Tag: election 2018

کراچی: نادرا (نیشنل ڈیٹابیس اینڈ رجسٹریشن اتھارٹی) کے چیئرمین نے 16 جولائی سے پہلے موصول ہونے والی درخواستوں کے شناختی کارڈ قبل از انتخابات پرنٹ کرنے کی ہدایت جاری کردی۔

تفصیلات کے مطابق نادرا کے چیئرمین عثمان مبین کی زیرصدارت اجلاس ہوا جس میں انتخابات کے پیش نظر شناختی کارڈ کی بروقت اور جلد پرنٹنگ کا فیصلہ کیا گیا۔

اجلاس میں طے پایا کہ عام انتخابات سے قبل شناختی کارڈ کی ترسیل اور نادرا کے تمام دفاتر کھلے رہیں گے جبکہ ہنگامی بینادوں پر 16 جولائی سے قبل موصول ہونے والی درخواستوں کو 25 جولائی تک نمٹایا جائے گا۔

مزید پڑھیں: الیکشن کمیشن انتخابات 2018 کے نتائج نادرا سے منسلک موبائل سے وصول کرے گا

چیئرمین نادرا کو بریفنگ دی گئی کہ 16 جولائی سے شہریوں کے زائد المعیاد شناختی کارڈ ضبط نہیں کیے جارہے کیونکہ ایسے تمام افراد عام انتخابات میں ووٹ ڈالنے کے اہل ہیں۔

چیئرمین نے ملک بھرمیں نادرا سینٹرز ہفتہ  اور اتوار کے روز رات 9بجے تک جبکہ 25 جولائی کو دفاتر دوپہر 2 بجے تک کھولنے کی ہدایت دی۔

اجلاس میں فیصلہ کیا گیا کہ شناختی کارڈ کی چھپائی 24 گھنٹے جاری رہے گی اور اگر کسی شہری کو 25 جولائی کے بعد کی تاریخ دی گئی تھی تو اسے پہلے ہی کارڈ جاری کردیا جائے گا۔

یہ بھی پڑھیں: نادرا نے قومی شناختی کارڈ کی فیس میں اضافہ کردیا

ترجمان نادرا کا کہنا ہے کہ تمام نارمل درخواستوں کو ایگزیکٹو کیٹگری میں ڈال دیا گیا تاکہ انتخابات سے قبل اُن کی ترسیل کو یقینی بنایا جائے اور متعلقہ کوریئر کمپنیوں کو بھی بہتر سروس فراہم کرنے کی ہدایت جاری کی گئی۔

یاد رہے کہ ملک بھر میں 25 جولائی کو عام انتخابات کا انعقاد کیا جارہا ہے جس میں 10کروڑ 59 لاکھ اور 60 ہزار ووٹرز اپنا حق رائے دہی استعمال کریں گے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

کراچی: ایم کیو ایم پاکستان کے سربراہ ڈاکٹر خالد مقبول صدیقی نے کہا ہے کہ انتظامیہ کہیں بھی جلسے کی اجازت نہیں دے رہی، اگر ہمیں الیکشن کی اجازت نہیں تو اپنا لائحہ عمل طے کرلیتے ہیں۔

ایم کیو ایم پاکستان کے مرکز بہادرآباد میں پریس کانفرنس کرتے ہوئے خالد مقبول صدیقی کا کہنا تھا کہ جو جماعت 35 سال سے85 فیصدمینڈیٹ رکھتی ہے وہی تر جیح ہونی چاہیے، ہم نے باغ جناح پر جلسہ کرنے کی درخواست سب سے پہلے انتظامیہ کو دی مگر ابھی تک پروگرام کرنے کی اجازت نہیں دی گئی۔

اُن کا کہنا تھا کہ باغ جناح کے علاوہ ایم کیو ایم نے لیاقت آباد فلائی اوور پر جلسہ کرنے کی اجازت مانگی وہ بھی نہیں دی گئی، نگراں حکومت اور اتنظامیہ  بتائےکیاہمیں الیکشن کی اجازت نہیں ہے؟  اگرہمیں ایسا ہی ہے تو ہم اپنالائحہ عمل طےکرلیتےہیں۔

مزید پڑھیں: عوام کو تحفظ فراہم کرنا ریاست کی ذمہ داری ہے، خالد مقبول صدیقی

خالد مقبول صدیقی کا کہنا تھا کہ ایم کیوایم  کےکارکنوں کی بلاجواز گرفتاریوں کو سلسلہ تاحال جاری ہے اور ہمیں انتخابی مہم چلانے کے لیے بھی برابری کا موقع فراہم نہیں کیا گیا۔

ایم کیو ایم پاکستان کے سربراہ کا کہنا تھا کہ الیکشن کمیشن کا ضابطہ اخلاق صرف متحدہ کے لیے ہے ؟ کیونکہ کل میرپور خاص میں جلسہ کرنے کی اجازت مانگی وہ بھی انتظامیہ نے نہیں دی جبکہ سہولت یافتہ تنظیم کو کل ریلی نکالنے کی اجازت مل گئی، اس طرح کے اقدامات اور پھرتیاں بتاتی ہیں کہ ماحول ہمارے لیے نہیں ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

پنڈی گھیپ: مسلم لیگ ن کے صدر اور سابق وزیر اعلیٰ پنجاب شہباز شریف نے کہا ہے کہ  اگر عوام نے دوبارہ منتخب کیا اور اللہ نے موقع دیا تو پاکستان کو ترکی اور ملیشیا بنادوں گا۔

پنڈی گھیپ میں جلسہ عام سے خطاب کرتے ہوئے شہباز شریف کا کہنا تھا کہ ملک کو اور ایٹمی قوت بنانے اور مسائل سے نکالنے والے لیڈر کو بیٹی کے سامنے گرفتار کیا گیا۔

اُن کا کہنا تھا کہ مسلم لیگ ن کو حکومت ملی تو معیشت کا برا حال تھا مگر ہم نے اقدامات کیے اور مسائل پر قابو پایا، ہمارے دور میں ڈالر 100 روپے کا تھا مگر آج  130 روپے تک پہنچ گیا۔

شہباز شریف کا کہنا تھا کہ ہمارے دور میں چکوال اور اٹک میں اسپتال بنائے گئے، ہم نے  چھوٹے کسانوں کو بلا سود قرضے فراہم کیے، اگر عوام نے دوبارہ موقع دیا توپاکستان کو ترکی اورملیشیا بنادوں گا۔

مسلم لیگ ن کے صدر کا کہنا تھا کہ  سی پیک کامغربی روٹ یہاں سے گزرہا ہے، اٹک، چکوال میں نوجوانوں کے روزگار اس علقے میں انڈسٹریل اسٹیٹ لاؤں گا اور اگر اللہ نے موقع دیا تو ایک ایک گاؤں میں سوئی گیس لاؤں گا،  دانش اسکول کا وعدہ میڈیکل کالج کاوعدہ پوراکیا، اب ضلع اٹک میں ٹیکنیکل یونیورسٹی تعمیر کی جائیں گی۔

تحریک انصاف کے چیئرمین پر تنقید کرتے ہوئے شہباز شریف کا کہنا تھا کہ  عمران خان نے فراڈ کمپنی کوپشاور میٹرو کا ٹھیکہ دیا،  پنجاب حکومت اگر  ایسا کرتی تو نیب ہمیں فوری کالے پانی کی سزا دیتی۔ انہوں نے مزید کہا کہ عمران خان نے خیبرپختونخوا کا بیڑہ غرق کردیا، الزام خان کے دماغ کی طرح ان کا جلسہ بھی خالی ہوتا ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔