Tag: Economy

اسلام آباد: اسلام آباد چیمبر آف اسمال ٹریڈرز کے سرپرست شاہد رشید بٹ کا کہنا ہے کہ ہیکرز کی بڑھتی ہوئی اہلیت و استعداد سے ایک نیا عالمی بحران پیدا ہو رہا ہے۔

ان خیالات کا اظہار انہوں نے اپنے جاری کردہ بیان میں کیا، رشید بٹ کا کہنا تھا کہ دنیا بھر میں بڑھتے ہوئے سائبر کرائمز کو دہشت گردی سے بڑا خطرہ قرار دیا جا رہا ہے۔

انہوں نے کہا کہ اس کی وجہ سے عوام اور کاروباری برادری نہ صرف خوفزدہ ہے بلکہ بینکوں اور دیگر اداروں پر انکا اعتماد بھی متاثر ہو رہا ہے۔

اسلام آباد چیمبر آف اسمال ٹرینڈرز کے سرپرست کا کہنا تھا کہ اس کا اثر کاروباری سرگرمیوں پر بھی پڑ رہا ہے، پاکستانی ادارے، بینک، صنعت اور چھوٹے کاروبار سائبر حملوں کے لیے تیار نہیں ہیں اور حساس معلومات مجرموں کی رحم و کرم پر ہیں۔

ان کا کہنا تھا کہ گزشتہ سال قدرتی آفات سے تین سو ارب ڈالر کا نقصان ہوا جبکہ سائبر کرائمز سے ہونے والا نقصان اس سے تین گنا زیادہ تھا۔

شاہد رشید بٹ کا کہنا تھا کہ سائبر کرائمز دہشت گردی اور دیگر تمام جرائم سے آگے نکل گئے ہیں جبکہ دنیا کا کوئی بھی ملک ان سے نمٹنے کیلئے مکمل طور پر تیار نہیں ہے۔

ان کا مزید کہنا تھا کہ پاکستان میں فنانشل سروس انڈسٹری اور دیگر سرکاری و نجی ادارے سائبر کرائمز کے خلاف اپنے نظام کو مستحکم بنائیں جبکہ مرکزی بینک بھی آن لائن جرائم کے تدارک کے لئے اپنی استعداد بڑھائے۔