ریاض: آج دنیا بھر میں مسلمان عید الفطر منا رہے ہیں، مسجد الحرام اور مسجدِ نبوی میں عید کے سب سے بڑے اجتماعات منعقد ہوئے، جب کہ ریاض میں بارش کے دوران نماز عید ادا کی گئی۔
عرب میڈیا کے مطابق مسجد الحرام اور مسجد نبوی میں لاکھوں فرزندانِ اسلام نے نماز عید ادا کی، خادم حرمین شریفین شاہ سلمان نے امت مسلمہ کو عید کی مبارک باد دی، سعودی دارالحکومت ریاض میں نمازیوں نے بارش کے دوران عید الفطر کی نماز ادا کی۔
سعودی عرب کی مساجد میں نمازکی ادائیگی میں پاکستانی و دیگر غیر ملکی بھی شریک ہوئے۔ مسجد اقصیٰ میں بھی نماز عید کا روح پرور اجتماع ہوا جس میں لاکھوں افراد نے شرکت کی، ایران کے دارالحکومت تہران میں بھی عید کا بڑا اجتماع ہوا۔
ملک بھر میں آج عید الفطر مذہبی عقیدت و احترام سے منائی جا رہی ہے
برطانیہ اور امریکا میں بھی آج عید منائی جا رہی ہے، برطانوی وزیر اعظم نے رشی سونک نے مسلمانوں کو عید کی مبارک باد دی، بھارت اور بنگلادیش میں عید کل منائی جائے گی، جب کہ ترکیہ، آسٹریلیا سمیت یورپی ممالک میں بھی آج عید الفطر ہے۔
