اسلام آباد : معاون خصوصی ڈاکٹر ظفر مرزا کا کہنا ہے کہ پاکستان میں کورونا کیسزمیں کمی بروقت اقدامات کانتیجہ ہے، قوم کو عید اور محرم پرذمہ داری کا مظاہرہ کرنا ہوگا، ہماری ذرا سی بے احتیاطی کورونا کے کیسز بڑھنے کی وجہ بن سکتی ہے۔
تفصیلات کے مطابق معاون خصوصی ڈاکٹر ظفر مرزا نے میڈیا سے گفتگو کرتے ہوئے کہا کوروناکی بیماری کے پھیلاؤکو مزید کم کرنے کی ضرورت ہے، بہت سے ممالک میں کورونا ختم ہونے کے بعد دوبارہ آیا ہے تاہم پاکستان میں کورونا کیسز میں کمی حکومت کے بروقت اقدامات کا نتیجہ ہے۔
ڈاکٹرظفرمرزا کا کہنا تھا کہ کوروناکی وجہ سے پاکستان میں لوگوں نے نسبتاً احتیاط برتی ، مستقل روابط سےمتعلق لوگوں کےرویوں میں تبدیلی سے وبا کا پھیلاؤ کم ہوا، اب عیداورمحرم کے مواقع پر بھی قوم ذمہ داری کا مظاہرہ کرے۔
معاون خصوصی نے کہا کہ لوگوں کو یہ سمجھنا ہوگا کہ یہ عام عید نہیں بلکہ مختلف ہے ، تفصیلی ایس اوپیز جاری ہوچکے ہیں،عملدرآمد کرنا ہماری کمیونکیشن کا مقصد ہے۔
ان کا کہنا تھا کہ پاکستان میں کورونا کے کیسز میں 80فیصد کمی آئی ہے ، وزیراعظم کی قیادت میں حکومت نے کورونا کیخلاف بروقت اقدامات کئے۔
ڈاکٹرظفرمرزا نے مزید کہا کہ ہر ایک کو ماسک پہننا ہے اور سماجی فاصلہ رکھیں ، گھرمیں پہلے سے کوئی بیمار شخص ہے تو اس کا اور بزرگوں کاخیال رکھیں، بیماروں،بزرگوں اوربچوں کو گھر سے نہیں نکلنا چاہئیے۔
معاون خصوصی کا کہنا تھا کہ ہماری ذرا سی بے احتیاطی کورونا کے کیسزبڑھنےکی وجہ بن سکتی ہے ، ہماری کوشش ہے کہ اپنی کمیونیکیشن کو مزید مؤثر بنائیں۔
