کراچی : ننھے عبداللہ کو لینے کے لیے اس کا سوتیلا بھائی اور والد کراچی پہنچ گئے۔ عبداللہ جلد اپنے پیاروں کے درمیان ہوگا۔
تفصیلات کے مطابق دو دریا سے مبینہ طور پر ایدھی سینٹر پہنچائے جانے والے ننھے عبداللہ کی کہانی میں نیا موڑ آگیا۔ عبدللہ کے والد اور سوتیلا بھائی اسے لینے کے لیے کراچی پہنچ گئے۔
ننھے عبداللہ کو تو اپنی ماں کا انتظار ہے لیکن اب اسے ماں نہ مل سکے گی۔ عبداللہ کے سوتیلے بھائی انصر چوہدری نے فریئر تھانے میں بیان ریکارڈ کرادیاہے۔
میڈیا سے گفتگو کرتے ہوئے انہوں نے بتایا کہ والد کی طبعیت ٹھیک نہیں رہتی، ان کا کہنا تھا کہ گھر والوں کو بہت بعد میں معلوم ہوا کہ والد نے کراچی میں دوسری شادی کی ہوئی ہے۔
سوتیلے بھائی انصر چوہدری کا کہنا تھا کہ ہم تمام قانونی تقاضے پورے کریں گے اور پھر عبداللہ کو لے کر جائیں گے، تفتیشی افسر نے بتایا کہ کیس کے مرکزی کردار رضوان کا جرائم کا ریکارڈ موجود ہے، ننھا عبداللہ ابھی بھی اپنی ماں کا منتظر ہے۔
کمسن عبداللہ کے والد خانیوال میں رہائش پذیرہیں اور ان کی عبداللہ کی والدہ حلیمہ سے دوسری شادی تھی ،69 سالہ اقبال نے بیٹے کو لینے پر آمادگی ظاہر کردی ہے۔
ترجمان ایدھی سینٹر کے مطابق عبداللہ کے والد آج اسے لینے آسکتے ہیں۔ دوسری جانب معصوم عبداللہ کی ماں کے قتل کے مبینہ ملزم رضوان کا ابھی تک سراغ نہیں مل سکا۔
پولیس کا کہنا ہے کہ رضوان کی بیوی سونیا کی گرفتاری کے بعد اس کا ابتدائی بیان بھی قلم بند کرلیا گیا ہے۔ اطلاعات ہیں کہ رضوان بہت سی لڑکیوں سے بات چیت کرتا تھا جس کے حوالے سے تفیصلات جمع کی جا رہی ہیں۔
