کراچی / لاہور : ملک میں سیاسی درجہ حرارت بڑھ گیا، بڑے بڑے سورما میدان مارنے کیلئے تیار بیٹھے ہیں، منجھے ہوئے کھلاڑی آمنے سامنے آگئے۔

طبل جنگ بج گیا، ملک میں الیکشن کا مہا مقابلہ ہونے جارہا ہے، بڑے بڑے سورما ایک دوسرے کیخلاف میدان مارنے کیلئے تیار کھڑے ہیں۔

لاہور میں عمران خان اور سعد رفیق مدمقابل ہیں تو ملتان میں یوسف رضا گیلانی، جاوید ہاشمی اور شاہ محمود قریشی قسمت آزما رہے ہیں، کراچی کے ایک حلقے پرعارف علوی، فاروق ستار، مصطفیٰ کمال، پرویز مشرف اور محمد حسین محنتی آمنے سامنے ہیں۔

اس کے علاوہ ن لیگ کے ممکنہ امیدواروں کی فہرست بھی سامنے آگئی ہے، این اے ایک سو بانوے میں شہباز شریف کا مقابلہ پی ٹی آئی کے محمد خان لغاری سے ہے۔

ن لیگی صدر این اے ایک سو بتیس سے بھی میدان میں ہیں، این اے ایک سو پچیس لاہور پر گھمسان کا رن پڑے گا۔ مریم نواز کے مدمقابل پی ٹی آئی کی ڈاکٹر یاسمین راشد، این اے ایک سو چوبیس پر حمزہ شہباز اور کھلاڑی نعمان قیصر آمنے سامنے ہیں۔

این اے ایک سو اکتیس پر بہت بڑا مقابلہ ہوگا۔ عمران خان کا جوڑ سعد رفیق سے پڑے گا، این اے ایک سو آٹھ پر عابد شیر علی اور پی ٹی آئی کے فرخ حبیب مدمقابل ہیں، این اے ایک سو چھ پر رانا ثناء اور پی ٹی آئی کے ناصر جٹ میدان میں ہیں، این اے ایک سو چھپن ملتان میں سیاسی میدان کے تین سورما آمنے سامنے ہیں۔

یوسف رضا گیلانی، جاوید ہاشمی اور شاہ محمود قریشی قسمت آزمارہے ہیں، این اے چھ دیر امیر جماعت اسلامی کا مقابلہ پی ٹی آئی کے محبوب شاہ سےہوگا، این اے چوبیس چارسدہ پر اسفند یار ولی اور پی ٹی آئی کے فضل محمد خان آمنے سامنے ہیں۔

این اے پچیس نوشہرہ پر پرویز خٹک کا مقابلہ عائشہ گلالئی سے ہوگا، این اے دو سو چھیالیس کراچی میں بلاول بھٹو اور ن لیگی سلیم ضیا مدمقابل ہیں، این اے دو سو سینتالیس کراچی پر عارف علوی، فاروق ستار، مصطفیٰ کمال، پرویز مشرف اور محمد حسین محنتی میں مقابلہ ہے۔

این اے دو سو تینتالیس پر مصطفیٰ کمال اور عمران خان میں ٹاکرا ہوگا، این اے دو سو اکسٹھ جعفر آباد میں میرظفراللہ جمالی کامقابلہ پیپلزپارٹی کے چنگیز جمالی سے ہوگا محمود اچکزئی این اے دو سو ترسٹھ پر بی اے پی کے خالق اچکزئی کے مدمقابل ہیں۔