لاہور : وفاقی وزیر اطلاعات پرویز رشید نے کہا ہے تحریک انصاف کے سربراہ عمران خان لاہور کا ضمنی انتخاب ماضی کی طرح ہی ہاریں گے۔
ان کا کہنا ہے کہ وزیر اعظم نواز شریف جنرل اسمبلی میں بھارت کی جانب سے سرحدی حدود کی خلاف ورزیوں کا معاملہ اٹھائیں گے۔
ان خیالات کا اظہار انہوں نے لاہور کے چائلڈ پروٹیکشن بیورو میں یتیم اور بے سہارا بچوں سے عید ملنے کے بعد میڈیا سے گفتگو کرتے ہوئے کیا۔
پرویز رشید نے کہا تحریک انصاف کے چیئرمین نے لاہور سے جتنی بار الیکشن مین حصہ لیا انھیں شکست ہی ہوئی ہے اور اس بار بھی تحریک انصاف لاہور سے کامیاب نہیں ہوگی۔
ان کا کہنا تھا کہ عمران خان لاہور آ رہے ہیں تو انہیں اس کی کوئی فکر نہیں، البتہ ضمنی انتخاب کا نتیجہ وہی ہوگا جو گزشتہ تین انتخابات میں ہوا ہے۔
پروزیر رشید نے کہا کہ پاکستان میں دہشت گردی عالمی دنیا کی کشمکش کے باعث ہوئی اور اس وقت بدقسمتی سے غیر نمائندہ حکومت تھی۔
انھوں نے کہا کہ دہشت گردی کے لئے استعمال ہونے والی سرزمین کے حوالے سے قانون سازی کی گئی ہے اور ہمسایہ ممالک نے بھی یقین دہانی کروائی ہے کہ ان کی سرزمین دہشت گردی کے لئے استعمال نہیں ہوگی۔
انھوں نے کہا کہ ملک میں ماضی کی نسبت دہشت گردی میں کمی ہوئی ہے۔ قومی مفاد پر سب ایک ہیں۔ دہشت گردی کے خاتمے پر بھی متفق ہیں نہ کوئی کسی سے ناراض ہے نہ غصے میں ہے۔ سندھ اور وفاقی حکومت مل کر کام کر رہی ہیں۔
اس موقع پر ان کا کہنا تھا کہ بچوں کے حقوق کے لئے چائلڈ پروٹیکشن بیورو کا اہم کردار ہے ۔۔دکھی اور معصوم بچوں کے چہروں پر مسکراہٹ دیکھ کر دلی خوشی ہوئی ہے۔
