Tag: Election

سرگودھا: پاکستان تحریک انصاف کے چیئر مین عمران خان نے کہا ہے کہ اس میں کسی کو شک نہیں ہونا چاہئے کہ قوم جاگ چکی ہے، اس کا ثبوت آج کا جلسہ ہے، میں سرگودھا کے عوام کا شکریہ ادا کرتاہوں،اور منظم جلسہ کرنے پر انتظامیہ کو مبارکباد دیتا ہوں،

ان خیالات کا اظہار انہوں نے سرگودھا میں ایک بہت جلسہ عام سے خطاب کرتے ہوئے کیا،عمران خان نے کہا کہ میرے گھر کی بجلی کاٹی گئی اس لئے کہ میں نے بجلی کا بل نہیں بھرا، اور میں نے اپنے گھر کا بجلی کا بل جلا دیا۔

میں نے بل اس لئے جلایا کہ نواز شریف دور میں اسی فیصد بجلی کے ریٹ بڑھائے گئے،لیکن ایک سال بعد بھی نہ تو لوڈشیڈنگ میں کمی آئی اور نہ ہی بجلی کی قیمت کم ہوئی،۔

انہوں نے کہا کہ پارلیمنٹ ہاؤس پر ایک کروڑ، وزیر اعظم ہاؤس پر پانچ کروڑ پریذیڈنٹ ہاؤس پر ایک کروڑ روپے کے بجلی کے بل واجب الادا ہیں لیکن ان کی بجلی نہیں کاٹی گئی۔

عمران خان نے کہا کہ ہم اس ظالم نظام کیخلاف جنگ لڑ رہے ہیں تین سو چوراسی ارب روپے کی بجلی چوری ہورہی ہے اور یہ پیسہ عوام کی جیبوں سے لیا جا رہا ہے اگر آپ اس نظام کیخلاف نہیں کھڑے ہوئے تو بجلی اسی طرح مہنگی ہوتی رہے گی۔

عمران خان کا کہنا تھا کہ جب تک نواز شریف مستعفی نہیں ہوں گے دھرنا جاری رہے گا،انہوں نے اعلان کیا کہ اگلے جمعے کو گجرات میں جلسے سے خطاب کروں گا،

انہوں نے کہا کہ عوام الیکشن کی تیاری کر لیں اگلا سال الیکشن کا سال ہوگا انہوں نے مسلم لیگ اور پیپلز پارٹی کے کارکنان کو مخاطب کرتے ہوئے کہا کہ اگر آپ کو اپنے بچوں کے مستقبل کی فکر ہے تو آپ آصف زردا ری اور نواز شریف سے کیوں نہیں پوچھتے کہ ان کے پاس اتنا پیسہ کہا ں سے آیا ،

عمران خان نے کہا کہ آج سے چھ سال پہلے قرضہ تینتیس ہزار روپے فی پاکستانی تھا جو آج بڑھ کر اٹھاسی ہزار روپے ہوگیا ہے،یہ قرضہ عوام اپنے خون پسینے کی کمائی سے دیں گے کیوں کہ ہرچیز مہنگی ہوجائے گی۔

انہوں نے کہا کہ مک مکا کی سیاست کا نتیجہ ملتان میں نکل آیا ہے اتنی بڑی پیپلز پارٹی کے امیدوار کی ضمانت ضبط ہوگئی۔پیپلز پارٹی والے کب تک ذوالفقار علی بھٹو کا نام استعمال کرینگے۔