لاہور: لاہور میں رائیونڈ روڈ پر ریت سے بھرا ڈمپر چنگچی رکشہ اور موٹر سائیکل پر الٹ گیا۔
تفصیلات کے مطابق لاہور میں رائیونڈ روڈ پر ریت سے بھرا ڈمپر چنگچی رکشے اور موٹر سائیکل پر الٹنے سے 2 افراد جاں بحق اور ایک شدید زخمی ہو گیا ہے۔
ریسکیو حکام کے مطابق لاشوں اور زخمی کو اسپتال منتقل کر دیا گیا ہے، جاں بحق افراد میں 32 سالہ عمیر اور 25 سالہ طیب شامل ہیں، جب کہ 30 سالہ وسیم زخمی ہوا ہے۔
واضح رہے کہ پاکستان بھر میں بالخصوص کراچی میں ہیوی گاڑیوں کے حادثات میں نمایاں طور پر اضافہ ہوا ہے، شہر قائد میں ڈمپر اور ٹریلر کے حادثات ایک وبائی صورت اختیار کر چکے ہیں، جس میں رواں برس بھی سیکڑوں جانیں جا چکی ہیں۔
تیز رفتار ڈمپر نے مسافروں سے بھری وین کو کچل دیا، ویڈیو رپورٹ
چند دن قبل کراچی میں سپر ہائی وے کاٹھور موڑ کے قریب مسافروں سے بھری وین اور ڈمپر میں تصادم کے نتیجے میں ایک بچی سمیت 2 افراد جاں بحق اور 7 خواتین سمیت 15 افراد زخمی ہوئے تھے۔ پولیس نے حادثے کے ذمہ دار ڈرائیور کو گرفتار کر کے ڈمپر تحویل میں لے لیا تھا۔
پولیس کا کہنا تھا کہ حادثہ ڈمپر ڈرائیور کی غلط سمت پر تیز رفتاری کی وجہ سے پیش آیا۔ وین میں سوار جاں بحق افراد کا تعلق حیدر آباد اور ٹنڈو آدم خان سے تھا، جو شادی میں شرکت کے بعد واپس اپنے آبائی علاقوں میں جا رہے تھے۔
