ٹی آئی وفد سےملاقات میں سیاسی صورتحال پربات چیت ہوئی ہے۔
ملاقات کا کریڈٹ اپنے پارلیمانی رہنماؤں کو دیتا ہوں، پی ٹی آئی سے ہمیشہ قومی مسائل پربات کی، پی ٹی آئی،ایم کیوایم نے تعلقات مضبوط کرنےکافیصلہ کیا ہے، دونوں جماعتوں کا نقطہ نظر ایک ہے جو خوش آئند ہے، صاف شفاف الیکشن کیلئےابھی سےتیاری کرنی ہے، پاکستان میں مینڈیٹ تقسیم ہے، کوئی جماعت اکیلی عوام کو مشکلات سے نہیں نکال سکتی۔
فاروق ستار نے کہا کہ پیپلز پارٹی عملی طور پر فرینڈلی اپوزیشن کا کرداراداکر رہی ہے، کرپشن اور لوٹ مار پر فرینڈلی اپوزیشن بنی ہوئی ہے، خدشہ ہےفرینڈلی اپوزیشن آئندہ الیکشن ہائی جیک نہ کرلے، نواز لیگ اور پیپلز پارٹی کے درمیان مک مکا ہے۔
انہوں نے کہا کہ پیپلز پارٹی نے قومی معاملات میں آج تک کوئی بڑا کام نہیں کیا بلکہ شہروں کوبنیادی حقوق سے محروم رکھا، سربراہ ایم کیو ایم کا کہنا تھا کہ سندھ میں پیپلز پارٹی کی کرپشن اور لوٹ مارکو تحفظ دیا جاتا ہے۔
ہمارا مطالبہ سیاسی ہے غیر آئینی نہیں، شاہ محمود قریشی
صحافیوں سے گفتگو کرتے ہوئے شاہ محمود قریشی نے کہا کہ پی ٹی آئی تہہ دل سے ایم کیو ایم کی مشکور ہے، خداگواہ ہے کوئی ذاتی ایجنڈا لےکر یہاں نہیں آئے، ملاقات میں ایم کیو ایم اور پی ٹی آئی ایک پیج پرنظر آئیں،۔
انہوں نے کہا کہ مشاورتی عمل مکمل ہونے کے بعد مزید پیشرفت ہوگی، اکیلے کچھ نہیں کرسکتے سب کو مل کر چلناہوگا۔ ہمارا مطالبہ سیاسی ہے غیر آئینی اور غیر جمہوری نہیں، ملک کا نظام درست نہیں ہوسکتا جب تک بلدیاتی نظام بہتر نہ ہو۔
ان کا کہنا تھا کہ ہم پر جمہورت کو ڈی ریل کرنے کے الزامات پروپیگنڈا ہے، نہ ہی ہم کسی کےاشارے کے انتظار میں ہیں، اپوزیشن میں کورآرڈینیشن کمزور ہونے کا اعتراف کرنا ہوگا،22اگست کے بعد ایم کیو ایم کیلئے پاکستان زندہ باد کانعرہ لگانا معمولی پیشرفت نہیں۔
اس موقع پر اسد عمر کا کہنا تھا کہ ایم کیو ایم سےاختلافات تھے اور اب بھی ہیں، ہمارا ایم کیو ایم سے سیاسی مقابلہ ہوتا رہے گا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
کراچی : ایم کیو ایم پاکستان کے سربراہ ڈاکٹر فارو ق ستار نے کہا ہے کہ شہید عمران فاروق بھائی کے قتل کی سازش کو بےنقاب ہونا چاہئیے، ناراض کارکنان پارٹی میں واپس آجائیں۔
ان خیالات کا اظہار انہوں نے ایم کیو ایم کے عارضی مرکز بہادر آباد میں ایم کیو ایم کے شہید کنونیر ڈاکٹرعمران فاروق کی ساتویں برسی کے موقع پر قران خوانی کے بعد صحافیوں سے گفتگو کرتے ہوئے کیا، قرآن و فاتحہ خوانی میں مولانا احترام الحق تھانوی نے خصوصی دعا کرائی۔
فاروق ستار نے کہا کہ ہماری پارٹی میں نظم و نسق کے بانی ڈاکٹرعمران فاروق تھے، ان کی شخصیت غیر متنازع تھی، عمران فاروق بھائی کے قتل کی سازش کو بےنقاب ہونا چاہئیے۔
ان کا کہنا تھا کہ ہم نے کل بھی سودا نہیں کیا اوراب بھی نہیں کریں گے، ایم کیوایم پاکستان میں پسند نا پسند نہیں بلکہ کارکردگی پر فیصلے ہوں گے، ناراض کارکنان سے کہتا ہوں ناراضگی دورکریں اور کام کریں، ان کے خدشات دور کیے جائیں گے۔
پارٹی کی تنظیم نو کی جارہی ہے۔ عوامی شکایات کا اندازہ ہے، الیکشن سے پہلے اپنی کارکردگی بہتر بنانا ہوگی، انہوں نے کہا کہ اگر کوئی یہ سمجھ رہا ہے ہم 22اگست کے بعد بکھرگئے ہیں تو یہ وہ غلط ہے، لیکن ہم ہرمشکل کے بعد مزید نکھر گئےہیں، فاروق ستار نے کہا کہ ایم کیوایم پاکستان حلوہ نہیں لوہے کا چنا ہے۔
فاروق ستار نے کہا کہ ایم کیوایم پاکستان اپنی جگہ ایک مستند سیاسی جماعت ہے، ہمیں حلوہ سمجھنے والے اور بکھرتا ہوا دیکھنے کی خواہش رکھنے والے الیکشن میں اپنی ناکامی دیکھ چکے ہیں ۔
ڈاکٹرعمران فاروق کے بارے میں
یاد رہے کہ ایم کیو ایم کے رہنما ڈاکٹر عمران فاروق آج سے سات سال قبل 16 ستمبر 2010کو برطانوی دارالحکومت لندن میں دو نوجوانوں نے چاقو اور اینٹ کے وار کرکے ایم کیو ایم کے کنوینر ڈاکٹر عمران فاروق کو قتل کردیا تھا۔
پوسٹ مارٹم رپورٹ میں انکشاف ہوا تھا کہ پچاس سالہ رہنما چھریوں کے وار سے ہلاک ہوئے تھے جبکہ جائے وقوعہ سے ایک ساڑھے پانچ انچ کی چھری اور ایک اینٹ بھی برآمد کی گئی تھی۔
اس سلسلے میں پاکستان میں معظم علی، محسن اور کاشف نامی تین افراد مرکزی ملزم کی حیثیت سے گرفتار ہیں جبکہ ان تینوں سمیت دیگر ملزمان سے تفتیش کے دوران کئی انکشافات بھی سامنے آئے ہیں۔
کراچی : ایم کیو ایم پاکستان کے سربراہ ڈاکٹر فاروق ستار نے کہا ہے کہ ایم کیو ایم پاکستان کےرہنماؤں کو سیکیورٹی نہ دینا پیپلزپارٹی کی سازش ہے، اس کی کراچی کی نشستوں پررال ٹپک رہی ہے۔ ہم لوہے کےچنے ثابت ہوں گے۔
ان خیالات کا اظہار انہوں نے کراچی میں پریس کانفرنس سے خطاب کرتے ہوئے کیا، ڈاکٹر فاروق ستار نے کہا کہ پیپلز پارٹی ایم کیو ایم پاکستان کے خلاف سازش کررہی ہے، متحدہ رہنماؤں کو سیکیورٹی فراہم نہ کرنا اسی سازش کا حصہ ہے، دہشت گردوں کو متحدہ کیخلاف چھوٹ دے رکھی ہے، ہماری سیاسی آزادی کو سلب کیا جا رہا ہے۔
کراچی کی نشستوں پر پی پی کی رال ٹپک رہی ہے
فاروق ستار نے مزید کہا کہ پیپلزپارٹی کی کراچی کی نشستوں پررال ٹپک رہی ہے، پیپلزپارٹی ہمیں حلوہ نہ سمجھے ہم لوہے کے چنے ثابت ہونگے، خواجہ اظہار پرحملے کے وقت سیکیورٹی ناقص تھی، سندھ حکومت کو متحدہ رہنماؤں کی سیکیورٹی سے کوئی غرض نہیں۔
ڈاکٹر فاروق ستار کا کہنا تھا کہ ایم کیوایم پاکستان ملک کی چوتھی بڑی سیاسی جماعت ہے، ہم سندھ کے شہروں اور متوسط طبقے کی نمائندگی کرتے ہیں، گزشتہ چند ہفتے سے جو غیر یقینی صورتحال ہے اس پرسوالات اٹھتے ہیں۔
ہمارے کئی سیکیورٹی خدشات ہیں، ہم عوام کو متحرک کررہے تھے کہ خواجہ اظہار پرحملہ ہوگیا، بنیادی حقوق اور سلامتی کے معاملات کیلئے ہردروازہ کھٹکھٹایا، ہماری کہیں شنوائی نہیں ہورہی۔
وفاقی اور صوبائی حکومتیں ناکام ہوچکی ہیں
سربراہ ایم کیوایم پاکستان فاروق ستارنے کہا کہ ہم وفاقی اور صوبائی حکومت سے مایوس ہوچکے ہیں، اس لئے چیف جسٹس، آرمی چیف، ڈی جی رینجرز اوردیگر کو خط لکھا ہے، چند ہفتےسے ہماری زندگیوں کو جو خطرات لاحق ہیں ان سے آگاہ کیا گیا ہے، اس خط کی کاپیاں وفاق صوبائی حکومت کو اس لیے بھیجی کہ ان پر اعتماد نہیں، وفاقی اور صوبائی حکومتیں ناکام ہوچکی ہیں۔
ٹیکس لے کر بھی ہمیں حقوق سے محروم رکھا جارہا ہے
ڈاکٹرفاروق ستار نے کہا کہ میں مانتا ہوں بلدیاتی اداروں کی کارکردگی تسلی بخش نہیں، بلدیاتی اداروں کی کارکردگی درست کرنے کی کوشش کر رہے ہیں، ٹیکس ہم سے لے کر ہمیں ہی حقوق سے محروم رکھا جارہا ہے، صوبائی حکومت کی کرپشن نے کراچی کو تباہ کردیا ہے، میئراور ڈپٹی میئر کی کارکردگی اچھی نہیں لیکن وسائل کتنے ہیں یہ بھی دیکھیں، جتنے وسائل ہیں اسی میں کام کرکے کارکردگی بہتر بنارہے ہیں۔
خواجہ اظہار کی سیکیورٹی سندھ حکومت کی ذمہ داری ہے
وزیراعلیٰ کا فرض تھا کہ خواجہ اظہار سے سیکیورٹی کا پوچھتے، خواجہ اظہارکو عیدگاہ کے باہرسیکیورٹی دینا وزیراعلیٰ کاکام تھا، ہمیں تواپنی سیکیورٹی پر تعینات اہلکاروں کی جانوں کی فکرہے، ہم توبلٹ پروف گاڑی میں ہوتے ہیں، اہلکاروں کاکیاہوگا، وزیراعلیٰ نے دعویٰ کیا کہ ہمارے رہنماؤں کو زیادہ سیکیورٹی دی گئی ہے، وزیراعلیٰ مناظرہ کرلیں ایم کیوایم پاکستان کوکتنی سیکیورٹی دی گئی ، ایم کیوایم پاکستان کےمرکزی دفتر پر ایک بھی پولیس اہلکار تعینات نہیں۔
دہشت گردوں کوایم کیوایم پاکستان کیخلاف چھوٹ دے رکھی ہے۔ خدا کے لیے ہمارے بارے میں بھی سوچیں، ہمیں کثیرالدھاری تلوار سے کاٹاجارہا ہے، آئین کا بنیادی نکتہ ہے کہ حکومت ہر شہری کی حفاظت کرے، حکومت یہ کام نہ کرسکے تو حکومت کو استعفیٰ دے دینا چاہئیے۔
مردم شماری میں دھاندلی کیخلاف احتجاج سے روکا جا رہا ہے
کراچی کےایک کڑور40لاکھ لوگوں کو گمشدہ کردیا گیا ہے، دھاندلی کے خلاف احتجاج کا فیصلہ کیا تو ہمیں روکا جارہا ہے، اس کی ایک کڑی خواجہ اظہار پرحملہ بھی ہے، عوامی رابطہ مہم یا لوگوں میں جانے کی کوشش کی تو روکا جارہا ہے، ہماری شرافت کا کب تک فائدہ اٹھایا جائےگا، وفاق صوبائی حکومت سیکیورٹی کی ذمہ داری نہیں لے سکتی تو بتا دے۔
