اسلام آباد: الیکشن کمیشن آف پاکستان نے الیکشن ایکٹ میں ترامیم تجویز کر دی ہیں۔
تفصیلات کے مطابق چیف الیکشن کمشنر سکندر سلطان راجہ نے اسپیکر قومی اسمبلی راجہ پرویز اشرف کو ایک خط لکھ کر الیکشن ایکٹ 2017 کی شق 57 اور سیکشن 58 میں ترامیم تجویز کر دی ہیں۔
چیف الیکشن کمشنر نے مجوزہ ترامیم کی پارلیمنٹ سے منظوری کی درخواست بھی کی۔
انھوں نے خط میں لکھا کہ الیکشن کی تاریخ کا اختیار 1976 کے آئین اور قانون کے تحت الیکشن کمیشن کے پاس ہی تھا، 1985 میں ضیا مارشل لا کے دور میں یہ اختیار الیکشن کمیشن سے لے لیا گیا۔
انھوں نے تجاویز میں کہا کہ عام انتخابات کی تاریخ کا اعلان الیکشن کمیشن کرے گا، آفیشل گزٹ میں نوٹیفکیشن جاری ہوگا، الیکشن کمیشن حلقوں سے کہے گا کہ وہ اپنے نمائندے منتخب کریں، وقتاً فوقتاً الیکشن کمیشن اس نوٹیفکیشن کے اجرا کے بعد اس میں ترامیم بھی کر سکے گا۔
مجوزہ ترمیم کے مطابق الیکشن کمیشن ایک نیا الیکشن پروگرام اور نئی تاریخ بھی دے سکے گا، کمیشن تحریری طور پر اس کی وجوہات اور اپنی رائے بھی دے گا۔
مراسلے میں چیف الیکشن کمشنر کا کہنا تھا کہ کمیشن کی رٹ کو ختم کیا جا رہا ہے، ڈسکہ سمیت دیگر اہم کیسز میں الیکشن کمیشن کو قانونی کارروائی سے روکا گیا، ڈسکہ میں الیکشن کمیشن نے بدعنوان افسران کو مثالی سزائیں دی تھیں، لیکن ان افسران کے خلاف انکوائری کو ختم کیا گیا اور ان کو اسٹے دیا گیا۔
چیف الیکشن کمشنر نے کہا الیکشن کمیشن کی رٹ کو اہم کیسز میں ختم کر دیا گیا، اور بیوروکریسی کو یہ پیغام دیا گیا کہ الیکشن کمیشن آپ کا کچھ نہیں بگاڑ سکتا، کیا کمزور الیکشن کمیشن صاف شفاف انتخابات کے لیے حکومتی مشینری سے رٹ قائم کرا سکتا ہے؟
انھوں نے کہا کہ الیکشن کمیشن ہی ملک میں شفاف انتخابات کا انعقاد کو یقینی بنا سکتا ہے لیکن صاف شفاف انتخابات کے لیے جو اختیار الیکشن کمیشن کو تھا وہ رفتہ رفتہ ختم کر دیا گیا ہے۔
