ارجنٹائن میں نشے میں دھت ایک ڈرائیور نے گاڑی کو جان بوجھ کر درخت سے ٹکرا دیا جس کے بعد اسے گرفتار کرلیا گیا، مقامی حکومت فٹ پاتھ کی مرمت کے پیسے ڈرائیور سے وصول کرنے کا ارادہ رکھتی ہے۔
سوشل میڈیا پر پوسٹ کی گئی ویڈیو میں 25 سالہ ڈرائیور کو دیکھا جاسکتا ہے جو اپنے دوست کے ساتھ گاڑی میں ہے، ڈرائیور نشے میں دھت ہے اور چلا رہا ہے کہ ہم مرنے کے لیے تیار ہیں۔
اس دوران وہ نہایت غیر محتاط ڈرائیونگ کرتا ہے۔
اس کا دوست جو ویڈیو بنا رہا ہے وہ ڈرائیور کو روکتا بھی دکھائی دیا تاہم نشے میں چور ڈرائیور کچھ بھی سمجھنے سے قاصر ہے۔
اس کے بعد اچانک گاڑی دھماکے سے سائیڈ وے پر لگے درخت سے جا ٹکراتی ہے۔ جان بوجھ کر کیے گئے اس حادثے میں خوش قسمتی سے دونوں محفوظ رہتے ہیں۔
پولیس نے ڈرائیور کو گرفتار کر کے اس پر نشے میں ڈرائیونگ کرنے کے چارجز عائد کیے ہیں جبکہ اس کا ڈرائیونگ لائسنس بھی معطل کردیا گیا ہے۔
پولیس کا کہنا ہے کہ کیس عدالت میں پیش کیے جانے کے بعد مقامی حکومت فٹ پاتھ کی مرمت کی رقم ڈرائیور سے وصول کرنے کا ارادہ رکھتی ہے، گاڑی ٹکرانے سے سائیڈ وے کو نقصان پہنچا ہے اور اس کی دیوار ٹوٹ گئی ہے۔
