کراچی: سٹی اسٹیشن کراچی سے آج روانہ ہونے والے پہلی عید اسپیشل ٹرین ایک بڑے حادثے سے بال بال بچ گئی، کوئٹہ ریلوے پولیس کے ایک اہل کار نے بروقت ٹرین کو حادثے سے بچا لیا۔
تفصیلات کے مطابق آج منگل کو پہلی عید اسپیشل ٹرین ریلوے اسٹیشن ہرک اور مچھ سائیڈنگ کے درمیان پہنچی تو کوچ کی ڈیسک بریک میں اچانک آگ لگ گئی، تاہم ریلویز پولیس کوئٹہ کے اے ایس آئی شفیق شہزاد نے اسے کسی بڑے حادثے سے بچا لیا۔
آگ لگنے پر ایسکارٹ انچارج اے ایس آئی شفیق شہزاد نے آگ بجھانے والے آلے کے ذریعے بر وقت قابو پایا، اور اہل کار کی بہادری اور ذمے داری کی بدولت سینکڑوں مسافر بڑے حادثے سے بچ گئے۔
آگ پر قابو پانے کے بعد ٹرین کو دن ساڑھے 12 کے قریب منزلِ مقصود کے لیے روانہ کیا گیا۔
واضح رہے کہ آج کراچی سے پہلی عید اسپیشل ٹرین سٹی اسٹیشن سے روانہ ہوئی تھی، کراچی سے پشاور جانے والی ٹرین میں 1202 مسافر سوار تھے، یہ ٹرین 13 کوچز پر مشتمل تھی، جس نے 28 اسٹیشنوں پر رکنا تھا۔
ریلوے ذرائع کا کہنا ہے کہ عید اسپیشل ٹرین سے ریلوے کو 32 لاکھ روپے کی آمدن ہوئی ہے، آج روانہ ہونے والی ٹرین کل رات 3 بجے پشاور پہنچے گی۔
