ARYNews.tv | Urdu – Har Lamha Bakhabar

Tag: Earthquake

  • انڈونیشیا کے جزیرے سماٹرا میں خوفناک زلزلہ

    انڈونیشیا کے جزیرے سماٹرا میں خوفناک زلزلہ

    جکارتہ : انڈونیشیا کے جزیرے سماٹرا میں 6.2 شدت کا زلزلہ ریکارڈ کیا گیا ہے، پیر کی صبح آنے والے زلزلے کے بعد لوگ خوفزدہ ہوکر گھروں سے باہر نکل آئے۔

    تفصیلات کے مطابق انڈونیشیا کے جزیرہ سماٹرا کے شمال میں واقع صوبہ آچے کے کھلے سمندر میں 6.2 کی شدت کا زلزلہ آیا ہے۔

    ریکٹر سکیل پرزلزلے کی شدت 6.2 ریکارڈ کی گئی ہے، زلزلے کا مرکز صوبے آچے کے شہر سنگکل میں 48کلو میٹر گہرائی میں تھا۔

    فرانسیسی خبررساں ادارے نے امریکی جیولوجیکل سروے کے حوالے سے بتایا کہ انڈونیشیا کے جزیرے سماٹرا میں پیر کی صبح 6 بج کر 30منٹ پر زلزلے کے جھٹکے محسوس کیے گئے۔

    امریکن جیولوجیکل سروے سینٹر کے اعلان کے مطابق زلزلے کا مرکز آچے سے 40 کلومیٹر جنوب مشرق میں زیر زمین 37 کلومیٹر کی گہرائی میں تھا۔

    رپورٹ کے مطابق انڈونیشیائی محکمہ موسمیات نے بھی مذکورہ زلزلے کے بعد سونامی کی وارننگ جاری نہیں کی ہے۔

    اس کے علاوہ زلزلے سے تاحال کسی جانی و مالی نقصان کی اطلاع موصول نہیں ہوئی ہے، واضح رہے کہ 21نومبر کو انڈونیشیا کے صوبے جاوا میں 5.6شدت کے زلزلے سے 602 افراد ہلاک ہوگئے تھے۔

    یاد رہے کہ سماٹرا جزیرے کے مہلک ترین زلزلوں میں سے ایک 26 دسمبر 2004 کو آیا جس نے بحرہند میں سونامی کو جنم دیا جس میں 230,000 سے زیادہ افراد ہلاک ہوئے جن میں سری لنکا، ہندوستان اور تھائی لینڈ تک متاثرین شامل تھے۔

  • سوات اور گرد و نواح میں زلزلے کے جھٹکے

    سوات اور گرد و نواح میں زلزلے کے جھٹکے

    پشاور: صوبہ خیبر پختونخواہ کے ضلع سوات اور اس کے گرد و نواح میں زلزلے کے جھٹکے محسوس کیے گئے، زلزلے کی شدت 5.2 ریکارڈ کی گئی۔

    تفصیلات کے مطابق ضلع سوات اور اس کے گرد و نواح میں زلزلے کے جھٹکے محسوس کیے گئے۔

    زلزلہ پیما مرکز کا کہنا ہے کہ زلزلے کی شدت 5.2 جبکہ گہرائی 179 کلو میٹر ریکارڈ کی گئی، زلزلے کا مرکز کوہ ہندو کش کا پہاڑی سلسلہ تھا۔

    زلزلے کی وجہ سے خوفزدہ ہو کر لوگ گھروں اور دکانوں سے باہر نکل آئے اور کلمہ طیبہ کا ورد کرتے رہے۔

    خیال رہے کہ 3 ماہ قبل گلگت بلتستان کے شہر اسکردو کے علاقے روندو میں زلزلے کے جھٹکے محسوس کیے گئے تھے جس میں 5 افراد زخمی ہوگئے تھے۔

    ریکٹر اسکیل پر زلزلے کی شدت 4.6 ریکارڈ کی گئی تاہم اس کی گہرائی صرف 10 کلومیٹر تھی۔

    زلزلے کے باعث جگلوٹ اسکردو روڈ کئی مقامات پر بند ہوگئی، ملوپہ کے مقام پر پہاڑی تودہ گرنے سے شاہراہ بند ہوگئی جبکہ سڑکوں کی بندش کے باعث مسافر بھی پھنس گئے تھے۔

  • چترال اور دیر سمیت خیبر پختون خوا کے مختلف حصوں میں زلزلہ

    چترال اور دیر سمیت خیبر پختون خوا کے مختلف حصوں میں زلزلہ

    پشاور: ملک کے بالائی علاقوں چترال اور دیر سمیت خیبر پختون خوا کے مختلف حصوں میں زلزلے کے جھٹکے محسوس کیے گئے۔

    تفصیلات کے مطابق چترال اور دیر سمیت خیبر پختون خوا کے مختلف حصوں میں صبح 6 بجکر 22 منٹ پر زلزلے کے جھٹکے محسوس کیے گئے۔

    زلزلہ پیما مرکز کے مطابق زلزلے کی شدت ریکٹر اسکیل پر 4.5 ریکارڈ کی گئی۔

    زلزلہ پیما مرکز کا کہنا ہے کہ زلزلے کی گہرائی 101 کلو میٹر ریکارڈ کی گئی، زلزلے کا مرکز چترال سے 73 کلو میٹر جنوب مغرب میں تھا، زلزلے کے جھٹکے صبح چھ بجکر بائیس منٹ پر محسوس کیے گئے۔

  • انڈونیشیا میں خوفناک زلزلہ، درجنوں ہلاکتیں

    انڈونیشیا میں خوفناک زلزلہ، درجنوں ہلاکتیں

    جکارتہ: جنوب مشرقی ملک انڈونیشیا میں خوفناک زلزلے نے تباہی مچادی جس میں اب تک 50 کے قریب افراد ہلاک ہونے کی اطلاعات ہیں۔

    مقامی میڈیا کے مطابق زلزلہ صوبہ ویسٹ جاوا میں آیا اور اس کے جھٹکے دارالحکومت جکارتہ میں بھی محسوس کیے گئے۔

    زلزلے کی شدت ریکٹر اسکیل پر 5.6 ریکارڈ کی گئی اور اس کی گہرائی 10 کلو میٹر تھی۔

    حکام کے مطابق زلزلے کے باعث کم از کم 46 افراد ہلاک اور سینکڑوں زخمی ہوئے، زلزلے سے ممکنہ طور پر ہزاروں گھروں کو نقصان پہنچا ہے اور امدادی کام جاری ہے۔

    حکام کی جانب سے کہا گیا کہ زلزلے کے مرکز کے قریب افراد کو محتاط رہنا چاہیئے کیونکہ آفٹر شاکس کا خطرہ موجود ہے۔

    زلزلے کے جھٹکوں سے جکارتہ میں بھی متعدد عمارات 3 منٹ تک لرزتی رہیں جبکہ کچھ کو خالی بھی کروایا گیا۔

    خیال رہے کہ انڈونیشیا رنگ آف فائر یعنی مسلسل زلزلے اور آتش فشاں کے دھماکوں والے علاقے میں آباد ہے، فروری 2022 میں 6.2 شدت کے زلزلے سے مغربی سماٹرا میں 25 افراد ہلاک اور 460 زخمی ہوگئے تھے۔

    اس سے قبل جنوری 2021 میں صوبے مغربی سولوویسی میں 6.2 شدت کے زلزلے سے 100 سے زیادہ افراد ہلاک اور ساڑھے 6 ہزار کے قریب زخمی ہوئے تھے۔

    انڈونیشیا میں 2004 میں آنے والی تباہ کن سونامی کے نتیجے میں ایک لاکھ 20 ہزار افراد ہلاک ہو گئے تھے۔

  • نیپال اور بھارت میں زلزلے کے شدید جھٹکے، متعدد افراد ہلاک

    نیپال اور بھارت میں زلزلے کے شدید جھٹکے، متعدد افراد ہلاک

    کھٹمنڈو / نئی دہلی: جنوبی ایشیائی ملک نیپال میں 6.6 شدت کے زلزلے کے جھٹکے محسوس کیے گئے جس میں اب تک 6 افراد کی ہلاکت کی اطلاعات ہیں، بھارت کے کئی شہروں میں بھی زلزلے کے جھٹکے محسوس کیے گئے۔

    مقامی میڈیا رپورٹ کے مطابق بدھ کے روز علیٰ الصبح نیپال کے متعدد علاقوں میں زلزلے کے شدید جھٹکے محسوس کیے گئے، نیپالی سسمولوجیکل سینٹر کے مطابق زلزلے کی شت 6.6 تھی۔

    زلزلے کے جھٹکے بھارتی دارالحکومت نئی دہلی سمیت متعدد بھارتی شہروں میں بھی محسوس کیے گئے، پچھلے 24 گھنٹے میں زلزلے کے تین جھٹکے محسوس کیے گئے۔

    زلزلے کا مرکزبھارتی ریاست اتر پردیش کے شہر پیلی بھیت سے 158 کلومیٹر دور اور نیپال کے دارالحکومت کٹھمنڈو سے 340 کلو میٹر دور دیپایل کا قصبہ تھا۔

    زلزلے کے بعد نیپال میں اب تک کم از کم 6 افراد کی ہلاکت کی تصدیق ہوچکی ہے جبکہ متعدد افراد زخمی ہوئے ہیں، درجنوں مکانات منہدم ہونے کی بھی اطلاعات ہیں۔

    مقامی حکام کا کہنا ہے کہ وہ جانی اور مالی نقصانات کا اندازہ لگانے کی کوشش کر رہے ہیں۔

    نیپال کے وزیر اعظم شیر بہادر دیوبا نے متاثرین کے ساتھ دلی ہمدری کا اظہار کیا ہے، اپنے ایک ٹویٹ میں انہوں نے کہا کہ میں نے متعلقہ ایجنسیوں کو حکم دیا ہے کہ وہ زخمیوں اور دیگر متاثرین کے فوری اور مناسب علاج کے لیے تمام ضروری اقدامات کریں۔

    نیپالی آرمی کے ایک ترجمان نارائن سیلوال کا کہنا ہے کہ راحت اور بچاؤ ٹیمیں متاثرہ علاقوں میں پہنچ گئی ہیں اور 2 ہیلی کاپٹروں کو بھی تیار رکھا گیا ہے۔

    خیال رہے کہ نیپال میں اپریل 2015 میں 7.8 شدت کا زلزلہ آیا تھا جس میں تقریباً 9 ہزار افراد ہلاک اور 5 لاکھ سے زائد مکانات منہدم ہو گئے تھے۔

    اس زلزلے نے کئی قصبوں اور صدیوں پرانے مندروں کو صفحہ ہستی سے مٹا دیا تھا، نیپالی معیشت کو اس زلزلے کی وجہ سے 6 ارب ڈالر سے زائد کا نقصان ہوا تھا۔

  • اسکردو میں زلزلے کے جھٹکے، سڑکوں پر لینڈ سلائیڈنگ، متعدد افراد زخمی

    اسکردو میں زلزلے کے جھٹکے، سڑکوں پر لینڈ سلائیڈنگ، متعدد افراد زخمی

    گلگت: گلگت بلتستان کے شہر اسکردو کے علاقے روندو میں زلزلے کے جھٹکے محسوس کیے گئے، اب تک 5 افراد کے زخمی ہونے کی اطلاعات ہیں۔

    تفصیلات کے مطابق اسکردو کے علاقے روندو میں زلزلے کے جھٹکے محسوس کیے گئے، ریکٹر اسکیل پر زلزلے کی شدت 4.6 ریکارڈ کی گئی تاہم اس کی گہرائی صرف 10 کلومیٹر تھی۔

    زلزلے کے باعث جگلوٹ اسکردو روڈ کئی مقامات پر بند ہوگئی، ملوپہ کے مقام پر پہاڑی تودہ گرنے سے شاہراہ بند ہوگئی، سڑکوں کی بندش کے باعث مسافر پھنس کر رہ گئے جبکہ ٹریفک کی روانی بھی متاثر ہوئی ہے۔

    اسسٹنٹ کمشنر روندو محمد اویس کا کہنا ہے کہ زلزلے میں 5 افراد زخمی ہوگئے، 3 زخمیوں کو اسکردو اور 2 کو گلگت منتقل کیا گیا ہے، زلزلے سے جگلوٹ اسکردو روڈ مختلف مقامات پر بند ہوگئی۔

    اے سی کا کہنا ہے کہ علاقے میں سڑکوں اور واٹر چینلز کا بڑے پیمانے پر نقصان ہوا ہے، یلبو کے مقام پر آفٹر شاکس کی بھی اطلاعات ہیں، فی الحال سڑکیں بند ہیں حتمی تفصیلات رابطے بحال ہونے پر فراہم ہوسکیں گی۔

    انہوں نے مزید کہا کہ انتظامیہ کی ٹیمیں مکمل طور پر متحرک ہیں۔

    دوسری جانب گلگت بلتستان کی ڈیزاسٹر مینجمنٹ اتھارٹی (جی بی ڈی ایم اے) کا کہنا ہے کہ اسکردو میں زلزلے کی وجہ سے نقصانات کا جائزہ لیا جا رہا ہے۔

  • پاکستان کے کئی شہر زلزلے سے لرز اٹھے

    پاکستان کے کئی شہر زلزلے سے لرز اٹھے

    اسلام آباد : وفاقی دارلحکومت سمیت ملک کے مختلف شہروں میں 5.4 شدت کے زلزلے کے جھٹکے محسوس کیے گئے ہیں۔

    تفصیلات کے مطابق پاکستان کے مختلف شہر زلزلے سے لرز اٹھے ، اسلام آباد، راولپنڈی اور گرد و نواح میں رات گئے زلزلے کے جھٹکے محسوس کیے گئے۔

    ایبٹ آباد، مردان اور صوابی میں بھی زلزلے کے جھٹکے محسوس کیے گئے، زلزلے کے باعث شہریوں میں شدید خوف وہراس پھیل گیا اور کلمہ طیبہ کا ورد کرتے ہوئے گھروں سے نکل آئے۔

    زلزلہ پیما مرکز کے مطابق زلزلے کی شدت 5.4 ریکارڈ کی گئی ہے، زلزلے کا مرکز کوہ ہندوکش افغانستان میں تھا اور زلزلے کی گہرائی بتیس کلومیٹر ریکارڈ کی گئی۔

    تاحال فوری طور پر زلزلے سے کسی جانی ومالی نقصان کی کوئی اطلاع نہیں ملی۔

    یاد رہے گزشتہ سال دسمبر میں کراچی میں 4.1 شدت کے زلزلے کے جھٹکے محسوس کئے گئے تھے۔

    کراچی میں اس شدت کے زلزلے نے زلزلہ پیما ماہرین کو چونکا دیا کیونکہ انہوں نے اس سے قبل صوبائی دارالحکومت میں مرکز کے اندر اتنی شدت کا زلزلہ ریکارڈ نہیں کیا تھا۔

    پاکستان میٹرولوجی ڈویژن (پی ایم ڈی) کے سیسمولوجی ڈویژن کے ڈائریکٹر نے کہا تھا کہ ماضی میں کراچی میں صرف 3.1 شدت کے زلزلے آئے ہیں، ان کے مرکز صوبائی دارالحکومت سے باہر تھے۔ جبکہ اس زلزلے کا مرکز کراچی کے شمال میں 15 کلومیٹر کے فاصلے پر ڈی ایچ اے میں تھا۔

  • دادو اور گرد و نواح میں زلزلے کے جھٹکے

    دادو اور گرد و نواح میں زلزلے کے جھٹکے

    کراچی: صوبہ سندھ کے شہر دادو اور اس کے گرد و نواح میں زلزلے کے جھٹکے محسوس کیے گئے، زلزلے کی شدت 4.1 ریکارڈ کی گئی۔

    تفصیلات کے مطابق صوبہ سندھ کے شہر دادو اور اس کے گرد و نواح میں زلزلے کے جھٹکے محسوس کیے گئے۔

    زلزلہ پیما مرکز کا کہنا ہے کہ زلزلے کی شدت 4.1 ریکارڈ کی گئی، اس کی زیر زمین گہرائی 88 کلو میٹر تھی جبکہ مرکز شمال مغرب سندھ بلوچستان بارڈر تھا۔

    زلزلے کے جھٹکے محسوس ہوتے ہی لوگ خوفزدہ ہو کر کلمہ طیبہ کا ورد کرتے ہوئے گھروں سے باہر نکل آئے۔

    خیال رہے کہ گزشتہ برس دسمبر میں صوبائی دارالحکومت کراچی میں زلزلے کے شدید جھٹکے محسوس کیے گئے تھے، زلزلے کی شدت 4.1 ریکارڈ کی گئی تھی۔

    زلزلہ پیما مرکز کے مطابق زلزلے کا مرکز ڈی ایچ اے کراچی سے 15 کلو میٹر شمال میں تھا۔

  • ایران میں 6.1 شدت کا خوفناک زلزلہ، قیمتی جانوں کا ضیاع

    ایران میں 6.1 شدت کا خوفناک زلزلہ، قیمتی جانوں کا ضیاع

    تہران: ایران کے جنوبی علاقے میں زلزلے سے پانچ جانبحق اور متعدد زخمی ہوگئے۔

    غیر ملکی میڈیا رپورٹ کے مطابق جنوبی ایران میں 6.3 شدت کا زلزلہ آیا جس میں متعدد افراد زخمی ہوئے، ہرمزگان صوبے کے ہنگامی امور کے سربراہ مہرداد حسن زادہ نے سرکاری ٹی وی کو بتایا کہ زلزلے میں پانچ افراد جاں بحق بیس سے زائد زخمی ہوئے۔

    زلزلہ پیما مرکز کے مطابق زلزلے کی شدت ریکٹراسکیل پر6.1 تھی، زلزلے سے متعدد گھر تباہ ہوگئے اور سڑکیں ٹوٹ گئیں جبکہ علاقے میں 6.3 شدت کے آفٹر شاکس بھی محسوس کئے گئے۔

    زلزلہ مرکز کے مطابق 6.3 شدت کا زلزلہ ایران کے جنوب میں آیا جس کی گہرائی 10 کلومیٹر تھی۔ زلزلہ کا مرکز ایرانی بندرگاہ لنگہ تھا جو شارجہ سے 150 کلومیٹر دورہے۔

    یہ بھی پڑھیں: قدرتی آفت کا شکار پکتیا میں دوبارہ زلزلہ، 5 افراد جاں بحق

    ایرانی ہلال احمر کے حکام کا کہنا ہے کہ زلزلے سے متاثرہ علاقوں میں امدادی ٹیمیں پہنچنا شروع ہوگئی ہیں اورزلزلے سے متاثرین کے لئے امدادی خیمے نصب کئے جارہے ہیں۔

    ادھر رات گئے متحدہ عرب امارات کے شہر راس الخیمہ اور دبئی میں بھی زلزلے کےجھٹکے محسوس کئے گئے ہیں۔

    یاد رہے کہ حالیہ برسوں میں ایران زلزلے کی تباہ کاریوں کا شکار ہوا ہے۔ دو ہزار تین میں صوبہ کرمان میں 6.6 شدت کا زلزلہ آیا تھا جس میں 31 ہزار جاں بحق ہوئے تھے اور قدیم شہر بام ملیا میٹ ہوا تھا۔

  • قدرتی آفت کا شکار پکتیا میں دوبارہ زلزلہ، 5 افراد جاں بحق

    قدرتی آفت کا شکار پکتیا میں دوبارہ زلزلہ، 5 افراد جاں بحق

    کابل: افغان صوبے پکتیا کی زمین ایک بار پھر زلزلے کے باعث لرز اٹھی اور سینکڑوں مکانات مہندم ہوگئے۔

    امارات اسلامیہ افغانستان کے نائب وزیر اطلاعات اور افغان طالبان کے ترجمان ذبیح اللہ مجاہد نے بتایا کہ آج پھر پکتیا کے ضلع گیان میں زلزلے کے شدید جھٹکے محسوس کئے گئے جس کے نتیجے میں سینکڑوں کچے مکانات مٹی کا ڈھیر بن گئے۔

    ذبیح اللہ مجاہد کی جانب سے جاری بیان میں بتایا گیا کہ آج آنے والے زلزلے کے نتیجے میں پانچ افراد جاں بحق جبکہ گیارہ زخمی ہوئے ہیں جبکہ بڑے پیمانے پر مالی نقصان ہوا ہے، امدادی ٹیموں نے متاثرہ علاقوں میں امدادی کارروائیوں کا آغاز کردیا ہے۔

    یہ بھی پڑھیں: افغانستان زلزلہ، جاں بحق افراد کی تعداد 950 تک جا پہنچی

    واضح رہے کہ تین روز قبل بھی افغانستان کے مشرقی حصوں میں 6.1 شدت کا زلزلہ آیا تھا، سب سے زیادہ صوبہ پکتیا متاثر ہوا تھا، جہاں سینکڑوں افراد جاں بحق جبکہ ہزاروں زخمی ہوئے تھے، بدترین زلزلے کے نتیجے میں کئی گاؤں صفحہ ہستی سے مٹ گئے۔

    زلزلے کی وجہ سے مختلف علاقوں میں موبائل ٹاور اور بجلی کے کھمبے گرنے اور مٹی کے تودوں کے باعث پہاڑی علاقوں میں سڑکیں بند ہوچکی ہیں اور سینکڑوں لوگ پھنسے ہوئے ہیں۔ قدرتی آفت کے نتیجے میں جاں بحق ہونے والے افراد کی اجتماعی تدفین کی جارہی ہے۔