Tag: dubai court

دبئی: متحدہ عرب امارات میں دبئی کی ایک عدالت نے مجرم کو انوکھی سزا دیتے ہوئے فراڈ کیس میں اس کا انٹرنیٹ بند کرا دیا۔

تفصیلات کے مطابق دبئی کی ایک عدالت نے دھوکا دہی کے ایک مقدمے میں دو افریقی شہریوں کو ایک ماہ قید، 44 ہزار درہم جرمانے اور ملک سے بے دخلی کے ساتھ 6 ماہ انٹرنیٹ کے استعمال پر پابندی کی سزا سنائی ہے۔

امارات الیوم کے مطابق عدالت نے یہ سزا ایک ملزم کی عدم موجودگی میں سنائی ہے، اور پولیس دھوکا دہی میں ملوث ایک ملزم کو تلاش کر رہی ہے۔

ایک خلیجی شہری نے عدالت میں درخواست دائر کی تھی کہ اس نے ایک آن لائن شاپنگ سائٹ پر موٹر سائیکل کے لیے اشتہار دیا، جس پر ایک شخص نے رابطہ کر کے پیش کش کی کہ مطلوبہ موٹر سائیکل 22 ہزار درہم میں دستیاب ہے۔

خلیجی شہری کے مطابق سودا ہونے پر افریقی شہری نے مختلف بہانوں سے موٹر سائیکل کی قیمت دگنی کر دی اور بینک اکاؤنٹ میں رقم طلب کرتا رہا۔

جب خلیجی شہری نے بینک اکاؤنٹ کے ذریعے اسے 44 ہزار درہم کی ادائیگی کر دی تو اس نے شپنگ فیس کے نام پر مزید پانچ ہزار درہم طلب کیے جس پر خلیجی شہری کو شبہ ہوا کہ وہ دھوکا بازوں کے جال میں پھنس گیا ہے۔

پبلک پراسیکیوشن میں ملزم نے بیان میں کہا کہ خلیجی شہری کا دعویٰ درست ہے، اس کے ایک دوست نے انٹرنیٹ پر اشتہار دیکھ کر خلیجی شہری سے واٹس ایپ پر رابطہ کر کے رقم ہتھیانے کا منصوبہ بنایا تھا۔ ملزم نے بتایا کہ میرا کام اکاؤنٹ میں آنے والی رقم نکال کر دوست کے حوالے کرنا تھا جس پر کمیشن ملتا تھا۔

دبئی: متحدہ عرب امارات میں ایک غیر ملکی شوہر کو اپنی بیوی کی نامناسب تصاویر کھینچنا مہنگا پڑ گیا، دبئی کی عدالت نے الزام ثابت ہونے پر اس پر 5 ہزار درہم جرمانہ کر دیا۔

مقامی میڈیا کے مطابق دبئی میں ایک شخص نے نگرانی کے کیمروں کا استعمال کرتے ہوئے گھر میں اپنی بیوی کی ویڈیوز بنائیں، جس پر دبئی کی عدالت نے اس پر پانچ ہزار درہم جرمانہ عائد کیا ہے۔

38 سالہ برطانوی باشندے پر الزام تھا کہ اس نے بیوی کی مرضی کے بغیر نامناسب تصاویر اور ویڈیوز بنائیں، یورپی خاتون نے شوہر کے خلاف نجی زندگی میں مداخلت کی شکایت درج کرائی تھی۔

خاتون کا مؤقف تھا کہ ان کا شوہر فوٹو گرافی کا جنون کی حد تک شوق رکھتا ہے، اور منع کرنے کے باوجود نامناسب حالات میں تصویر لے لیتا ہے، غصے اور رونے کی صورت میں بھی۔

خاتون کا کہنا تھا شوہر نے جمیرہ ولیج سرکل میں واقع رہائش گاہ پر بار بار ایسا کیا، اور منع کرنے پر بھی نہیں رکا، خاتون کا یہ بھی کہنا تھا کہ شوہر نے گھر میں جگہ جگہ سی سی ٹی وی کیمرے لگائے ہوئے ہیں، اور وہ اس کی وجہ گھریلو عملے کی نگرانی قرار دے رہا ہے، لیکن جب کبھی میں سی سی ٹی وی کیمرے آف کر دیتی ہوں تو شوہر ناراض ہو جاتا ہے۔

شوہر نے عدالت میں الزامات کو مسترد کرتے ہوئے کہا کہ اس کی اہلیہ نے دروغ گوئی سے کام لیا ہے، اور اس کی وجہ ذاتی اختلافات ہیں۔

تاہم دبئی پولیس کے ماتحت فوجداری شواہد کے ادارے نے بتایا کہ شوہر کے موبائل کی میموری میں اہلیہ کی تصاویر اور ویڈیوز موجود تھیں، عدالت نے الزام ثابت ہو جانے پر شوہر کے خلاف 5 ہزار درہم جرمانہ اور وکیل کی فیس کی رقم ادا کرنے کا پابند بنایا۔