ARYNews.tv | Urdu – Har Lamha Bakhabar

Tag: Dubai

  • دبئی میں ایک ارب سے زائد درہم کا فراڈ کرنے والا گروہ گرفتار

    دبئی میں ایک ارب سے زائد درہم کا فراڈ کرنے والا گروہ گرفتار

    ابو ظہبی: متحدہ عرب امارات کے شہر دبئی کی پولیس نے 1.6 ارب درہم کا فراڈ کرنے والے گروہ کو گرفتار کرلیا، گروہ کے پاس سے 150 ملین درہم اور 13 پرآسائش گاڑیاں ضبط کرلی گئیں۔

    اماراتی ویب سائٹ کے مطابق دبئی پولیس نے دھوکہ دہی کے خطرناک ترین آپریشن میں کامیابی کا اعلان کیا ہے جس میں 1.6 ارب درہم کی دھوکہ دہی کرنے والے گروہ کو گرفتار کرلیا گیا۔

    مذکورہ آپریشن کو ’لومڑیوں کا شکار 2‘ کا نام دیا گیا، گرفتار گروہ کا سرغنہ انسٹا گرام پر نہایت مقبول شخص ہے۔

    مقامی میڈیا کے مطابق بین الاقوامی جعلساز گروہ کا سرغنہ افریقی ملک کا رامون عباس نامی شہری ہے اور ہاشبوبی کے نام سے مشہور ہے۔ اس پر دھوکہ دہی کے ذریعے لوگوں کی رقوم ہتھیانے کا الزام ہے۔

    سرغنہ پر بیرون ملک منی لانڈرنگ کے جرائم ، اکاؤنٹ ہیک کرنے، آن لائن دھوکہ دہی کے لیے بہروپیا بننے، ای بینکنگ کے ذریعے رقم نکالنے اور مختلف لوگوں کے شناختی کارڈ چوری کر کے انہیں آن لائن دھوکہ دہی کے جرائم میں استعمال کرنے کے الزامات ہیں۔

    پولیس تحقیقات کے مطابق گروہ نے امریکا اور یورپی ممالک سمیت متعدد ملکوں میں بڑے پیمانے پر لوگوں سے فراڈ کیا ہے۔

    مذکورہ گروہ کی گرفتاری کے لیے ایف بی آئی اور نائجیریا کے سراغرسانوں کے درمیان مقابلہ چل رہا تھا کہ کون اسے پہلے گرفتار کرے گا، تاہم دونوں ممالک کے سراغرساں پیچھے رہ گئے اور دبئی پولیس ہاشبوبی اور اس کے گروہ کو اپنی نوعیت کے منفرد آپریشن کے ذریعے گرفتار کرنے میں کامیاب ہوگئی۔

    گروہ کی گرفتاری میں 6 ٹیموں نے حصہ لیا، گرفتاری کے بعد بہت ساری اہم معلومات، قیمتی نوادر، خطرناک راز اور 150 ملین درہم برآمد کر کے ضبط کر لیے گئے، اندازہ لگایا گیا ہے کہ گروہ نے 1.6 ارب درہم اینٹھے جبکہ وہ 25 ملین درہم مالیت کی پرآسائش کاروں کے بھی مالک ہیں۔

    دبئی پولیس کے ڈائریکٹر جنرل عبد اللہ خلیفہ المری نے بتایا کہ ہاشبوبی کے علاوہ منی لانڈرنگ اور آن لائن جعلساز گروہ کے 10 افراد پکڑے گئے ہیں۔

    گروہ کے قبضے سے 12 کمپیوٹر، 47 اسمارٹ فون، 15 میموری کارڈ، 1 لاکھ 19 ہزار 580 دھوکہ دہی کی فائلوں، 19 لاکھ 26 ہزار 400 متاثرین کے پتوں پر مشتمل 5 ہارڈ ڈسک اور 13 پرآسائش کاریں بھی ضبط کی گئی ہیں۔

  • دبئی کا وہ مقام جہاں ہر وقت بارش ہوگی

    دبئی کا وہ مقام جہاں ہر وقت بارش ہوگی

    دبئی: متحدہ عرب امارات کے شہر دبئی میں ایسا مقام بنایا جارہا ہے جہاں ہر وقت بارش ہوتی رہے گی، اس مقامی کی تعمیر دبئی میں سیاحت کو فروغ دینے کے لیے شروع کیے جانے والے منصوبے کا حصہ ہے۔

    عرب میڈیا کے مطابق دبئی میں سخت موسم گرما کے دوران شہر کی آب و ہوا میں توازن پیدا کرنے کے لیے ایک ایسی گلی بنائی جا رہی ہے جہاں اس وقت بارش شروع ہوجائے گی جب درجہ حرارت 27 ڈگری سے تجاوز کر جائے گا۔

    یہ گلی دا ہارٹ آف یورپ میں قائم کی جائے گی جو کہ دبئی میں سیاحت کو فروغ دینے کے لیے شروع کیے جانے والے منصوبے کا حصہ ہے۔ دا ہارٹ آف یورپ کا پروجیکٹ دبئی کے ساحل سے چند کلو میٹر کے فاصلے پر دا ورلڈ آئی لینڈز نام کی جزیرہ نما جگہ میں ہوگا۔

    یہ گلی ایک کلو میٹر لمبی ہوگی اور اس میں یورپی طرز پر ریستوران اور دیگر دکانیں ہوں گی، جہاں چلتے ہوئے لوگوں پر ہلکی ہلکی بارش ہوتی رہے گی۔

    اس پروجیکٹ پر کام کرنے والے کلائن ڈینسٹ گروپ کا کہنا ہے کہ ریننگ اسٹریٹ سالوں کی تحقیق اور تجربے کے بعد بنائی جا رہی ہے جو کہ توقع ہے کہ اس سال تک مکمل ہو جائے گی۔

    کلائن ڈینسٹ گروپ کے مطابق جیسے ہی درجہ حرارت 27 ڈگری سے تجاوز کرے گا، گلی میں موجود عمارتوں میں سے چھپے ہوئے پائپز کے ذریعے بارش کی صورت میں ٹھنڈا پانی برسنے لگے گا۔

    یہ پروجیکٹ اپنی نوعیت کا پہلا منصوبہ نہیں ہے۔ یہ آسٹرین آرکیٹیکٹ کیمیلو سیتے کے کام سے متاثر ہو کر شروع کیا جا رہا ہے۔

  • امارات سے وطن واپسی کے خواہشمند غیر معتبر ذرائع سے ٹکٹ نہ خریدیں: پاکستانی قونصل جنرل

    امارات سے وطن واپسی کے خواہشمند غیر معتبر ذرائع سے ٹکٹ نہ خریدیں: پاکستانی قونصل جنرل

    دبئی: پاکستان کے قونصل جنرل احمد امجد علی نے کہا ہے کہ وطن واپسی کے خواہشمند پاکستانی صرف پی آئی اے کے کاؤنٹر سے ٹکٹ حاصل کریں اور غیر معتبر ذرائع سے ٹکٹ خریدنے سے پرہیز کریں۔

    دبئی میں پاکستانی قونصل جنرل احمد امجد علی نے اپنے ویڈیو پیغام میں کہا ہے کہ پاکستان انٹرنیشنل ایئر لائن (پی آئی اے) نے متحدہ عرب امارات میں موجود پاکستانیوں کی وطن واپسی کے لیے جو فلائٹس مختص کی ہیں ان کا ٹکٹ صرف پی آئی اے کاؤنٹر سے ہی حاصل کیا جائے۔

    قونصل جنرل نے کہا کہ پی آئی اے نے کراچی کے لیے اکانومی کلاس کا کرایہ 810 درہم، بزنس کلاس کے لیے 19 سو درہم، پشاور اور وفاقی دارالحکومت اسلام آباد سمیت پنجاب کے دیگر شہروں کے لیے اکانومی کلاس کا کرایہ 11 سو 20 درہم اور بزنس کلاس کے لیے 22 سو درہم رکھا ہے، اس رقم کے علاوہ مزید کوئی اضافی رقم نہ دی جائے۔

    انہوں نے کہا کہ ایسی شکایات آرہی ہیں کہ کچھ ایجنٹ اضافی پیسے وصول کر کے ٹکٹ فروخت کر رہے ہیںِ، ایسے افراد کو کوئی اضافی رقم نہ دی جائے۔

    قونصل جنرل کا کہنا تھا کہ کوئی بھی ایجنٹ دبئی یا شمالی امارات میں پی آئی اے کے ٹکٹ فروخت کرنے کا مجاز نہیں ہے چنانچہ کسی بھی شخص سے ٹکٹ نہ خریدیں۔

    ان کے مطابق ٹکٹ صرف پی آئی اے کاؤنٹر سے ایشو ہوگا، خود وہاں جائیں اور ٹکٹ خرید کر نقد یا کارڈ سے ادائیگی کریں۔ اس کے علاوہ نہ تو کسی شخص کو پیسے دیں اور نہ کسی کو رقم آن لائن ٹرانسفر کریں۔

    قونصل جنرل نے مزید کہا کہ کاؤنٹر پر بھی اگر کوئی شخص کہے کہ وہ ایمبسی یا قونصلیٹ کا نمائندہ ہے تو یاد رکھیں کہ ہماری طرف سے ایسا کوئی نمائندہ وہاں نہیں بھیجا گیا۔ اسی طرح اگر لائن میں آگے لگوانے کے لیے بھی کوئی شخص رقم کا تقاضا کرتا ہے اور آپ اس کو رقم دے دیتے ہیں تو نقصان کے ذمہ دار آپ خود ہوں گے۔

    انہوں نے اپیل کی کہ ایسے افراد کے بارے میں پولیس، پی آئی اے انتظامیہ یا قونصلیٹ عملے کو اطلاع کریں جو غیر ضروری طور پر رقم کا تقاضہ کر رہے ہیں۔

    خیال رہے کہ متحدہ عرب امارات سے وطن واپسی کے لیے اب تک 70 ہزار پاکستانی، دبئی میں پاکستانی قونصلیٹ میں اپنی رجسٹریشن کروا چکے ہیں۔

  • ایکسپو دبئی 2020 ایک برس کے لیے ملتوی کردی گئی

    ایکسپو دبئی 2020 ایک برس کے لیے ملتوی کردی گئی

    دبئی: ایکسپو دبئی 2020 ایک برس کے لیے ملتوی کر دی گئی، نمائش اب ایکسپو دبئی کے ہی نام سے اکتوبر 2021 میں ہوگی۔

    مقامی میڈیا کے مطابق ایکسپو کے التوا کا فیصلہ کرونا وائرس سے پیدا ہونے والی دشواریوں کی وجہ سے کیا گیا ہے، ایکسپو انٹرنیشنل نمائشوں کے بین الاقوامی ادارے کی جانب سے کہا گیا ہے کہ ایکسپو دبئی کے التوا کا فیصلہ دو تہائی اکثریت سے کیا گیا۔

    ادارے کے سیکریٹری جنرل دیمتری ایس کیر کینٹیس کا کہنا ہے کہ کرونا وبا کے باعث ایسا کیا گیا اور اسی وجہ سے ایکسپو ملتوی کرنے کا فیصلہ کیا گیا۔

    متحدہ عرب امارات نے مارچ تک ملتوی کرنے کی تجویز رکھی تھی، اب یہ نمائش ایکسپو دبئی کے ہی نام سے اکتوبر 2021 میں ہوگی۔

    نمائش کی ورکنگ کمیٹی کے رکن 12 ممالک نے جن کا انتخاب جنرل اسمبلی نے کیا تھا، ساری صورتحال کا جائزہ لیا۔ تمام رکن ممالک نے اس بات سے اتفاق کیا کہ ایکسپو کو وائرس کے پیش نظر ملتوی کیا جانا ضروری ہے۔

    ایکسپو دبئی 2020 پہلی بار مشرق وسطیٰ افریقہ اور جنوبی ایشیا کے علاقے میں منعقد ہوگی، یہ عرب دنیا میں اپنی نوعیت کا سب سے بڑا ایونٹ ہوگا جس میں 192 ممالک کے علاوہ بین الاقوامی کمپنیاں، تنظیمیں اور اکیڈمیز شریک ہوں گی۔

  • دبئی میں کل سے اقتصادی سرگرمیاں بحال کرنے کا اعلان

    دبئی میں کل سے اقتصادی سرگرمیاں بحال کرنے کا اعلان

    ابو ظہبی: متحدہ عرب امارات کے شہر دبئی میں کل سے اقتصادی سرگرمیاں بحال کرنے کی اجازت دے دی گئی، تمام سرگرمیوں کے دوران حفاظتی تدابیر کی پابندی لازمی ہوگی۔

    بین الاقوامی ویب سائٹ کے مطابق دبئی میں حکام نے بدھ 27 مئی سے اقتصادی سرگرمیاں بحال کرنے اور آزادانہ نقل و حرکت کی اجازت دینے کا فیصلہ کیا ہے، تجارتی ادارے روزانہ صبح 6 سے رات 11 بجے تک کھلے رہیں گے۔

    ولی عہد دبئی اور ایگزیکٹو کونسل کے سربراہ شیخ حمدان بن محمد بن راشد آل مکتوم نے عید الفطر کے چوتھے دن سے دبئی میں اقتصادی سرگرمیوں کی بحالی کا اعلان کیا ہے۔

    دبئی کے ولی عہد کا کہنا ہے کہ اقتصادی سرگرمیاں شروع کرنے کا فیصلہ امارات کے نائب صدر اور دبئی کے حاکم اعلیٰ شیخ محمد بن راشد آل مکتوم نے ملک میں قدرتی آفات اور بحرانوں کی اعلیٰ کمیٹی کے اجلاس کے دوران کیا ہے۔

    آن لائن اجلاس میں دبئی کے نائب سربراہ شیخ مکتوم بن محمد بن راشد آل مکتوم، بحرانوں کی اعلیٰ کمیٹی کے سربراہ شیخ منصور بن محمد بن راشد آل مکتوم اور کمیٹی کے ارکان شریک ہوئے۔

    شیخ حمدان بن محمد نے بتایا کہ اقتصادی سرگرمیوں کی بحالی کا فیصلہ ریاست کے تازہ حالات کی روشنی میں اقتصادی، سماجی اور صحت اثرات کا گہرائی سے جائزہ لے کر کیا گیا ہے۔

    ولی عہد دبئی نے تمام سرکاری اداروں کو ہدایت کی ہے کہ وہ مقامی شہریوں اور مقیم غیر ملکیوں سے 24 گھنٹے احتیاطی تدابیر پر عمل کروائیں، اس حوالے سے آگہی مہم پر خصوصی توجہ دیں۔

    شیخ حمدان نے مزید کہا کہ ہمیں احساس ہے کہ کرونا کی وبا کے باعث عالمی بحران نے تمام شعبوں کو متاثر کیا ہے تاہم امارات کا معاشرہ ہر چیلنج پر پورا اتر کر رہے گا۔

    انہوں نے اطمینان دلایا ہے کہ ملک میں کرونا کی وبا سے نمٹنے کے لیے تمام ممکنہ سہولتیں موجود ہیں، نجی ادارہ بھی تعاون کر رہا ہے۔ دبئی ورلڈ کمرشل سینٹر میں فیلڈ ہسپتال 3 ہزار بستروں پر مشتمل ہے۔

    شیخ حمدان نے تمام سرکاری محکموں اور قانون نافذ کرنے والے اداروں سے کہا ہے کہ وہ مختلف اقتصادی سرگرمیوں، بازاروں اور اداروں سے حفاظتی تدابیر کی پابندی کروائیں۔

  • دبئی: سیاحوں کے لیے خوشخبری

    دبئی: سیاحوں کے لیے خوشخبری

    دبئی: متحدہ عرب امارات کے شہر دبئی میں سمندر کنارے واقع ہوتلوں کو پرائیوٹ بیچز کھولنے کی اجازت دے دی گئی، اس دوران احتیاطی تدابیر کی سختی سے پابندی لازم ہے۔

    مقامی میڈیا کے مطابق دبئی میں ساحل سمندر پر واقع ہوٹلوں کو صرف مہمانوں کے لیے پرائیوٹ بیچ کھولنے کی اجازت دے دی گئی ہے، یہ اجازت ایسے وقت میں دی گئی ہے جب دبئی کرونا وائرس کے باعث لگائی گئی پابندیوں کو نرم کرنے پر غور کر رہا ہے۔

    دبئی میں سپریم کمیٹی آف کرائسس مینجمنٹ نے لوگوں کی نقل و حرکت پر پابندیاں ہٹانے کے لیے نئے اقدامات کیے ہیں جن میں عوامی پارکس کو کھولنا اور ہوٹلوں کے نجی ساحلوں (بیچ) کو کھولنا بھی شامل ہے۔

    تفریحی سرگرمیاں جیسے سائیکلنگ، واٹر اسپورٹس اور اسکائی ڈائیونگ کی بھی اجازت دے دی گئی، اس کے علاوہ دبئی فیری آپریشن، واٹر ٹیکسی، ابراس اور کار شیئرنگ سروس کی بھی واپسی ہو چکی ہے۔

    کمیٹی نے کہا ہے کہ ان اعلانات کے باوجود سخت حفاظتی اقدامات کو بھی لاگو کیا جائے گا جس میں سماجی فاصلہ قائم رکھنا اور پانچ سے زیادہ افراد کا جمع نہ ہونا شامل ہے۔

    دبئی ٹورازم اتھارٹی نے اس سے قبل ہوٹلوں کے لیے ایک ہدایت نامہ جاری کیا تھا جس میں دکانوں اور ریستوران میں پابندیوں اور صفائی ستھرائی کا خیال رکھنے کا کہا گیا۔

    تاہم سوئمنگ پولز، شاورز، سپاز اور پرائیویٹ ایونٹس پر ابھی بھی پابندی ہے اور ہوٹلوں کو ہدایت دی گئی ہے کہ وہ انہیں دوبارہ کھولنے سے پہلے ان کی مکمل سٹرلائزیشن کریں۔

  • کرونا وائرس: دبئی میں لوگوں کی مدد کے لیے دنیا کا بلند ترین چندہ باکس قائم

    کرونا وائرس: دبئی میں لوگوں کی مدد کے لیے دنیا کا بلند ترین چندہ باکس قائم

    دبئی: کرونا وائرس کی وبا کے دوران پریشان حال لوگوں کی مدد کے لیے دبئی میں دنیا کا بلند ترین چندہ باکس قائم کر لیا گیا ہے۔

    تفصیلات کے مطابق دنیا کی بلند ترین عمارت اب ضرورت مندوں کے لیے دی جانے والی امداد سے روشن ہوگی، دبئی کا برج خلیفہ دنیا کا بلند ترین ڈونیشن باکس بن گیا ہے۔

    اس سلسلے میں 12 لاکھ ایل ای ڈی لائٹوں پر مشتمل 828 میٹر بلند عمارت میں 10 درہم عطیہ کرنے پر ایک ایل ای ڈی بلب روشن کیا جائے گا، اب تک 1 لاکھ 80 ہزار لائٹیں روشن ہو چکی ہیں۔

    یہ غیر معمولی ڈونیشن باکس متحدہ عرب امارات نے قائم کیا ہے، جسے ہفتے کو محمد بن راشد المکتوم گلوبل انیشی ایٹو اور برج الخلیفہ کے اشتراک سے شروع کیا گیا، اس کا مقصد یو اے ای کی ’10 ملین کھانے’ کی مہم کے ساتھ تعاون ہے۔

    کرونا کا ممکنہ علاج دریافت، یو اے ای سربراہان کا عوام کے نام اہم پیغام

    لوگوں سے اس مہم میں ایک وقت کے کھانے کے لیے دس درہم کے عطیے کی اپیل کی گئی ہے، ایک عطیے پر برج الخلیفہ پر ایک لائٹ روشن کر دی جاتی ہے، اس طرح پوری عمارت روشن کی جائے گی۔ عمارت پر لگی لائٹیں نہ صرف انفرادی سطح پر بلکہ کمپنیاں بھی دس درہم پر خرید سکتی ہیں، اس رقم سے یو اے ای میں کرونا وبا کی وجہ سے کھانے سے محروم لوگوں کو خوراک فراہم کی جائے گی۔

    اس مہم کے تحت 12 لاکھ کھانوں کے پارسلز کا ہدف رکھا گیا ہے، جس کا مطلب ہے کہ اگر یہ ہدف پورا ہوتا ہے تو برج الخلیفہ پر 12 لاکھ لائٹیں روشن ہوں گی۔

    واضح رہے کہ اس طرح کے اقدامات امریکا اور ماسکو میں بھی کیے گئے ہیں، کرونا وبا کے خلاف جنگ لڑنے والے ہیروز کو سلام پیش کرنے نیویارک میں امپائر اسٹیٹ بلڈنگ اور ماسکو میں ٹی وی ٹاور کو روشنیوں سے جگمگایا گیا ہے۔

  • دبئی کی سیر کے خواہشمند افراد کے لیے خوشخبری

    دبئی کی سیر کے خواہشمند افراد کے لیے خوشخبری

    دبئی: دبئی کے حکام نے 24 اپریل سے دبئی میں آمد و رفت میں نرمی کا فیصلہ کرلیا ہے جس کے بعد سیاحوں کی آمد و رفت بھی جولائی سے متوقع ہے۔

    بین الاقوامی ویب سائٹ کے مطابق دبئی کے محکمہ سیاحت کے ڈائریکٹر جنرل ہلال سعید المری نے کہا ہے کہ آئندہ جولائی میں سیاحوں کے لیے دبئی کے دروازے کھول دیے جائیں گے۔

    المری نے ایک انٹرویو کے دوران کہا کہ غالب گمان یہ ہے کہ سیاحوں کے لیے دبئی کے دروازے ترجیحی طور پر کھولے جائیں گے۔

    انہوں نے کہا کہ اگر صورتحال زیادہ خراب رہی تو سیاحت کی بحالی جولائی کے بجائے ستمبر تک بھی ملتوی کی جاسکتی ہے، حتمی فیصلہ عالمی حالات کو دیکھ کر کیا جائے گا۔

    خیال رہے کہ دبئی میں قدرتی آفات و بحران کے نگراں ہائی کمیشن نے 24 اپریل سے دبئی میں آمد و رفت میں نرمی کا فیصلہ کرلیا ہے۔

    دبئی محکمہ سیاحت نے 2019 میں 5.1 فیصد شرح نمو کا ریکارڈ بنایا تھا، گزشتہ برس 16.73 ملین عالمی سیاح دبئی آئے۔

    المری نے مزید کہا کہ متعدد ممالک میں ابھی تک مکمل لاک ڈاؤن چل رہا ہے اور معاشی و سماجی سرگرمیوں کی بحالی کی تاریخوں پر بحث مباحثہ چل رہا ہے۔

    یاد رہے کہ متحدہ عرب امارات میں اب تک کرونا وائرس کے 11 ہزار 929 کیسز سامنے آچکے ہیں، جبکہ 98 اموات ہوچکی ہیں۔

  • دبئی میں شہریوں کے لیے حفاظتی اقدامات کا اعلان

    دبئی میں شہریوں کے لیے حفاظتی اقدامات کا اعلان

    دبئی: دبئی کے حکام نے رمضان المبارک کے دوران حفاظتی اقدامات کا اعلان کیا ہے اور شہریوں کو ان کی پابندی کرنے کی ہدایت کی ہے۔

    بین الاقوامی ویب سائٹ کے مطابق دبئی حکام نے رمضان المبارک کے دوران مقامی شہریوں اور مقیم غیر ملکیوں کو کرونا وائرس سے بچانے کے لیے حفاظتی اقدامات کا اعلان کیا ہے۔

    دبئی حکام اپنے یہاں اقتصادی سرگرمیاں بحال کرنے والے اقدامات کر رہے ہیں، اسی کے ساتھ ریاست کے تمام متعلقہ اداروں کے تعاون و اشتراک سے حفاظتی اقدامات کی سختی سے پابندی کروا رہے ہیں۔

    دبئی حکام نے جن حفاظتی اقدامات کا اعلان کیا ہے وہ یہ ہیں۔

    نجی مقامات پر 10 سے زیادہ افراد کے اجتماع پر پابندی، شادی ہو یا جنازہ ہر حال میں سماجی دوری کا اصول لاگو کیا جائے گا۔ مصافحے اور گلے ملنے کی اجازت نہیں ہوگی۔

    کسی بھی تقریب میں خاندان کے افراد کے سوا باہر کے لوگوں کو بلانے کی اجازت نہیں ہوگی۔

    کھانا تقسیم کرنے کی اجازت نہیں ہوگی، گھر والوں کے سوا کسی کو بھی کھانا عطیہ کرنے یا براہ راست پیش کرنے پر پابندی برقرار رہے گی۔ کھانا تقسیم کرنے کا کام صرف فلاحی انجمنوں اور سرکاری اداروں تک محدود رہے گا۔

    رمضان المبارک کے دوران ایک خاندان کے افراد اگر مختلف مکانات میں رہ رہے ہوں گے تو انہیں بھی ایک دوسرے کو افطار بھیجنے کی اجازت نہیں ہوگی، یہ پابندی وائرس کو پھیلنے سے روکنے کی وجہ سے لگائی جارہی ہے۔

    اگر کسی شہری یا مقیم غیر ملکی نے خاندان کے کسی فرد یا دوست سے کھانے کی کوئی چیز وصول کرلی تو اسے انتہائی احتیاط کے ساتھ گھر کے کچرے کے ڈبے کے حوالے کرنا ہوگا۔

    وائرس کے خطرات سے بہت زیادہ متاثر ہونے والوں سے ملاقات پر پابندی لگائی گئی ہے جیسے بوڑھے اور لاعلاج امراض میں مبتلا افراد۔

    گھریلو عملے کو پارسل وصول کرنے کے حوالے سے حفظان صحت کے ضوابط کی پابندی کی تاکید کی جائے، انہیں کہا جائے کہ وہ پیکٹ یا کھانے کا ڈبہ سینی ٹائز کر کے وصول کریں اور دستانوں کا استعمال کریں۔

    گھر سے انتہائی ضرورت کے تحت ہی باہر نکلا جائے، رشتہ داروں سے ملاقاتوں کا سلسلہ محدود رکھا جائے، ملنے پر حفاظتی تدابیر کا خیال رکھا جائے۔ گھر سے باہر کسی بھی چیز کو چھونے سے پرہیز کیا جائے۔

    پبلک یا پرائیویٹ ٹرانسپورٹ استعمال کرتے وقت ماسک استعمال کیا جائے، سفر کی حالت میں بار بار سینی ٹائزنگ کا اہتمام کیا جائے۔

    کرونا وائرس کی علامتیں نمودار ہونے والے شخص کو فوری الگ تھلگ کر دیا جائے، دبئی محکمہ صحت سے ہاٹ لائن پر رابطہ کر کے مطلع کیا جائے، گھر کے تمام افراد خصوصاً بوڑھے اور کمزور قوت مزاحمت والے افراد مریض سے فاصلہ رکھیں۔

  • دبئی اور ابو ظہبی میں پبلک ٹرانسپورٹ کی جزوی بحالی کا فیصلہ

    دبئی اور ابو ظہبی میں پبلک ٹرانسپورٹ کی جزوی بحالی کا فیصلہ

    ابو ظہبی: دبئی اور ابو ظہبی میں پبلک ٹرانسپورٹ جزوی طور پر بحال کرنے کا فیصلہ کرلیا گیا ہے، پبلک ٹرانسپورٹ دن میں 12 گھنٹے فعال رہے گی۔

    بین الاقوامی خبر رساں ادارے کے مطابق ابو ظہبی محکمہ بلدیات و ٹرانسپورٹ نے کہا ہے کہ شہر میں پبلک ٹرانسپورٹ ہفتے کے روز سے بحال کی جائے گی۔

    محکمے کا کہنا ہے کہ جمعرات سے 48 گھنٹے تک پبلک ٹرانسپورٹ میں استعمال کی جانے والی تمام بسوں کی صفائی ہوگی اور جراثیم کش ادویات کا استعمال ہوگا۔

    پبلک ٹرانسپورٹ کی بحالی کے ساتھ مسافروں کی سلامتی کے لیے سخت حفاظتی انتظامات پر عمل جاری رہے گا، شہر بھر میں جراثیم کش ادویات کا استعمال جاری رہے گا جبکہ تمام بسوں، ٹیکسیوں اور پبلک ٹرانسپورٹ کے ذرائع کی روزانہ کی بنیاد پر سینی ٹائزنگ ہوگی۔

    محکمہ ٹرانسپورٹ کا کہنا ہے کہ تمام مسافر دوران سفر ایک دوسرے سے ضروری فاصلہ رکھنے کے پابند ہوں گے اور ماسک اور دستانوں کے علاوہ سینی ٹائزر استعمال کریں گے۔

    دوسری طرف دبئی حکومت نے بھی میٹرو اور بس سروس جزوی طور پر بحال کرنے کا فیصلہ کیا ہے، شہر میں پبلک ٹرانسپورٹ دن میں صرف 12 گھنٹے کے لیے کام کرے گی۔

    مقامی حکام کا کہنا ہے کہ جزوی بحالی کے ساتھ حفاظتی انتظامات پر عمل جاری رہے گا، سماجی فاصلہ برقرار رکھنے کے علاوہ مسافروں کو ماسک بھی پہننا ہوں گے۔

    حکام کا مزید کہنا ہے کہ میٹرو دبئی صبح 7 بجے سے شام 7 بجے تک چلے گی, یہ تجربہ ایک ہفتہ تک جاری رہے گا، اس کے بعد اس فیصلے کا جائزہ لیا جائے گا۔