ترکی اور شام میں آنے والے خوفناک زلزلے نے دنیا بھر کے لوگوں کو غمزدہ کردیا ہے۔ مشہور ترک شیف سالٹ بے نے زلزلہ متاثرہ افراد کیلئے بڑی امداد کا اعلان کردیا۔
سوشل میڈیا پر ان کی ایک ویڈیو گردش کررہی ہے جس میں وہ زلزلہ زدگان سے اظہار یکجہتی کرتے ہوئے ان کیلئے بڑھ چڑھ کر حصہ لینے کا ارادہ ظاہر کررہے ہیں۔
ترکیہ کے معروف شیف نصرت گوکسی عرف سالٹ بے نے روزانہ 5 ہزار زلزلہ متاثرین کے لیے کھانا تیار کرنے کا عزم کا ارادہ کیا ہے۔
غیر ملکی نشریاتی ادارے "ڈیلی میل” کے مطابق ترکیہ اور شام میں زلزلے سے ہلاکتوں کی تعداد 41 ہزار سے تجاوز کرگئی ہے جن میں 35 ہزار 418 افراد کا تعلق ترکیہ اور 5 ہزار 800 افراد کا تعلق شام سے ہے۔
ترکیہ کے معروف ریسٹورنٹ نے انسٹاگرام پر ایک ویڈیو جاری کی جس میں زلزلہ متاثرین کے لیے کھانا تیار کیا جارہا ہے۔
انہوں نے انسٹاگرام پر لکھا کہ ہم مزید لوگوں کو گرم کھانا پیش کر رہے ہیں، ہمارا ہدف روزانہ 5 ہزار متاثرین کو کھانا پیش کرنا ہے۔
قبل ازیں انہوں نے انسٹاگرام پر ایک ویڈیو شیئر کرتے ہوئے لکھا کہ زلزلہ متاثرین کے لیے کھانا تیار کرنا ہمارے لیے سب سے اہم سروس ہوگی۔
ریسٹورنٹ کی جانب سے معروف گلوکاروں اور شخصیات کے ویڈیو پیغامات بھی شیئر کیے گئے جنہوں نے ترکیہ میں زلزلے سے متاثرہ لوگوں کے لیے دعا کی۔
