دبئی : لندن کی طرز پر اب دبئی میں بھی انتہائی جدید اور پرآسائش لندن ٹیکسی ماڈل سروس فراہم کی جائے گی، رواں سال یہ ٹیکسی سروس دبئی انٹرنیشنل ایئر پورٹ پر دستیاب ہوگی۔
روڈز اینڈ ٹرانسپورٹ اتھارٹی (آر ٹی اے) نے اعلان کیا ہے کہ وہ دبئی میں رواں سال ہائبرڈ گاڑیوں کا استعمال کرتے ہوئے لندن ٹیکسی ماڈل سروس کا آغاز کرے گی۔
گلف نیوز کے مطابق درمیانے سائز کے ساتھ کالے رنگ کی یہ نئی ٹیکسی انگلینڈ کے دارالحکومت میں لندن کیب سے مشابہ ہے۔
دبئی کی روڈز اینڈ ٹرانسپورٹ اتھارٹی کی دبئی ٹیکسی کارپوریشن آزمائشی بنیادوں پر فروری سے لندن ٹیکسی سروس کا آغاز کرے گی۔ یہ ٹیکسی سروس دبئی انٹرنیشنل ایئر پورٹ پر دستیاب ہوگی۔
روڈز ٹرانسپورٹ اتھارٹی کے بورڈ آف ایگزیکٹیو ڈائریکٹرز کے چیئرمین مطر محمد الطایر نے کہا کہ نئی سروس دبئی میں ٹیکسی سروس کو مزید بہتر بنانے سے متعلق آر ٹی اے کے منصوبے کا حصہ ہے۔
الطایر نے یہ بات ڈی ٹی سی کے دورے کے موقع پر کہی جہاں انہوں نے کارپوریشن کی2020 میں کارکردگی اور امسال شروع کئے جانے والے منصوبوں کا جائزہ لیا۔
Mattar Al Tayer,Director-General, Chairman of the Board of Executive Directors of @rta_dubai endorses improvement projects of #Dubai Taxi in 2021 & announced that the Dubai Taxi Corporation (DTC) would launch the London Taxi version service using hybrid (electricity & fuel) cabs. pic.twitter.com/RWRU6kwcS7
— Dubai Media Office (@DXBMediaOffice) January 16, 2021
انہیں لندن ٹیکسی کی اندرونی خصوصیات کے بارے میں بریف کیا گیا جو منفرد اور کشادہ ہے ۔ یہ سواریوں کو کھلی جگہ اور علیحدہ کیبن میں 6 نشستیں فراہم کرتا ہے۔
ٹیکسی میں سیٹلائٹ پر مبنی نیوی گیشن نظام، وائس کمانڈ سسٹم، سامنے سے تصادم کا انتباہی نظام، بلائنڈ سپاٹ مانیٹرنگ سسٹم اور لین ڈپارچر مانیٹرنگ سسٹم کے ساتھ ساتھ وائی فائی نیٹ ورک بھی موجود ہے۔
الطایر کو لندن ٹیکسی کی تکنیکی خصوصیات کے بارے میں بھی بتایا گیا۔ ڈبل انجن پر مشتمل اس گاڑی کو مختلف موسمی حالات میں بہتر انداز میں کنٹرول کیاجا سکے گا۔
اس میں تیز رفتار بریکنگ نظام اور انجن چلانے کے لیے ایسی بیٹری موجود ہے جو تیز رفتار چارجنگ کی بدولت 30 منٹ میں اور عام چارجنگ سسٹم کے ذریعے 3گھنٹے میں چارج ہو جاتی ہے۔
الطایر نے ہیونڈائی آئیونک الیکٹریکل وہیکل کابھی معائنہ کیا جس میں ایروڈائنامک ڈیزائن،پشت سے تصادم سے بچنے والا نظام، ڈرائینگ موڈ کنٹرول سسٹم، ڈرائیونگ کے دورانئے میں اضافہ کرنے کے قابل بنانے والی ری جینریٹیو بریکنگ جیسی خصوصیات موجود ہیں جبکہ 54منٹ کے اندرتیز رفتاری سے چارج ہونے والی بیٹری بھی اس کا حصہ ہے۔
ان ٹیکسیوں میں ڈرائیوروں کی غلطیوں کے سد باب کے لئے جدید آلات نصب کئے گئے ہیں۔ ان میں ہنگامی صورتحال میں کنٹرول سینٹرکے ذریعے گاڑی کو روکنے کا نظام ، بیک اپ ٹریکنگ سسٹم اور نظام الاوقات شامل ہیں۔
دبئی ٹرانسپورٹ اینڈ روڈز اتھارٹی نے رواں ہفتے کے شروع میں پبلک بسوں کا ایک اور روٹ شروع کیا تھا، اس سے میٹرو اسٹیشن آنے جانے والوں کو بے حد سہولت ہورہی ہے، یہ انڈسٹریل زون القصیص سے النھدۃ میٹرو اسٹیشن کے لیے ہے، اس سے مصروف ترین اوقات میں پندرہ منٹ لگتے ہیں۔
