ملتان: این اے 149کے ضمنی انتخابات میں پولنگ عملے کی شکایت کے بعد الیکشن کمیشن نے عام سیاہی کے استعمال کی وضاحت کر دی ہے۔
الیکشن کمیشن کی جانب سے جاری وضاحت میں کہا گیا ہے کہ ملتان کے حلقہ این اے ایک سو اننچاس میں ہونے والے ضمنی انتخاب میں عام سیاہی کا استعمال کیا جارہا ہے، اس سے قبل پولنگ بوتھس پرموجودعملے نے شکایت کی تھی کہ اُسے مقناطیسی سیاہی فراہم نہیں کی گئی۔
الیکشن کمیشن کا کہنا ہے کہ عام سیاہی سے انگوٹھے کے پرنٹ کے نشان پڑھے جاسکتے ہیں، قانون کے مطابق انتخابات میں مقناطیسی سیاہی استعمال کی جانی چاہیئے کیوں کہ مقناطیسی سیاہی انمٹ ہوتی ہے اوراُس سے انتخابات میں دھاندلی کا امکان کم ہوجاتا ہے۔
عام سیاہی کے استعمال سے انتخابات میں دھاندلی کا الزام لگنے پر ووٹوں کی تصدیق نہیں کی جاسکے گی۔
الیکشن کمیشن آف پاکستان کے مطابق عام انتخابات دوہزار تیرہ میں مقناطیسی سیاہی کا استعمال کیا گیا تھا جوکہ چار سے چھ گھنٹے تک ہی مؤثررہی تھی، جس کی وجہ سے ضمنی انتخابات میں عام سیاہی استعمال کی جارہی ہے۔
