گلگت: گلگت بلتستان کے حلقے جی بی ایل اے 3 میں ملتوی ہونے والی پولنگ آج شروع ہو چکی ہے۔
اے آر وائی نیوز کے مطابق حلقہ جی بی ایل اے تھری میں پولنگ صبح 8 بجے شروع ہوئی، پولنگ کا عمل بغیر کسی وقفے کے شام 5 بجے تک جاری رہے گا، اس حلقے میں پی ٹی آئی امیدوار جعفر شاہ کے انتقال کے باعث پولنگ ملتوی کی گئی تھی۔
سب سے پہلا ووٹ جی بی اے 3 سٹی گرامر پولنگ اسٹیشن میں کاسٹ کیاگیا، اس پولنگ اسٹیشن میں 1205 ووٹرز اپنا ووٹ کاسٹ کریں گے۔
الیکشن کمیشن کے مطابق ووٹنگ کے لئے تہتر پولنگ اسٹیشن قائم کئے گئے ہیں، جن میں مردوں کے31،خواتین کے35اور7مشترکہ پولنگ اسٹیشنز ہیں، مجموعی طور پر ڈیڑھ سو پولنگ بوتھ بنائے گئے ہیں، جن میں 81مردوں کےلئےجبکہ 69 خواتین کے لئے مختص کئے گئے ہیں۔
حلقہ نمبر3میں رجسٹرڈ ووٹرزکی تعداد41ہزار360ہے، جن میں مرد ووٹرزکی تعداد 22ہزار341 اورخواتین ووٹرز کی تعداد 19 ہزار 19ہے۔
یہ بھی پڑھیں: گلگت بلتستان انتخابات : پی ٹی آئی کی شاندار فتح، ن لیگ کی چوتھی پوزیشن
جی بی ایل اے تھری میں آٹھ آزاد سمیت پندرہ امیدواروں میدان میں ہیں، پی ٹی آئی نے مرحوم جعفرشاہ کی جگہ ان کے بیٹے سہیل عباس کوٹکٹ دیا ہے، ن لیگ نےذوالفقارعلی اور ق لیگ نےکیپٹن (ر)محمدشفیع کومیدان میں اتاراہے، پیپلزپارٹی کےصوبائی نائب صدر آفتاب حیدر اس حلقےسے امیدوارہیں اور سابق وزیر تعمیرات محمد اقبال بھی آزاد امیدوارکی حیثیت سے مقابلے میں شامل ہیں۔
واضح رہے کہ گلگت بلتستان حکومت کی تشکیل نو کے لئے تحریک انصاف نے اپنی تعداد پوری کرلی ہے۔
