پاکستان میں متاثرین سیلاب کی مدد کے لیے تحریک انصاف کی فنڈ ریزنگ لائیو ٹیلی تھون مہم میں پانچ ارب روپے سے زائد کی رقم جمع ہوگئی ہے۔
یہ بات سابق وزیراعظم عمران خان کی معاون خصوصی ڈاکٹر ثانیہ نشتر نے اپنے ایک بیان میں کہی ان کا کہنا تھا کہ سیلاب متاثرین کیلئے کی گئی پہلی ٹیلی تھون سے5ارب روپے سے زائد رقم جمع کی گئی۔
انہوں نے بتایا کہ دو ارب روپے ٹیلی تھون میں بحالی کے کاموں کیلئے وقف کیے گئے ہیں۔ 29اگست سے اب تک 38لاکھ ڈالر سے زائد موصول ہوئے۔
ڈاکٹرثانیہ نشتر نے کہا کہ ایک کروڑ 78لاکھ ڈالر کی کریڈٹ کارڈز سے ادائیگی نہ ہوسکی، انہوں نے مطالبہ کیا کہ اسٹیٹ بینک کو اس معاملے کا نوٹس لینا چاہیے۔
انہوں نے مزید کہا کہ اوورسیز پاکستانیوں کی جانب سے1ارب90کروڑ روپے مل چکے ہیں، پاکستان سمیت دنیا بھر سے تقریباً ایک لاکھ پاکستانیوں نے عطیات جمع کرائے۔
مزید پڑھیں : عمران خان کا ٹیلی تھون کے عطیات سے سندھ میں امدادی سرگرمیاں شروع کرنے کا اعلان
ٹیلی تھون میں اندرون اور بیرون ملک سے پاکستانیوں اور مختلف شعبوں سے وابستہ معروف افراد جن میں شوبز، کھیلوں اور سیاست سے تعلق رکھنے والی شخصیات شامل ہیں نے سیلاب متاثرین کے لیے عطیات کا اعلان کیا۔
مختلف سوشل میڈیا پلیٹ فارمز پر ہونے والی اس ٹیلی تھون مہم میں سابق وزیراعظم اور چیئرمین تحریک انصاف عمران خان خود بھی موجود تھے۔
