اسلام آباد: وزیر اعظم عمران خان نے معاشی ٹیم کا اجلاس طلب کرلیا، اجلاس میں وزیر اعظم عوام کو مہنگائی سے ریلیف دینے کے لیے ہدایات دیں گے۔
تفصیلات کے مطابق وزیر اعظم عمران خان نے معاشی ٹیم کا اجلاس آج طلب کرلیا۔ اجلاس میں خزانہ، تجارت اور منصوبہ بندی کے وزرا اور مشیر، فیڈرل بورڈ آف ریونیو (ایف بی آر) کے چیئرمین اور دیگر اعلیٰ حکام شرکت کریں گے۔
اجلاس میں مہنگائی اور عوام کو ریلیف دینے سے متعلق اقدامات کا جائزہ لیا جائے گا۔ وزیر اعظم عوام کو مہنگائی سے ریلیف دینے کے لیے ہدایات دیں گے۔
خیال رہے کہ گزشتہ روز وزیر اعظم عمران خان نے سماجی رابطے کی ویب سائٹ ٹویٹر پر اپنے ٹویٹ میں کہا تھا کہ پاکستان کی معیشت بالآخر درست سمت میں جارہی ہے، ہماری معاشی اصلاحات کا پھل ملنا شروع ہوگیا۔
وزیر اعظم کا کہنا تھا کہ اکتوبر میں پاکستان کے جاری کھاتے سرپلس ہوگئے، جاری کھاتوں کا یہ سر پلس 4 سال میں پہلی بار آیا ہے۔ جاری کھاتے 9 کروڑ 90 لاکھ ڈالر سر پلس رہے۔
انہوں نے کہا تھا کہ گزشتہ سال اکتوبرمیں جاری کھاتوں میں 1 ارب 28 کروڑ ڈالر کا خسارہ تھا۔
