اسلام آباد : معاون خصوصی ڈاکٹر ثانیہ نشتر کا کہنا ہے کہ 77لاکھ سے زائد گھرانے احساس راشن پورٹل پر رجسٹر ہوگئے، اہل گھرانےآٹا، دالوں، خوردنی تیل ،گھی پر ماہانہ ایک ہزار رعایت حاصل کریں گے۔
تفصیلات کے مطابق معاون خصوصی ڈاکٹر ثانیہ نشتر دورہ پشاور کے دوران وزیراعظم عمران خان کو احساس راشن رعایت رجسٹریشن کی پیش رفت پربریفنگ دیں گی، اس موقع پر وزیراعظم انجمن تاجران کےعہدیداران اور کریانہ الائنس وفدسے بھی ملیں گے۔
ڈاکٹر ثانیہ نشتر نے کہا ہے کہ احساس راشن رجسٹریشن ویب پورٹل پر 48.9 کروڑ کلک کیے گئےہیں، اب 77لاکھ سے زائد گھرانے راشن کے لیے رجسٹر ہو چکے ہیں۔
معاون خصوصی نے بتایا کہ گھرانے بذریعہ 8171 رجسٹر ہو سکتے ہیں، گھرانے کا کوئی بھی فرد8171پر رجسٹریشن کےلیےشناختی کارڈنمبربھیجے، شناختی کارڈ نمبرمتعلقہ رجسٹرموبائل سم سے بھیجنا ضروری ہے۔
ان کا کہنا تھا کہ احساس راشن رعایت پروگرام سے سے 2کروڑ خاندان مستفید ہوں گے جبکہ اہل گھرانےآٹا، دالوں، خوردنی تیل ،گھی پر ماہانہ ایک ہزار رعایت حاصل کریں گے۔
ڈاکٹر ثانیہ نے مزید کہا کہ کریانہ مالکان کی رجسٹریشن بذریعہ رجسٹریشن ویب پورٹل جاری ہے، نیشنل بینک رجسٹریشن کےلیےکریانہ دکانداروں کے بینک اکاؤنٹ کھول رہا ہے، کریانہ اسٹوزمالکان کو رعایتی رقم کےساتھ پرکشش کمیشن بھی دیا جائے گا۔
معاون خصوصی کا کہنا تھا کہ قرعہ اندازی میں کریانہ مالکان کو فی سہ ماہی گاڑیاں، موٹر سائیکل، موبائل اوردیگر انعام ملیں گے۔
