Tag: Drainage work

کراچی : گزشتہ روز بارش کے بعد مختلف علاقوں اور اہم شاہراہوں سے برساتی پانی کی نکاسی تاحال نہیں کی جاسکی، متعدد علاقوں میں بجلی کی فراہمی بھی معطل ہے۔

تفصیلات کے مطابق کراچی میں گزشتہ شام ہونے والی بارش کے بعد برساتی پانی علاقوں اور سڑکوں سے تاحال نہیں نکالا جاسکا، جس کے باعث شہریوں کو پریشانی کا سامنا کرنا پڑرہا ہے،

کراچی کے جن علاقوں اور اہم سڑکوں پر گزشتہ روز ہونے والی بارش کا پانی تاحال موجود ہے ان میں کورنگی کراسنگ ، لانڈھی ، قیوم آباد بھی شامل جہاں صورتحال بہت خراب ہے جبکہ محمود آباد ، پولوگراؤنڈ چورنگی، تبت سینٹر کےاطراف بھی پانی موجود ہے۔

اس کے علاوہ ایم پی اے ہاسٹل کی قریبی سڑک تالاب کا منظر پیش کرنے لگی، ایم اے جناح روڈ، ایمپریس مارکیٹ کے قریب جگہ جگہ پانی جمع ہے، بارش کے 12گھنٹے بعد بھی مختلف علاقوں سے پانی نہیں نکالا جاسکا، کھارادر اور دیگرعلاقوں سے بارش کے پانی کی نکاسی تاحال نہیں کی گئی۔

دوسری جانب کراچی کی سب سے بڑی شاہراہ شارع فیصل پر جمع ہونے والے بارش کے پانی کی نکاسی کردی گئی ہے، جناح اسپتال میں داخل ہونے والا بارش کا پانی بھی نکال دیا گیا۔

اس کے علاوہ شہر ٓکے مختلف علاقوں میں بارش شروع ہوتے ہی بند ہونے والی بجلی تاحال بحال نہ ہوسکی، بیشترعلاقوں میں بجلی کی فراہمی 15 گھنٹے سےمعطل ہے، ڈیفنس، کورنگی کے مختلف علاقوں میں بجلی کی فراہمی تاحال معطل ہے۔

 مزید پڑھیں : پانی گھروں میں داخل، کرنٹ لگنے سے دو جاں بحق

کیماڑی ،سرجانی ٹاؤن کے مختلف علاقوں میں لوگ رات بھر سے بجلی کے انتظار میں بیٹھے ہیں، محمود آباد،، پی ای سی ایچ ایس کے علاقوں میں بھی بجلی بند رہی، ملیر سٹی میں اسوان ٹاؤن، گلشن رفیع میں بجلی بند ہے، جامعہ ملیہ اور اطراف میں بجلی کی فراہمی تاحال معطل ہے۔