دبئی : پاکستان سپر لیگ کے تیسرے مرحلے کے میچ میں کراچی کنگز کی ٹیم آج کوئٹہ گلیڈی ایٹرز سے ٹکرائے گی, یہ اہم میچ پاکستانی وقت کے مطابق رات نو بجے شروع ہوگا.
تفصیلات کے مطابق کراچی کنگز اورکوئٹہ گلیڈی ایٹرز کی ٹیمیں دوسری بار دبئی میں آج مدمقابل ہوں گی۔ کراچی کنگز کے پاس ہار کا بدلہ لینے کا بہترین موقع ہے۔
کراچی کنگز کی گاڑی جیت کے ٹریک پرآگئی ہے۔ کوئٹہ گلیڈی ایٹرز کی فتح اسے پلے آف مرحلے میں پہنچا سکتی ہے جبکہ کراچی کنگز کے شیروں نے بھرپور کم بیک کرتے ہوئے مسلسل دو میچز جیت کرکوئٹہ کیلئے خطرے کی گھنٹی بجادی ہے۔
سرفرازالیون سات پوائنٹس کے ساتھ لیگ میں سرفہرست ہے۔ کراچی کنگز کے پانچ میچ کھیل کر سب سے کم چار پوائنٹس ہیں۔
کوئٹہ کی ٹیم بیٹنگ پر انحصار کرے گی۔ کراچی کنگز کے باؤلرز کو ڈینجر مین کیون پیٹرسن، سرفراز احمد اور رلی روسو کا روکنا ہوگا۔
بیٹنگ میں سب کو کرس گیل کے چلنے کا انتظار ہے۔ دونوں ٹیمیں ایونٹ میں اپنا چھٹا میچ کھیلیں گی۔ کوئٹہ جیت گیا تو اگلے راؤنڈ میں پہنچ جائے گا۔ کراچی کامیابی حاصل کرکے اپنی پوزیشن بہتر بنائے گا۔
کراچی : پاکستان سے سمندر کے راستے سبزیوں کی پہلی کھیپ دبئی روانہ کر دی گئی، کھیپ چار روز میں دبئی پہنچے گی۔
آل پاکستان فروٹ اینڈ ویجیٹیبل ایکسپورٹر امپورٹرز اینڈ مرچنٹس ایسوسی ایشن نے یو ایس ایڈ کے فنڈڈ پراجیکٹ ایگری کلچر مارکیٹ ڈیولپمنٹ کے تعاون سے ٹماٹر، بیگن، کھیرا،گاجر، مرچ، اروی، لوکی اور بھنڈی پر مشتمل سات ٹن کی پہلی کھیپ سمندر کے راستے دبئی بھیجی ہے۔
اس تحقیقی پراجیکٹ سے پاکستان دبئی، مڈل ایسٹ اور خلیجی ملکوں کو سمندر کے راستے سبزیاں برآمد کرسکے گا، جس میں ایئرفریٹ کی مقابلے میں پچھتر روپے کلو تک کی بچت ہوگی۔
فضائی راستے سے سبزیاں 80روپے کلو فریٹ پر ایکسپورٹ کی جاتی ہیں، سمندری راستے سے برآمد پر پانچ سے چھ روپے فی کلو کی لاگت آئیگی، جس سے سبزیوں کی برآمدات میں ایک ہزار فیصد اضافہ ہوگا۔
وحید احمد کے مطابق سمندری راستے سے سبزیوں کی برآمد کا آغاز پاکستان سے سبزیوں کی برآمدات میں ایک ہزار فیصد اضافے کا سبب بنے گا دبئی کے بعد مڈل ایسٹ اور خلیجی ملکوں سمیت سعودی عرب کو بھی تازہ سبزیاں ایکسپورٹ کی جائیں گی جس سے ملک کو کثیر زرمبادلہ حاصل ہوگا ساتھ ہی ان ملکوں میں پاکستان کو بھارت سمیت دیگر تجارتی حریف ملکوں سے درپیش مسابقت میں بھی آسانی ہوگی۔ذ
دبئی : دبئی کو عجوبوں کی سرزمین کہا جائے تو بے جا نہ ہوگا،اب وہاں ایسی عمارت بن رہی ہے کو خود تو گھومے گی اور دیکھنے والوں کو چکرانے پر مجبور کردے گی۔
دبئی تجارتی و تفریحی سرگرمیوں میں دنیا بھر کے شہروں میں اہمیت کا حامل ہیں، یہاں سارا سال سیاحوں کی بڑی تعداد آتی ہیں، جس کے باعث دبئی میں نہ صرف جدید ترین سہولیات دستیاب ہیں بلکہ انوکھی عمارتیں بھی تعمیر کی جا رہی ہیں۔
دبئی میں دنیا کی بلندترین عمارتوں اور دنیا کے سب سے بڑے تھیم پارک کے بعد ایک اور شاہکار عمارت تعمیر کی جارہی ہے، جو تین سو ساٹھ ڈگری پر مسلمل گھومتی رہے گی اور اپنا رخ بدل سکیں گی۔
دی ڈائنامک ٹاور نامی یہ عمارت اسی منزلوں پر مشتمل ہوگی، اس کا ماڈل اسرائیلی اطالوی ڈیزائنر ڈایوڈ فشر نے دوہزار آٹھ میں پیش کیا تھا۔
اس رہائشی عمارت میں بننے والے ایک اپارٹمنٹ پر تیس ملین امریکی ڈالر لاگت آئے گی جبکہ منصوبہ 2020 میں مکمل ہوگا۔
دبئی : نجم سیٹھی نے کہا ہے کہ پی ایس ایل کا فائنل ہر صورت لاہورمیں ہی ہوگا، غیرملکی کھلاڑی نہ بھی آئے تو اس سے کوئی فرق نہیں پڑے گا۔
تفصیلات کے مطابق پی ایس ایل کے چیئرمین نجم سیٹھی نے اس عزم کا اظہار کیا ہے کہ پی ایس ایل کا فائنل ہر صورت لاہورمیں ہی کھیلا جائے گا، یہ بات انہوں نے دبئی سے جاری ایک بیان میں کہی۔
ان کا کہنا تھا کہ غیر ملکی کھلاڑی اگر پاکستان نہ آنا چاہیں تو اس سے کوئی فرق نہیں پڑے گا ، لاہور میں ہونے والے فائنل میچ میں غیر ملکی کھلاڑی نہ بھی آئے توفائنل تمام پاکستانی کھلاڑی کھیلیں گے۔
یاد رہے کہ آج لاہور میں مال روڈ پر ہونے والے خود کش دھماکے کے بعد مختلف حلقوں میں یہ بات گردش کر رہی تھی کہ شاید دہشت گردی کے باعث پی ایس ایل کا فائنل لاہورمیں منعقد نہ ہوسکے لیکن چیئرمین پی ایس ایل نے ان تمام شکوک و شبہات کو ختم کردیا۔
دبئی : پاکستان سپر لیگ میں اسپاٹ فکسنگ کا انکشاف ہوا ہے، پی سی بی نے اسلام آباد یوئانیٹڈ کے دو کھلاڑیوں شرجیل خان اور خالد لطیف کو معطل کرتے ہوئے ایونٹ سے باہر کردیا، کھلاڑیوں نے اعتراف جرم کرلیا اور دبئی سے کراچی واپس پہنچ گئے۔
تفصیلات کے مطابق پاکستان سپرلیگ میں اسپاٹ فکسنگ کا انکشاف ہوا ہے جس سے لیگ کو زبردست دھچکا لگا ہے تاہم پی سی بی کے باخبر رہنے کی وجہ سے پی ایس ایل میں کرپشن نہ ہوسکی، پاکستان کرکٹ بورڈ اور آئی سی سی نے مشترکہ کارروائی کرتے ہوئے شرجیل خان اورخالد لطیف کو اسپاٹ فکسنگ میں ملوث قرار دیتے ہوئے انہیں معطل کرکے وطن واپس روانہ کردیا۔
تازہ ترین اطلاعات کے مطابق دونوں کھلاڑی وطن واپس پہنچ گئے، شرجیل خان اور خالد لطیف پرواز ای کے602 سے کراچی پہنچے۔
اینٹی کرپشن کوڈ کی خلاف ورزی کا الزام میں پاکستان کرکٹ بورڈ نے دونوں کھلاڑیوں کے خلاف تحقیقات شروع کردی ہیں۔
اے آر وائی نیوز کے نمائندہ شاہد ہاشمی نے بتایا ہے کہ یہ پہلا موقع ہے کہ پی ایس ایل میں اسپاٹ فکسنگ کا معاملہ سامنے آیا ہے جس کے بعد پی سی بی نے فوری کارروائی کرتے ہوئے دونوں کھلاڑیوں کو معطل کرکے وطن واپس بھیج دیا اور مزید تحقیقات شروع کردیں۔
انہوں نے کہا کہ سیکیورٹی آفیشلرز اور اینٹی کرپشن یونٹ نے فوری کارروائی کرتے ہوئے نہ صرف تحقیقات کیں بلکہ دونوں کھلاڑیوں سمیت اس پوری سینڈیکیٹ کو پکڑا جس کا کھلاڑیوں سے رابطہ تھا۔
ان کا کہنا تھا کہ پاکستان کی کرکٹ ایسے واقعات سے پہلے ہی متاثر ہے اور اب یہ جو خبر سامنے آئی ہے یہ بہت بڑی خبر ہے جس سے پی ایس ایل متاثر ہوگی تاہم ساتھ ہی ساتھ پی سی بی کا اقدام بھی قابل تعریف ہے کہ انہوں نے فوری کارروائی ہوئی۔
شاہد ہاشمی نے مزید بتایا کہ دونوں کھلاڑیوں کو سزا ملے گی، ان کا کیریئر متاثر ہوسکتا ہے، تحقیقات میں اگر الزامات ثابت ہوگئے تو انہیں بڑی پابندی کا سامنا ہوسکتا ہے۔
دوسری جانب لاہور سے نمائندہ اے آروائی نیوز شہزاد ملک نے بتایا ہے کہ چیئرمین پی سی بی شہریار خان اورنجم سیٹھی کے رد عمل سامنے آرہے ہیں جہنوں نے شفافیت پر زور دیا ہے، دونوں کھلاڑیوں کے خلاف آئی سی سی اور اے سی یو کی جانب سے تحقیقات جاری ہیں۔
پی سی بی کمنٹ نہیں کرسکتا۔ رپورٹر نے مزید بتایا کہ دونوں کھلاڑیوں کے سٹے بازوں سے روابط سامنے آئے ہیں۔ اینٹی کرپشن یونٹ نے پی سی بی حکام کو یہ بات رپورٹ کرائی جس کے بعد انہیں معطل کیا گیا۔
اب دونوں کھلاڑیوں کو کوڈ آف کنڈکٹ کی خلاف وزری پر پاکستان کرکٹ ٹیم سے بھی معطل کیا جائےگا، جب تک تحقیقات مکمل نہیں ہوتیں دونوں کھلاڑی کسی بھی فارمیٹ کے انٹرنیشنل کھیل کے لیے دستیاب نہیں ہوں گے۔
شہزاد ملک نے بتایا کہ پی سی بی نے کہا ہے کہ تحقیقات مکمل ہونے تک اس معاملے پر مزید کوئی بات نہیں کی جائے گی۔
یاد رہے کہ شرجیل خان اور خالد لطیف پی ایس ایل ایڈیشن ٹو میں اسلام آباد یونائیٹڈ کی نمائندگی کررہے ہیں۔ پی سی بی کے مطابق تحقیقات مکمل ہونے تک دونوں کھلاڑی پی ایس ایل ٹو میں شرکت نہیں کرسکیں گے۔
PSL has zero tolerance for practices that corrupt or damage the game. No one big or small is exempt. We shall protect this asset of Pak.
مصدقہ ذرائع کا کہنا ہے کہ دونوں کھلاڑیوں نے میچ کے بعد ایک مشکوک شخص سےملاقات کی، شرجیل خان اور خالد لطیف کی مشکوک شخص سے ملاقات کے ویڈیو کلپس بطورثبوت موجود ہیں، دونوں کھلاڑیوں کی ملاقاتیں پبلک مقامات پر ہوئیں۔
نجم سیٹھی کے کرپشن کے خلاف نوکمپرومائز نے بھارتی لابی کو چپ کرادیا، تحقیقات میں شرجیل خان اورخالد لطیف نے ملاقات کا اعتراف کرلیا ہے۔
دونوں کھلاڑیوں کو عبوری طور پر معطل کر کے وطن واپس بھیجا گیا، ذرائع کے مطابق دونوں کھلاڑی اسپاٹ فکسنگ میں ملوث ہوئے تو ان کا انٹرنیشنل کیریئر بھی داؤ پر لگ جائے گا۔
اطلاع ہمارے اینٹی کرپشن یونٹ نے دی، نجم سیٹھی
اس حوالے سے چیئرمین پی ایس ایل نجم سیٹھی نے اے آر وائی سے خصوصی گفتگو کرتے ہوئے کہا ہے کہ کسی بھی کرپشن کےخلاف ہماری زیرو ٹالرنس پالیسی ہے، ہمارے یونٹ نے اطلاع دی تھی جس پر کارروائی کی گئی، اب بھی کوئی شک یا کوئی ثبوت ملا تو ایسا ایکشن پھر لیا جائے گا۔
خالد لطیف کی وجہ سے راشد لطیف کی ساکھ خراب ہوگی، باسط علی
سابق کرکٹر باسط علی نے اے آر وائی سے گفتگو میں کہا کہ پی سی بی نے دونوں کھلاڑیوں کو معطل کرکےاچھا اقدام کیا ہے۔ اگر آپ کرکٹ کے نقطہ نظر سے دیکھیں تو یہ خوش آئند بات ہے کہ پی سی بی نے انڈین کرکٹ بورڈ کی طرح نہیں کیا بلکہ اپنے پلیئرزکے خلاف کارروائی کی ہے جو آئندہ آنے والے کرکٹرز کے لیے مثال اور مقام عبرت ہوگی۔
اینکر کے ایک سوال پر ان کا کہنا تھا کہ غیر ملکی میڈیا اس بات کو منفی طور پر اچھالے گا لیکن پی سی بی کے لیے یہ اچھا ہوا کہ جرم پکڑا گیا۔
انہوں نے کہا کہ خالد لطیف کا نام سن کر حیرانی ہوئی، خالد لطیف راشد لطیف کے بہت قریب ہیں اس سے راشد لطیف کی ساکھ خراب ہوگی۔
باسط علی نے کہا کہ اسپاٹ فکسنگ کے معاملات سامنے آنے کے بعد لاہورکے ہارنے پربھی انگلیاں اٹھ سکتی ہیں، گزشتہ روز کھیلے جانے والے میچ کا نتیجہ بھی مشکوک ہوگیا ہے کیوں کہ عوام کہتی ہے میچ فکس کرکے ہارے ہوں گے۔
ایک سوال کے جواب میں انہوں نے کہا کہ دونوں کھلاڑیوں پر تاحیات پابندی تو نہیں لگ سکتی تاہم کئی سال کی پابندی عائد کی جاسکتی ہے۔
شرجیل کے گھر کے باہر لوگوں کا رش لگ گیا
خبر سنتے ہی حیدر آباد کے علاقے لطیف آباد میں شرجیل خان کے گھر کے باہر لوگوں کی بڑی تعداد جمع ہوگئی جن کا کہنا تھا کہ شرجیل اسپاٹ فکسنگ میں ملوث نہیں ہوسکتا۔
نمائندہ اے آر وائی کے مطابق آفتاب زئی کے مطابق شرجیل خان کے مداحوں نے کہا کہ تحقیقات ہونے تک اور جرم ثابت ہونے تک انہیں پی ایس ایل میں کھیلنا چاہیے، ان کے ساتھ فراڈ ہوا وہ ایسے کھلاڑی نہیں، ان کے خلاف پروپیگنڈا ہورہا ہے، وہ ایک اچھے بیٹسمین ہیں، یہ شرجیل کے خلاف سازش ہے۔
دریں اثنا دونوں معطل کھلاڑی دبئی سے کراچی ایئرپورٹ پہنچ گئےجو اسپاٹ فکسنگ کی تحقیقات مکمل ہونے تک کسی بھی میچ میں حصہ نہیں لے سکیں گے۔
اے آر وائی نیوز کے نمائندے شاہد ہاشمی نے بتایا کہ شرجیل دوران پرواز روتے رہے۔
دبئی: انتظار کی گھڑیاں ختم ہونے کے ساتھ ہی پاکستان سپر لیگ کی افتتاحی تقریب کا آغاز قومی ترانے کے ساتھ کردیا گیا، اسٹیڈیم میں موجود ہزاروں لوگ افتتاحی تقریب کا حصہ بننے اور خوب لطف اندوز ہوئے۔
تفصیلات کے مطابق پاکستان سپر لیگ کی افتتاحی تقریب دبئی اسٹیڈیم میں منعقد کی گئی، تقریب کا آغاز پاکستان کے قومی ترانے کے ساتھ کیا گیا، اسٹیڈیم میں موجود لوگوں ترانے کے احترام میں کھڑے ہوئے۔
اس موقع پر پاکستان کی چاروں صوبوں کی ثقافت کو روشناس کروانے اور اُن کی اہمیت اجاگر کرنے کے لیے خصوصی پرفارمنس پیش کی گئیں جبکہ مرحوم جنید جمشید کے نغمے دل دل پاکستان کے آتے ہی لوگ جذبات پر قابو نہ رکھ سکے۔
چیئرمین پاکستان کرکٹ بورڈ شہریار خان نے خطاب کرتے ہوئے کہا کہ ’’افتتاحی تقریب میں لوگوں کی اتنی بڑی تعداد دیکھ کر بہت خوشی ہورہی ہے، پی ایس ایل کا فائنل لاہور میں ہوگا اور ہم دنیا کو یہ ثابت کریں گے کہ پاکستان دنیا کا محفوظ ترین ملک ہے۔
چیئرمین پی ایس ایل نجم سیٹھی نے کہا کہ آج پاکستان کی آواز پوری دنیا میں دیکھی اور سنی جارہی ہے، شائقین کی حوصلہ افزائی پر اُن کے شکر گزار ہیں دبئی حکومت نے ہماری میزبانی کی اس پر اُن کے بھی شکر گزار ہیں۔
نجم سیٹھی نے کہا کہ اس بار پی ایس ایل میں پہلے سے زیادہ بڑے اسٹارز شامل ہیں اور ہم لاہور میں فائنل کا انعقاد کر کے دنیا کو یہ پیغام دیں گے کہ پاکستان پرامن ملک ہے اور یہاں کے لوگ کھلاڑیوں سے بہت پیار کرتے ہیں۔
پاکستانی گلوکار شہزاد رائے نے پی ایس ایل کا آفیشل گانا ’’بلے بلے پیش کر کے حاضرین سے خوب داد وصول کی، علی ظفر اور شیگی نے بھی اپنے فن کا مظاہرہ کر کے لوگوں کو خوب انجوائے کروایا۔
افتتاحی تقریب میں شاندار آتش بازی کی گئی جس کے باعث آسمان پر روشنی بکھر گئی۔
واضح رہے کہ گزشتہ روز دبئی میں پریس کانفرنس کرتے ہوئے نجم سیٹھی نے کہا تھا کہ پی ایس ایل کا دوسرا ایڈیشن پہلے سے زیادہ شاندارہوگا، ایونٹ کی تقریب انتہائی شاندار ہوگی ،آتش بازی کے شاندار مظاہرے سمیت چاروں صوبوں کی ثقافت پیش کی جائے گی، پاکستانی کہیں بھی ہوں، پی ایس ایل ان کے لیے خوشی کا موقع ہے۔
یاد رہے کہ پی ایس ایل دبئی اور شارجہ میں 25 دن تک جاری رہے گی جس میں 24 میچز کھیلے جائیں گے، ان میں دبئی 13 اور شارجہ 10 میچوں کی میزبانی کرے گا۔
پی ایس ایل کے ایمبسڈر رمیز راجہ نے کہا تھا کہ پی ایس ایل میں سنسنی خیز مقابلے متوقع ہیں، غیرملکی پلیئرز کی لیگ میں شرکت باعث مسرت ہے، اس بار لیگ کی مقبولیت دیکھتے ہوئے نئی چیزیں متعارف کرائی گئی ہیں۔
یاد رہے کہ پاکستان کرکٹ بورڈ نے اس بار فائنل لاہور میں کرانے کا اعلان کر رکھا ہے۔ فیڈریشن آف انٹرنیشنل کرکٹرز ایسوسی ایشن ( فیکا) نے بین الاقوامی کرکٹرز کو متنبہ کیا تھا کہ وہ فائنل کے لیے لاہور جانے سے گریز کریں تاہم پاکستان کرکٹ بورڈ نے یقین دلایا ہے کہ تمام کھلاڑیوں اورآفیشلز کی سکیورٹی کو یقینی بنانے کے لیے ہر ممکن اقدامات کیے گئے ہیں۔
دبئی : پاکستان سپرلیگ کا انتظار ختم ہونے کو ہے، پی ایس ایل کا رنگا رنگ میلہ صرف ایک دن کی دوری پر ہے۔ میگا ایونٹ کی افتتاحی تقریب 9 فروری کو دبئی میں ہو گی، پی ایس ایل ٹو کا پہلا میچ 9 فروری کو اسلام آباد یونائیٹڈ اور پشاورزلمی کے درمیان کھیلا جائے گا۔
تفصیلات کے مطابق پاکستان سپرلیگ کا میلہ سجنے میں صرف ایک دن باقی رہ گیا یو اے ای کے صحرا میں چوکوں اور چھکوں کی بارش ہوگی۔ کرس گیل، کیرون پولارڈ سمیت دنیا کے بہترین کرکٹرز ایک جگہ ہوں گے۔
پاکستان سپرلیگ کے ایڈیشن ٹو کی جوش، جنون اور ایکشن سے بھرپور رنگا رنگ افتتاحی تقریب نو فروری کو دبئی میں ہوگی۔ عالمی شہرت یافتہ ریپر شہگی اورعلی ظفر اپنی آواز کا جادو جگائیں گے۔ افتتاحی تقریب کے بعد پہلا میچ دفاعی چیمپیئن اسلام آباد یونائیٹڈ اور پشاور زلمی کےدرمیان کھیلاجائے گا۔
یاد رہے کہ پی ایس ایل کی ٹرافی کی تقریب رونمائی کردی گئی، اس موقع پر بہترین بیٹسمین، بولر اور وکٹ کیپر کے لیے بھی ایوارڈز کا اعلان کیا گیا۔
اعلامیہ کے مطابق ایونٹ میں زیادہ وکٹیں لینے والے بولر کو فضل محمود ٹرافی ملے گی، بہترین بیٹسمین کو حنیف محمد ٹرافی دی جائے گی جبکہ ٹورنامنٹ کے بہترین وکٹ کیپر کا ایوارڈ امتیاز احمد کے نام سے منسوب کر دیا گیا ہے۔
دبئی : پاکستان سپر لیگ کے دوسرے ایڈیشن کی ٹرافی کی تقریب رونمائی آج دبئی میں ہوگی، لیگ کے آغاز میں اب صرف تین دن باقی رہ گئے ہیں۔
پاکستان سپر لیگ کے دوسرے ایڈیشن کی ٹرافی کی نقاب کشائی دبئی انٹرنیشنل کرکٹ اسٹیڈیم میں آج ہوگی، تقریب میں پانچوں ٹیموں کے کپتان اور پی ایس ایل گورننگ کونسل کے سربراہ نجم سیٹھی موجود ہوں گے۔
ٹرافی کی تیاری میں پچاس ہزار کرسٹلز استعمال کئے گئے ہیں اور اسے اسپرٹ ٹرافی کا نام دیا گیا۔
پاکستان سپر لیگ کی چاروں ٹیموں کے کپتان تقریب رورنمائی میں شرکت کریں گے۔
اسلام آباد یونائیٹڈ کی ٹیم ٹائٹل کا دفاع کرے گی جبکہ نو فروری کو افتتاحی تقریب ہوگی، جس کے بعد دھن دھنا دھن ہوگا، افتتاحی میچ پشاور زلمی اور اسلام آباد یونائیٹڈ کے درمیان رات 9 بجے ہوگا۔
گزشتہ روز کراچی کنگز کے بیٹسمین بابر اعظم نے دبئی راونگی سے قبل کراچی ائیرپورٹ پر نمائندہ اے آر وائی علی حسن کو خصوصی انٹرویو دیتے ہوئے کہا کہ ہماری ٹیم پی ایس ایل کی سب سے مضبوط ٹیم ہے کیونکہ اس میں تجربہ کار کھلاڑی شامل ہیں، دوسرے ایڈیشن میں کراچی کنگز نے موقع دیا ہے تو میں بھی مداحوں کی امید پر پورا اترنے کی کوشش کروں گا۔
انھوں نے کہا کہ پہلے ایڈیشن میں ان فٹ ہونے کے باعث اچھی کارکردگی نہیں رہی مگر کراچی کنگز نے موقع دیا تو اپنی پرفارمنس سے اچھے نتائج دینے کی کوشش کروں گا۔
دبئی : سابق صدر پرویز مشرف نے دبئی میں سیاسی ملاقاتیں شروع کردیں، مسلم لیگ ق کے رہنماؤں چوہدری شجاعت حسین اور مونس الہٰی نے سابق صدر پرویز مشرف سے ملاقات کی، انہوں نے دبئی میں موجود پیر پگارا سے بھی رابطہ کیا.
تفصیلات کے مطابق سابق صدر پرویز مشرف کے سیاسی رابطوں میں تیزی آ گئی ہے۔ پرویز مشرف سے ان کی رہائش گاہ پر چودھری شجاعت حسین اور پرویزالہٰی کے صاحبزادے مونس الہٰی نے ملاقات کی.
ملاقات میں ملک کی موجودہ سیاسی صورتحال پرغور خوص کیا گیا، ذرائع کے مطابق اپوزیشن کومتحد کرنے اورپاناما لیکس پر حکومت پردباؤ بڑھانے پر بھی بات چیت ہو ئی۔
ذرائع کا کہنا ہے سابق صدر پرویزمشرف نے مسلم لیگ فنکشنل کے سربراہ پیر پگارا سے بھی ٹیلیفونک رابطہ کیا جو ان دنوں دبئی میں ہیں۔ دونوں رہنماؤں کے درمیان جلد ملاقات بھی متوقع ہے۔
دبئی: پاکستان سپر لیگ کے دوسرے ایڈیشن کی تیاریاں عروج پر پہنچ گئیں,انتظامیہ نے ایونٹ کی کمنٹری کے لیے ناموں کا اعلان کردیا، رمیز راجہ، بازید خان ،ای این بشپ، ڈینی موریسن، الین ویلکنز اور میل جونز کمنٹری کریں گے،پی ایس ایل کی افتتاحی تقریب 9 فروری کو دبئی میں منعقد ہوگی۔
تفصیلات کے مطابق کرکٹ کے دل دادہ پاکستانیوں کے لیے پرجوش کرکٹ کا وقت قریب آتاجارہا ہے، پاکستان سپرلیگ کے دوسرے ایڈیشن کے آغاز میں اب صرف نو دن باقی رہ گئے ہیں، ایونٹ میں چھکے اور چوکوں کی برسات ہوگی، بڑے بڑے کرکٹ اسٹارز اپنے جارحانہ اندازسے شائقین کو خون کو گرمائیں گے۔
کرس گیل ہوں یا برینڈن مککلم، شین واٹسن ہوں یا سنگاکارا سب ہی شائقین کی توجہ کا مرکز ہوں گے۔ انتظامیہ نے بھی پی ایس ایل کی گرینڈ اوپننگ کے انتظامات کر لیے ہیں، 9 فروری کو ہونے والی افتتاحی تقریب میں محمد علی شہکی اور علی ظفر آواز کا جادو جگائیں گے۔
اس موقع پرآتش بازی کا بھی بھرپورمظاہرہ کیا جائے گا۔ پاکستان سپر لیگ ایونٹ کے دوران رمیز راجہ ، بازید خان ،ای این بشپ، ڈینی موریسن، الین ویلکنز اور میل جونز کمنٹری کے فرائض انجام دیں گے۔
