کراچی: کریم اباد کے قریب ڈی ایس پی علی رضا اور سیکیورٹی گارڈ کو قتل کرنے کا مقدمہ کاؤنٹر ٹیررزم تھانے میں درج کر لیا گیا۔
تفصیلات کے مطابق کراچی میں عزیز آباد کے علاقے میں ڈی ایس پی سی ٹی ڈی علی رضا سمیت 2 افراد کے قتل کا مقدمہ ایس ایچ او عزیز آباد عمران خان آفریدی کی مدعیت میں سی ٹی ڈی میں درج کیا گیا ہے۔
ایف آئی آر میں قتل اور دہشت گردی سمیت دیگر دفعات شامل کی گئی ہیں، ایف آئی آر کے مطابق ایس ایچ او نے کہا ’’مجھے اطلاع موصول ہوئی کہ شکیل کارپوریشن فلیٹ میں ڈی ایس پی علی رضا کو فائرنگ کر کے قتل کیا گیا ہے، میں جائے وقوعہ پر پہنچا تو علاقے کے لوگ کافی تعداد میں جمع تھے اور دو مختلف مقامات پر فاصلے سے تازہ خون پڑا ہوا تھا۔‘‘
ایس ایچ او نے کہا ’’لوگوں نے بتایا کہ ڈی ایس پی علی رضا کو ہلاک اور سیکیورٹی گارڈ وقار علی کو زخمی کیا گیا ہے، ٹیم طلب کر کے جائے وقوعہ سے شواہد اکھٹے کیے گئے، جن میں 9 ایم ایم کے 12 چلے ہوئے خول، 2 عدد خون کے نمونے بہ شکل سواب اسٹک، ایک نیلے کلر کی ٹوپی، 3 چلے ہوئے سِکے شامل ہیں، تمام شواہد کو محفوظ کر لیا گیا ہے۔‘‘
ایف آئی آر کے مطابق علاج و معالجہ کے دوران سیکیورٹی گارڈ وقار بھی ہلاک ہو گیا، تحقیقات کے دوران پتا چلا علی رضا اپنی گاڑی میں شکیل کارپوریشن کے گیٹ پر پہنچے تھے، گاڑی پارک کر کے گیٹ سے پیدل اندر داخل ہو رہے تھے کہ 2 یا 2 سے زائد مسلح موٹر سائیکل سوار ملزمان نے واردات کی۔
مقدمے میں کہا گیا کہ علی رضا نے اپنی سروس کے دوران مختلف لسانی اور کالعدم دہشت گرد تنظیموں کے خلاف کارروائیاں کی تھیں، ملک میں دہشت گردی کو فروغ اور قانون نافذ کرنے والے اداروں کے حوصلے کو پست کرنے کے لیے یہ واردات کی گئی۔ ملزمان کے خلاف مقدمہ درج کر کے تفتیش کا عمل جاری ہے۔
