میانمار میں آنے والے خوفناک زلزلے کے بعد متاثرہ علاقوں میں بارش کے باعث امدادی سرگرمیاں شدید متاثر ہیں، ہزاروں افراد تباہ شدہ گھروں کے ملبے پر کھلے آسمان تلے میدانوں میں رہنے پر مجبورہیں۔
غیر ملکی ذرائع ابلاغ کے مطابق میانمار میں 28 مارچ کو سات اعشاریہ سات شدت کا زلزلہ آیا تھا، جس میں ہلاکتوں کی تعداد 3,471 تک پہنچ چکی ہے، جبکہ 4,671 افراد شدید زخمی ہیں۔
فوجی ترجمان کا کہنا ہے کہ میانمار میں خوفناک زلزلے سے ہلاکتوں کی تعداد میں مسلسل اضافہ ہو رہا ہے، سیکڑوں افراد تاحال لاپتہ ہیں۔
ترجمان کے مطابق متاثرہ علاقوں میں ریسکیو آپریشن اور زخمیوں کا علاج جاری ہے، میانمار میں 6 دن قبل سات اعشاریہ سات شدت کا زلزلہ آیا تھا جس نے فلک بوس عمارتوں کو زمین بوس کردیا تھا۔
زلزلے کے مرکز سے تقریباً 1,000 کلومیٹر (620 میل) دور پڑوسی تھائی لینڈ کے دارالحکومت بنکاک میں کم از کم 11 مزید اموات کی اطلاعات سامنے آئی ہیں۔
کانگو میں سیلاب نے تباہی مچادی، 30 سے زائد افراد ہلاک
زلزلے سے میانمار کے مختلف علاقوں میں کثیر المنزلہ عمارتیں، پل اور سڑکیں تباہ ہو کر ملبے کا ڈھیر بن گئی ہیں، بہت سے لوگوں کا خیال ہے کہ دور دراز علاقوں میں خراب مواصلات کی وجہ سے تباہی کا حقیقی پیمانہ ابھی سامنے نہیں آیا ہے۔
