Tag: Economy

سعودی ولی عہد محمد بن سلمان کا ملکی ترقی کیلئے بڑا اعلان

ریاض : سعودی ولی عہد شہزادہ محمد بن سلمان نے پائیدار اور جامع قومی ترقیاتی فنڈ کی حکمت عملی کا اعلان کیا ہے۔

سرکاری خبر رساں ایجنسی ایس پی اے کے مطابق شہزادہ محمد بن سلمان نے کہا ہے کہ قومی ترقیاتی فنڈ حکمت عملی کے اجراء کا مقصد تمام اقتصادی شعبوں کے پائیدار ترقیاتی اہداف کی تکمیل میں مدد دینا ہے۔

انہوں نے کہا کہ ’ترقیاتی فنڈ بینکوں اور فنڈز کے ذریعے پرائیویٹ سیکٹر کی قومی معیشت میں شراکت تین گنا سے زیادہ بڑھائے گا اور 2030 تک یہ ہدف حاصل کیا جائے گا۔

شہزادہ محمد بن سلمان نے کہا کہ قومی ترقیاتی فنڈ 2030 تک ملک کی حقیقی مجموعی قومی پیداوار میں 570 ارب ریال سے زیادہ انجیکٹ کرے گا۔ یہ 2030 تک تیل کے ماسوا مجموعی قومی پیداوار میں تین گنا سے زیادہ آمدنی لائے گا۔ 605 ارب ریال تک کی آمدنی دے گا۔

علاوہ ازیں 2030 تک مملکت میں روزگار کے نئے مواقع بھی مہیا کرے گا۔

انہوں نے کہا کہ قومی ترقیاتی فنڈ کی حکمت عملی ترقیاتی بینکوں اور فنڈز کو وافر مقدار میں فنڈز فراہم کرکے مملکت کے ترقیاتی اہداف پورے کرنے پر توجہ مرکوز کرے گا۔

ترقیاتی فنڈ کے ڈپٹی چیئرمین محمد التویجری نے بیان میں کہا کہ حکمت عملی کے اجرا پر وہ ولی عہد کے شکر گزار ہیں، اس کی بدولت فنڈ جامع ترقیاتی فنڈ ادارے میں تبدیل ہوجائے گا۔

ترقیاتی فنڈ کے گورنر کا کہنا تھا کہ ہمارے سامنے سرکاری ترقیاتی بینکوں اور فنڈز کی استعداد بڑھانے کا بڑا موقع ہے۔،

یاد رہے کہ قومی ترقیاتی فنڈ شاہی فرمان کے تحت قائم ہوا تھا، اس کی سفارش اقتصادی و ترقیاتی امور کونسل کے سربراہ ولی عہد شہزادہ محمد بن سلمان نے کی تھی۔

قومی ترقیاتی فنڈ اثاثوں کے حوالے سے بڑے ترقیاتی فنڈز میں سے ایک ہے۔ اہم بات یہ ہے کہ یہ جی 20 کی معیشتوں کی مجموعی قومی پیداوار میں 496 ارب ریال کے اثاثوں کی بدولت بڑا فنڈ ہے۔

مارچ 15, 2022
معاشی حالات : سعودی عرب سے اچھی خبر آگئی

ریاض : سال 2020کے آغاز سے دنیا بھر میں اپنی آب و تاب کے ساتھ نمودار ہونے والہی عالمی وبا کورونا وائرس نے مختلف ممالک کی معیشتوں کا بھٹہ بٹھا دیا۔

وقت گزرنے کے ساتھ کورونا ایس اوپیز پر عمل درآمد اور ویکسی نیشن کے بعد حالات میں کچھ بہتری کی جانب گامزن ہیں اسی سلسلے میں سعودی عرب سے اچھی خبریں سامنے آرہی ہیں۔

اس حوالے سے ذرائع کا کہنا ہے کہ عالمی وباء کورونا وائرس کے باعث گذشتہ ایک سال کے دوران تخفیف کے بعد سعودی معیشت2021 میں دوبارہ ترقی کی طرف گامزن ہے۔

سعودی ذرائع ابلاغ کے مطابق سرکاری اعداد و شمار سے پتہ چلتا ہے کہ مملکت کی حقیقی مجموعی ملکی پیداوار میں گزشتہ سال 3.3 فیصد اضافہ ہوا جب کہ 2020 میں کورونا وبا نے زیادہ ترمعاشی سرگرمیوں کو مفلوج کردیا تھا۔

سعودی معیشت2021 میں ایک بار پھر ترقی کی طرف سفر جاری رکھے ہوئے ہے کیونکہ غیر تیل سرگرمیاں عالمی وبائی امراض سے بحالی کا باعث رہی ہیں۔

جنرل اتھارٹی برائے شماریات کے اعداد و شمار کے مطابق سعودی حقیقی جی ڈی پی میں ایک سال قبل کے مقابلے میں چوتھی سہ ماہی میں 6.8 فیصد اضافہ ہوا ہے جس کی خاص وجہ غیر تیل مصنوعات کی مارکیٹ میں زبردست اضافہ ہے۔

جنرل اتھارٹی برائے شماریات جی اے ایس ٹی ایس کے بیان کے مطابق مملکت کی جی ڈی پی میں یہ اضافہ 6.6 فیصد غیر تیل سرگرمیوں کی ترقی کے ذریعے معیشت کو عالمی وبا کے بحران سے نکالنے کا نتیجہ ہے۔

سرکاری خدمات کی سرگرمیوں میں بھی 1.5 فیصد اضافہ ہوا اور تیل کی سرگرمیوں میں 0.2 فیصد اضافہ سامنے آیا ہے۔

فروری 11, 2022
کویت : ملکی معیشت کی بحالی کیلئے حکومت کا اہم اقدام

کویت : عالمی وباء کورونا وائرس کی تباہ کاریوں کے نتیجے میں ہونے والے لاک ڈاؤن سے معاشی حالات ابتر ہورہے ہیں جس کے تدارک کیلئے حکومتیں اقدامات کررہی ہیں۔

کویتی پارلیمنٹ نے کورونا ایس او پیز میں نرمی کی سفارش کی ہے اس مسئلے پر ووٹنگ آئندہ اجلاس میں ہوگی، اس کے علاوہ دیگر امور پر بھی غور کیا جائے گا۔

کویتی خبررساں ادارے "کونا” کے مطابق ارکان پارلیمنٹ نے سفارش کی ہے جس میں کہا گیا ہے کہ مکمل امیون اسٹیٹس کے لیے ویکسین کی دو خوراکوں پر اکتفا کیا جائے اور ویکسین نہ لینے والوں پر عائد پابندیاں ختم کی جائیں۔

اس کے علاوہ ی ہبھی سفارش کی گئی ہے کہ سرکاری اداروں میں شہریوں کے داخلے کے لیے پی سی آر ٹیسٹ کی پابندی کی جائے۔

اسی طرح ایسے ممالک کے سفر کے لیے بھی پی سی آر ٹیسٹ کو کافی سمجھا جائے جو ویکسین نہ لگوانے والوں کو اپنے یہاں آنے کی اجازت دیے ہوئے ہیں۔

یہ بھی سفارش کی گئی ہے کہ ویکسین لگوانے والے بچوں اور ویکسین نہ لگوانے والوں کے درمیان کوئی فرق نہ کیا جائے۔ ارکان پارلیمنٹ نے باہر سے آنے والے کویتی شہریوں پر پی سی آر ٹیسٹ کی پابندی ختم کرنے کی بھی سفارش کی ہے۔

فروری 3, 2022
وزیر اعظم عمران خان کی بہترین پالیسوں سے ملکی معیشت میں بہتری

اسلام آباد: پارلیمانی سیکریٹری برائے صنعت و تجارت عالیہ حمزہ کا کہنا ہے کہ وزیر اعظم عمران خان کی بہترین پالیسوں سے ملکی معیشت میں بہتری آئی، وزیر اعظم نے پہلے پاکستان کو دیوالیہ ہونے سے بچایا۔

تفصیلات کے مطابق پارلیمانی سیکریٹری برائے صنعت و تجارت عالیہ حمزہ نے رواں مالی سال کے 6 ماہ کے معاشی اعشاریوں کی تفصیلات جاری کر دیں۔

عالیہ حمزہ کا کہنا تھا کہ پاکستان میں کرونا وائرس کے باوجود ڈیٹ ٹو جی ڈی پی کم ہو رہا ہے، گزشتہ سال کی نسبت رواں سال ایکسپورٹ گڈز میں 29 فیصد اضافہ ہوا اور پہلے 6 ماہ میں ایکسپورٹ گڈز 15.24 ارب ڈالر تک پہنچ گئے۔

انہوں نے کہا کہ گزشتہ سال ایکسپورٹ گڈز 11.82 ارب ڈالر رہی تھیں۔ ملبوسات برآمدات میں پاکستان نے بھارت اور بنگلہ دیش کو پیچھے چھوڑ دیا۔ امریکا کو ملبوسات برآمدات میں پاکستان 69 فیصد پر رہا جبکہ بھارت 33 فیصد اور بنگلہ دیش 28 فیصد پر رہا۔

پارلیمانی سیکریٹری کا کہنا تھا کہ یورپی ممالک کو ملبوسات برآمدات میں پاکستان 27 فیصد پر رہا۔

انہوں نے کہا کہ رواں سال پہلے 6 مہینوں میں ترسیلات زر میں 11 فیصداضافہ ہوا۔ رواں سال ترسیلات زر 15.8 ارب ڈالر رہیں جبکہ گزشتہ سال یہ 14.2 ارب ڈالر تھیں۔

عالیہ حمزہ نے بتایا کہ رواں سال ٹیکسٹائل ایکسپورٹ میں 26 فیصد اضافہ ہوا اور 9.38 ارب ڈالر کی ایکسپورٹ ہوئیں۔ رواں سال کے 6 ماہ میں آئی ٹی ایکسپورٹ 1.3 ارب ڈالر رہیں جبکہ گزشتہ برس یہ 959 ملین ڈالر کی تھیں۔

انہوں نے کہا کہ پاکستان میں کاروں کی فروخت میں 71 فیصد اضافہ ہوا، بہترین پالیسی کی وجہ سے ٹریکٹرز کی سیلز میں 21 فیصد اضافہ ہوا۔

پارلیمانی سیکریٹری کا کہنا تھا کہ رواں سال ایف بی آر ریونیو میں 32 فیصد، زر مبادلہ کے ذخائر میں 32 فیصد، ڈومیسٹک سیمنٹ کی سیلز میں 2.8 فیصد، فرٹیلائزر یوریا کی سیلز میں 5 فیصد اور پیٹرولیم سیلز میں 17 فیصد اضافہ ہوا۔

انہوں نے مزید بتایا کہ رواں سال کاٹن کی کاشت میں 37 فیصد، بجلی کی کھپت کے باعث رواں سال بجلی کی پیداوار میں 9.3 فیصد، پرائیوٹ سیکٹر کی کریڈٹ ادائیگی میں 344 فیصد، زرعی سیکٹر کی کریڈٹ ادائیگی میں 4 فیصد اور فارن ڈائریکٹ انویسمنٹ میں 20 فیصد اضافہ ہوا۔

عالیہ حمزہ کا کہنا تھا کہ وزیر اعظم کی بہترین پالیسوں سے ملکی معیشت میں بہتری آئی، وزیر اعظم عمران خان نے پہلے پاکستان کو دیوالیہ ہونے سے بچایا۔ ان کی بہترین پلاننگ سے کووڈ بحران سے بخوبی نمٹا گیا۔

جنوری 29, 2022
حکومت کے 3 سال معاشی کامیابی کی کہانی ہیں: وزیر اعظم

اسلام آباد: وزیر اعظم عمران خان کا کہنا تھا کہ حکومت کے 3 سال معاشی کامیابی کی کہانی ہیں، حکومتی پالیسیوں کی عالمی سطح پر مبصرین نے بھی تعریف کی۔

تفصیلات کے مطابق وزیر اعظم عمران خان کی زیر صدارت میکرو اکنامک ایڈوائزری گروپ کا اجلاس ہوا، اجلاس میں ملک کی مجموعی معاشی صورتحال کا جائزہ لیا گیا۔

اجلاس میں حکومتی اقدامات اور 3 سال میں معاشی سطح پر حکومتی کامیابیوں کا جائزہ بھی لیا گیا۔

وزیر اعظم عمران خان کا کہنا تھا کہ پاکستان نے کرونا وائرس کا مقابلہ کرنے میں غیر معمولی کارکردگی کا مظاہرہ کیا، حکومت کی اسمارٹ لاک ڈاؤن کی پالیسیوں نے معیشت کو مستحکم رفتار سے بڑھایا۔

وزیر اعظم کا کہنا تھا کہ حکومتی پالیسیوں کی عالمی سطح پر مبصرین نے بھی تعریف کی۔

انہوں نے کہا کہ حکومت کے 3 سال معاشی کامیابی کی کہانی ہیں، ہمیں بہت بڑا گردشی قرضہ اور برآمد مخالف پالیسیاں ورثے میں ملی تھیں، غیر مستحکم مالی حالات اور کم مسابقتی کاروباری ماحول سے بھی نمٹنا تھا۔

جنوری 7, 2022
ملکی معیشت کی ترقی : ایشیائی ترقیاتی بینک سے معاہدے پر دستخط

اسلام آباد : ایشیائی ترقیاتی بینک پاکستان کو1.54ارب ڈالر کی فنانسنگ فراہم کرے گا، اس سلسلے میں پاکستان اور اے ڈی بی کے درمیان چھ فنانسنگ کے معاہدوں پر دستخط کردیئے گئے۔

معاہدوں پر سیکرٹری اقتصادی امور اسد حیاالدین نے دستخط کئے، اس موقع پر وفاقی وزیر اقتصادی امور عمر ایوب خان کی تقریب میں شرکت کی۔

اے ڈی بی کے کنٹری ڈائریکٹر یونگ یے نے دستخط کئے، انرجی سیکٹر کی اصلاحات کیلئے300ملین ڈالر فراہم کئے جائیں گے۔

اس حوالے سے ذرائع کا کہنا ہے کہ کے پی کے5 شہروں کے انفراسٹرکچر کی بہتری کیلئے 385ملین ڈالر اور شکار پور تا راجن پور انڈس ہائی وے 222کلومیٹر سیکشن کیلئے 235ملین ڈالر ملیں گے۔

اس کے علاوہ احساس پروگرام کے توسیعی فیز کیلئے603ملین ڈالر جبکہ کرم تنگی منصوبے کیلئے 5ملین ڈالر اور کے پی کے شہروں کیلئے 15ملین ڈالر مل سکیں گے۔

دسمبر 22, 2021
افغانستان میں مالیاتی نظام کی تباہی کے اثرات خطرناک ہوں گے: اقوام متحدہ

نیویارک: اقوام متحدہ نے افغانستان میں بینکاری اور مالیاتی نظام پر رپورٹ جاری کرتے ہوئے کہا ہے کہ افغانستان میں مالیاتی نظام کی تباہی کے معاشی اور سماجی اثرات خطرناک ہوں گے۔

اقوام متحدہ نے افغانستان میں بینکاری اور مالیاتی نظام پر رپورٹ جاری کردی، رپورٹ میں کہا گیا ہے کہ افغانستان کے مالیاتی اور بینکنگ ادائیگی کا نظام درہم برہم ہے۔

رپورٹ میں کہا گیا کہ افغان عوام کی جانب سے قرض ادائیگی میں ناکامی سے مالیاتی نظام تباہ ہوا۔

اقوام متحدہ کا کہنا ہے کہ افغان بینکنگ سسٹم بچانے کے لیے مختصر مدت کے لیے ضروری لیکیوڈٹی یقینی بنائی جائے۔ افغان بینکنگ سسٹم ناکارہ ہو جائے تو کئی دہائیاں ٹھیک ہونے میں لگیں گی۔

رپورٹ میں مزید کہا گیا کہ افغانستان میں مالیاتی نظام کی تباہی کے معاشی اور سماجی اثرات خطرناک ہوں گے، افغانستان کے بینکوں کو سہارا دینے کے لیے فوری اقدامات کی ضرورت ہے۔

نومبر 22, 2021
پاکستان میں دنیا کے مقابلے میں بہت بہتر حالات ہیں: فواد چوہدری

اسلام آباد: وفاقی وزیر برائے اطلاعات و نشریات فواد چوہدری کا کہنا ہے کہ پاکستان میں دنیا کے مقابلے میں بہت بہتر حالات ہیں، کنسٹرکشن سیکٹر مکمل فعال اور زرعی معیشت خوشحال ہے۔

تفصیلات کے مطابق وفاقی وزیر برائے اطلاعات و نشریات فواد چوہدری کا کہنا ہے کہ پاکستان کی کرونا وائرس کے خلاف شاندار حکمت عملی کو دنیا نے سراہا، پاکستان میں دنیا کے مقابلے میں بہت بہتر حالات ہیں۔

فواد چوہدری کا کہنا ہے کہ سیاسی مخالفین کا کام مایوسی اور جھوٹ پھیلانا ہے، تحریک انصاف کارکنان حقائق بیان کرنے میں کردار ادا کریں، پاکستان کسی علیحدہ سیارے پر نہیں ہے۔

انہوں نے کہا کہ حقیقت یہ ہے ملک کی انڈسٹری بحال ہو چکی ہے، کنسٹرکشن سیکٹر مکمل فعال اور زرعی معیشت خوشحال ہے، آئی ٹی ایکسپورٹس میں 3 گنا اضافہ ہوا ہے۔ مزدور، کسان، انڈسٹری سب کی آمدنیوں میں اضافہ ہوا ہے۔

فواد چوہدری کا کہنا تھا کہ 6 سے 8 ماہ میں عالمی قیمتیں بھی نارمل ہونا شروع ہوجائیں گی۔

نومبر 8, 2021
کرونا وائرس کے بعد معیشت کی بحالی: آئی ایم ایف نے خبردار کردیا

واشنگٹن: عالمی مالیاتی ادارے (آئی ایم ایف) کا کہنا ہے کہ عدم مساوات اور مہنگائی کرونا وائرس سے ہونے والے نقصانات کی بحالی کو متاثر کر رہی ہے۔

بین الاقوامی ویب سائٹ کے مطابق عالمی مالیاتی فنڈ (آئی ایم ایف) نے خبردار کیا ہے کہ کرونا وائرس کی وجہ سے ہونے والے بحران کی بحالی میں رواں سال کمی آئے گی کیونکہ کئی ممالک بڑھتی ہوئی قیمتوں اور قرضوں کے بوجھ سے نمٹ رہے ہیں اور اس وجہ سے غریب ممالک امیر ممالک سے پیچھے جا رہے ہیں۔

آئی ایم ایف کے پاس اربوں ڈالر وبا سے متاثرہ ممالک کی بحالی میں مدد کر سکتے ہیں تاہم آئی ایم ایف کی مینجنگ ڈائریکٹر کرسٹلینا جارجیوا نے کہا ہے کہ اشیائے خور و نوش کی بڑھتی ہوئی قیمتوں اور ویکسین تک رسائی میں کمی ممالک پر بوجھ بن رہی ہے۔

کرسٹلینا جارجیوا نے کہا کہ وبائی امراض اور اس کے اثرات سے اب بھی معیشت کی بحالی میں مشکلات درپیش ہیں جس کی وجہ سے ہم ٹھیک طرح سے آگے بڑھ نہیں پا رہے۔

آئی ایم ایف اگلے ہفتے شرح نمو کا نیا فورکاسٹ جاری کرے گا تاہم انہوں نے کہا ہے کہ ہم امید کر رہے ہیں کہ رواں سال شرح نمو تھوڑی بہتر ہوگی جس کی جولائی میں پیشین گوئی چھ فیصد پر تھی۔

جارجیوا کا کہنا تھا کہ زیادہ تر ابھرتے ہوئے اور ترقی پذیر ممالک کو وبا سے بحال ہونے میں مزید برس لگیں گے، تاہم تاخیر سے بحالی طویل المدتی معاشی نقصانات سے بچنے کو اور بھی مشکل بنا دے گی۔ ملازمتوں کی تاخیر سے بحالی نوجوانوں، خواتین اور مزدوروں کو بالخصوص متاثر کر رہی ہے۔

اکتوبر 6, 2021
ہماری حکومت نے ملک کی معاشی سمت کو درست کیا: فواد چوہدری

اسلام آباد: وفاقی وزیر برائے اطلاعات و نشریات فواد چوہدری کا کہنا ہے کہ ہماری حکومت نے ملک کی معاشی سمت کو درست کیا، روزہ مرہ کی چیزوں میں اب استحکام نظر آنا شروع ہوا ہے۔

تفصیلات کے مطابق وفاقی وزیر برائے اطلاعات و نشریات فواد چوہدری نے پریس کانفرنس کرتے ہوئے کہا کہ ہمارے قرضے بے انتہا تھے، کرنٹ اکاؤنٹ خسارہ 20 ملین ڈالر تھا۔

فواد چوہدری کا کہنا تھا کہ گھر میں اخراجات زیادہ اور آمدنی کم ہو تو قرضے لینا پڑتے ہیں، ماضی میں ہم قرضوں پر قرضے لیے جا رہے تھے۔ ہماری حکومت نے ملک کی معاشی سمت کو درست کیا۔

انہوں نے کہا کہ ہم نے صنعتوں اور زراعت کو بحال کیا، روزہ مرہ کی چیزوں میں اب استحکام نظر آنا شروع ہوا ہے، گاڑیوں کی قیمتوں میں بہت کمی ہوگی۔ جو پہلی بار گاڑی لے رہے ہیں ان کے لیے زبردست اسکیم لائے ہیں۔

دوسری جانب وفاقی وزیر برائے صنعت و پیداوار خسرو بختیار نے نئی آٹو پالیسی متعارف کرواتے ہوئے کہا کہ پہلی بار گاڑی خریدنے والوں کے لیے ڈاؤن پیمنٹ 20 فیصد کردی گئی ہے۔

انہوں نے کہا کہ گاڑی کی لیز کے طریقہ کار کو بھی آسان کریں گے، جو بھی گاڑی خریدے گا اس کو اپنے نام پر رجسٹرڈ کروانا ہوگی، نئی پالیسی کے تحت 660 سی سی گاڑی کی قیمت ایک لاکھ 5 ہزار روپے کم ہوگی، 1000 سی سی گاڑیوں کی قیمت 1 لاکھ 42 ہزار روپے تک کم ہوگی۔

جولائی 7, 2021