اسلام آباد : معاون خصوصی اطلاعات فردوس عاشق اعوان نے کہا ہے کہ نواز شریف کے علاج کے راستے میں کوئی رکاوٹ نہیں ڈالی جائے گی، حکومت نے کامیابی سے اپنے معاشی اہداف کو حاصل کرلیا ہے۔
ان خیالات کا اظہار انہوں نے اسلام آباد میں نیوز کانفرنس سے خطاب کرتے ہوئے کیا، تفصیلات کے مطابق وزیراعظم عمران خان کی زیرصدارت وفاقی کابینہ کا اجلاس ہوا۔
کابینہ اجلاس میں7نکاتی ایجنڈے کی منظوری دی گئی، اس حوالے سے میڈیا کو آگاہ کرتے ہوئے فردوس عاشق اعوان نے بتایا کہ اجلاس میں ایڈوائزر فنانس نے کابینہ کو بریفنگ دی۔
نواز شریف کے بیرون ملک جانے سے متعلق معاون خصوصی کا کہنا تھا کہ نواز شریف کے معاملے کو انسانیت کو مدنظر رکھتے ہوئے دیکھا ہے، عمران خان ہر فیصلہ کرنے سے پہلے کابینہ سے مشاورت کرتے ہیں جس کے بعد جو رائے اکثریت میں ہو اس کے مطابق فیصلہ کرتے ہیں۔
اجلاس میں فیصلہ کیا گیا کہ نواز شریف کے علاج کے راستے میں کوئی رکاوٹ نہیں ڈالی جائے گی۔ اتفاق کیا گیا کہ نوازشریف ضمانت دیتے ہیں تو انہیں بیرون ملک جانے دیا جائے، اجلاس میں85فیصد شرکاء نے ہاتھ اٹھا کر جانے کی حمایت کی،5فیصد تو ایسے تھے جنہوں نے دونوں بار ہاتھ بلند کئے۔
فردوس عاشق نے بتایا کہ وزیراعظم نے یوٹیلیٹی اسٹورز پر اشیاء کی فراہمی یقینی بنانے کی ہدایت کی، وزیر اعظم نے ہدایت کی 6 ارب کی سبسڈی کا فائدہ عوام تک پہنچنا چاہیے، صوبائی حکومتوں سے ماہانہ کارکردگی رپورٹ مانگی گئی ہے، صوبوں نے مہنگائی کیخلاف چھاپوں، جرمانوں اور گرفتاریوں کو معیار بنا رکھا ہے، کابینہ میں کہا گیا چھاپوں سے غرض نہیں، قیمتوں پر نظر رکھی جائے گی۔
صوبوں سے کہا ہے کہ اسٹاک رکھنے والوں پرنظر رکھی جائے، گرفتاریوں، چھاپوں سے دلچسپی نہیں ہر ماہ اشیا کے نرخ پوچھیں گے، ہم مہنگائی کیخلاف آٹومیشن اور ٹیکنالوجی کی طرف جارہے ہیں، کرپشن، بدانتظامی کے خلاف صورتحال میں بہتری آئے گی، کاروباری آسانی کیلئے ون ونڈو آپریشن شروع کردیا گیا ہے، کرپشن، بےانتظامی کےخلاف صورتحال میں بہتری آئے گی،9ارب ڈالرز ایم ایل ون منصوبے پر کابینہ کو آگاہ کیا گیا۔
بریفنگ میں حکومت کے معاشی اقدامات سے متعلق کابینہ اراکین کو آگاہ کیا گیا، حکومت نے جو اہداف رکھے تھے اس سے زیادہ کامیاب رہے، حکومت نے اپنے معاشی اہداف کو حاصل کرلیا ہے اور معیشت کو درست سمت میں ڈال دیا ہے۔
فردوس عاشق اعوان کا کہنا تھا کہ اجلاس کے موقع پر مشیر خزانہ حفیظ شیخ نے اقتصادی اعشاریوں اور اقدامات کے حوالے سے وزیر اعظم کو بریفنگ دی، بریفنگ میں بتایا گیا کہ سہ ماہی اہداف حاصل کیے گئے ہیں، صحت مند معیشت کی جانب سے بڑھ رہے ہیں جس سے عوام بھی فائدہ اٹھائیں گے۔
انہوں نے کہا کہ پاکستان کی صحت مند معیشت پر مہر آئی ایم ایف اور ورلڈ بینک بھی لگارہا ہے، اسٹاک مارکیٹ میں مثبت اعشاریے بھی کامیاب حکومتی اقدامات کا ثبوت ہیں۔ ایک سوال کے جواب میں ان کا کہنا تھا کہ مشکل حالات سے نکلنے کیلئے میڈیا اہم کردار ادا کرسکتا ہے۔
