لاہور : تحریک انصاف کے سربراہ عمران خان نے کہا ہے کہ اگر الیکشن کمیشن نے دھاندلی سے متعلق خط کاجواب نہ دیاتودوہفتے بعد دھرنے کی کال دیں گے۔
تفصیلات کے مطابق این اے ایک سو بائیس کے فیصلے پر خوشی سے نہال عمران خان نے الیکشن کمیشن کو الٹی میٹم دے دیا۔ این اے ایک سو بائیس پر اپنے موقف کی فتح پر کپتان خوشی سے سرشار نظر آئے۔
ان کا کہنا ہے کہ دھاندلی سے متعلق خط کاجواب نہ دیاتودوہفتے بعد دھرناہوگا،ان خیالات کا اظہار انہوں نے لاہور میں جشن منانے والے کارکنوں سے خطاب کرتے ہوئے کیا۔
کپتان جب خطاب کیلئے آئے تو شاندار استقبال ہوا، کپتان نے دھرنے میں ساتھ دینے والوں کو مبارک باد دی اور کہا کہ جدوجہد کا مقصد ووٹ کےتقدس کی بحالی ہےانشااللہ اگلے ہفتے تیسری وکٹ گرنےوالی ہے۔
عمران خان نے دھرنے کی واپسی کا عندیہ دیتے ہوئے کہا کہ الیکشن کمیشن نے خط کا جواب دو ہفتے میں نہ دیا تو ایسا دھرنا دیں گے کہ ایک سو چھبیس دن لوگ بھول جائیں گے۔
کپتان نے این اے ایک سو بائیس کے ووٹرز کو تیار ہونے کی ہدایت دیتے ہوئے کہا کہ نیوٹرل امپائرکھڑےکرواکرالیکشن لڑیں گے، عمران خان نے کہا ایاز صادق سے کوئی دشمنی نہیں اُن کا مقصد پاکستان میں الیکشن کانظام ٹھیک کرناہے۔
