ARYNews.tv | Urdu – Har Lamha Bakhabar

Tag: Election

  • مقبوضہ کشمیر میں انتخابی ڈرامہ مسترد ہونے پر بھارت سیخ پا

    مقبوضہ کشمیر میں انتخابی ڈرامہ مسترد ہونے پر بھارت سیخ پا

    سری نگر: مقبوضہ کشمیر میں انتخابی ڈرامہ مسترد ہونے پر بھارت سیخ پا ہوگیا، قابض بھارتی فوج نے2درجن سےزائد نوجوانوں کوحراست میں لے لیا۔

    تفصیلات کے مطابق بھارت میں پارلیمانی انتخابات کا سلسلہ جاری ہے، مقبوضہ کشمیر میں بھی نام نہاد پولنگ ہوئی تاہم کشمیریوں نے مکمل بائیکاٹ کیا۔

    بھارتی انتخابات کا نائیکاٹ کرنے پر قابض فوج ہٹ دھرمی پر اتر آئی، مختلف علاقوں میں جارحیت کا مظاہرہ کرتے ہوئے درجنوں کشمیریوں کا حراست میں لے لیا۔

    جھوٹے الزامات میں سری نگر، بارہ مولااور کپواڑہ جیل میں قید کیا گیا، زیرحراست افراد میں پی ایچ ڈی اسکالر ڈاکٹر ہلال احمد بھی شامل ہیں۔

    حریت کانفرنس نے عالمی برادری سے بھارتی مظالم کا نوٹس لینے کا مطالبہ کیا ہے، جبکہ اعلامیے میں کہا گیا ہے کہ بھارتی انتخابی ڈرامہ بے نقاب ہوگیا۔

    مقبوضہ کشمیر میں بھارت کے نام نہاد پارلیمانی انتخابات کے چوتھے مرحلے کے موقع پر ضلع کو لگام میں دو روز قبل تمام ترسرگرمیاں معطل رہیں۔

    دوسری جانب تحریک حریت جموں وکشمیر کے چیئرمین محمد اشرف صحرائی نے الیکشن کا بائیکاٹ کرتے ہوئے اپنے بیان میں کہا تھا کہ وہ مقبوضہ کشمیر اور بھارت کی جیلوں میں اپنی ٹیمیں بھیجیں تاکہ وہاں قید کشمیر کے سیاسی قیدیوں کی حالت زار کا اندازاہ لگایا جاسکے۔

    بھارت میں جاری انتخابات کا چوتھا مرحلہ مکمل

    یاد رہے کہ بھارتی الیکشن کے پہلے مرحلے بالشمول مقبوضہ کشمیر سمیت مختلف ریاستوں میں پرتشدد واقعات میں چار افراد ہلاک اور متعدد زخمی ہوئے تھے۔

  • انڈونیشیا: انتخابی عملے کے تین سو اہل کاروں کی ہلاکت معما بن گئی

    انڈونیشیا: انتخابی عملے کے تین سو اہل کاروں کی ہلاکت معما بن گئی

    جکارتا: انڈونیشیا میں منعقد ہونے والے انتخابات سرکاری عملے کے لیے خونیں ثابت ہوئے.

    تفصیلات کے مطابق انڈونیشیا میں ہونے والے انتخابات میں خدمات انجام دینے والے تین سو کے قریب اہل کار اپنی زندگی کی باز ہار گئے.

    اس پراسرار واقعے کی کوئی واضح توجیہہ سامنے نہیں آئی ہے، البتہ انتظامیہ کی جانب سے موقف اختیار کیا گیا ہے کہ اموات تھکن اور بیماریوں کی وجہ سے ہوئیں۔

    انڈونیشیا کے الیکشن حکام کے مطابق رواں ماہ ہونے والے انتخابات میں خدمات سرانجام دینے والے 287 پولنگ اسٹیشن ملازمین اور 18 پولیس اہل کار جان سے ہاتھ دھو بیٹھے، اس کی وجہ کام کا دباؤ اور ضرورت سے زیادہ ذمے داریوں کو ٹھہرایا گیا،

    اس واقعے نے پورے ملک میں سنسنی پھیلا دی ہے. یاد رہے کہ انڈونیشیا میں بھی پاکستان کے مانند ایک ہی دن میں انتخابات ہوتے ہیں.

    اس سانحے کے بعد یہ مطالبہ زور پکڑ رہا ہے کہ انتخابات کو پورے ملک میں ایک ہی روز کرانے کی روش تبدیل کی جائے۔

    حیران کن بات یہ ہے کہ ان ہلاکتوں کے علاوہ دو ہزار سے زاید عملے کو مختلف بیماریوں نے آن لیا،  انتخابات میں 26 کروڑ افراد نے اپنا حق رائے دہی استعمال کیا تھا.

    خیال رہے کہ انڈونیشیا کے صدر جوکو ویدودو صدارتی انتخاب میں ایک بار پھر کامیاب ہوگئے  ہیں، انہوں نے 54 فیصد ووٹ حاصل کیے۔

  • اسپین تاریخ کے اہم موڑ‌پر، پارلیمانی انتخابات کل ہوں گے

    اسپین تاریخ کے اہم موڑ‌پر، پارلیمانی انتخابات کل ہوں گے

    بارسلونا: اسپین اپنی تاریخ کے اہم موڑ پر پہنچ گیا، پارلیمانی انتخابات کل 28 اپریل کو ہوں گے.

    تفصیلات کے مطابق اسپین میں‌ انتخابی معرکہ کل ہونے جا رہا ہے، جس میں‌ بہ ظاہر انتہائی دائیں بازو کی جماعت کا پلڑا بھاری دکھائی دے رہا ہے.

    سبکدوش ہونے والے سوشلسٹ وزیر اعظم پیدرو سانچیز نے عوام کو متنبہ کیا ہے کہ کل ہونے والے الیکشن میں انتہائی دائیں بازو کی سیاسی جماعت کو غیر معمولی عوامی تائید حاصل ہو سکتی ہے۔

    اسپین کے سینتیس ملین رجسٹرڈ ووٹر اپنا حق رائے دہی استعمال کریں گے. اس ضمن میں انتظامات مکمل ہوچکے ہیں.

    جرمن خبر رساں ادارے کے مطابق تمام پولنگ اسٹیشنوں پر ووٹنگ صبح 9 بجے سے شام 8 بجے تک جاری رہے گی۔ اس موقع پر سیکیورٹی کے سب انتظامات کیے جائیں گے.

    مزید پڑھیں: بریگزٹ : اسپین نے 4 لاکھ برطانوی شہریوں کو شہریت دینے کا اعلان کردیا

    ابتدائی انتخابی نتائج پولنگ ختم ہونے کے چند گھنٹوں بعد سامنے آنا شروع ہو ں گے اور چند گھنٹوں میں صورت حال واضح ہوجائے گی۔

    ابتدائی جائزوں کے مطابق سوشلسٹ پارٹی کی جیت کے امکانات ہیں، البتہ شاید کوئی پارٹی واضح اکثریت حاصل نہ کرسکے، ماہرین مخلوط حکومت کے امکانات پر بات کر رہے ہیں.

  • بھارت میں عام انتخابات، تیسرا مرحلہ مکمل ہوگیا

    بھارت میں عام انتخابات، تیسرا مرحلہ مکمل ہوگیا

    نئی دہلی: بھارت میں جاری عام انتخابات کا تیسرا مرحلہ بھی مکمل ہوگیا، پولنگ کے دوران پرتشدد واقعات میں درجنوں افراد زخمی ہوئے۔

    تفصیلات کے مطابق بھارتی انتخابات کے تیسرے مرحملے میں 15 ریاستوں کی 117 نشستوں پر ووٹنگ کا عمل مکمل ہوگیا ہے، ریاست گجرات میں وزیراعظم نریندر مودی کے حلقے اور ریاست کیرلا میں اپوزیشن رہنما راہول گاندھی کے حلقے میں بھی ووٹنگ ہوئی۔

    غیر ملکی خبر رساں ادارے کا کہنا ہے کہ ان پندرہ ریاستوں میں 18 کروڑ 80 لاکھ رجسٹرڈ ووٹرز ہیں، پولنگ کے دوران عورتوں سمیت بوڑھوں نے بھی اپنے ووٹ کاسٹ کیے۔

    اس دوران سیاسی جماعتوں کے رہنماؤں کے درمیان تصادم بھی ہوا، جس کے باعث متعدد افراد زخمی ہوئے، کئی علاقوں میں جلاؤ گھیراؤ بھی ہوا۔

    بھارتی وزیراعظم نریندر مودی سخت سیکیورٹی میں ووٹ کاسٹ کرنے کے لیے اپنے حلقے کے پولنگ اسٹیشن پہنچے تھے، بی جے پی کے صدر امت شاہ ان کے ہمراہ تھے۔

    یاد رہے کہ 11 اپریل سے شروع ہونے والے بھارتی انتخابات 7 مرحلوں پرمشتمل ہیں جو 6 ہفتوں تک جاری رہنے کے بعد 19 مئی کو اختتام پذیر ہوں گے جبکہ ووٹوں کی گنتی 23 مئی کو کی جائے گی۔

    بھارت کے 17ویں انتخابات میں مجموعی طور پر 89 کروڑ 89 لاکھ ووٹرز اپنا حق رائے دہی استعمال کریں گے۔

    بھارتی ریاست مغربی بنگال کے مختلف پولنگ بوتھ پر کشیدگی، ایک شخص ہلاک، متعدد زخمی

    خیال رہے کہ بھارتی الیکشن کے پہلے مرحلے بالشمول مقبوضہ کشمیر سمیت مختلف ریاستوں میں پرتشدد واقعات میں چار افراد ہلاک اور متعدد زخمی ہوئے تھے۔

  • بھارتی الیکشن کمیشن نے وزیراعظم مودی پر بنی ویب سیریز روک دی

    بھارتی الیکشن کمیشن نے وزیراعظم مودی پر بنی ویب سیریز روک دی

    نئی دہلی : بھارتی انتخابات کے نگراں نے بولی وڈ کی فلم اور وزیر اعظم کی جماعت کے ٹی وی چینلز پر پابندی کے بعد پروڈیوسرز کو نریندر مودی پر بنی ویب سیریز روکنے کے احکامات جاری کردئیے۔

    غیر ملکی خبر رساں ادارے کی رپورٹ کے مطابق دنیا کی دوسری بڑی آبادی والے ملک میں انتخابات منعقد کرانے اور اس کی نگرانی کرنے والے خود مختار ادارے بھارتی الیکشن کمیشن کا کہنا تھا کہ آن لائن ویب سیریز قواعد کی خلاف ورزی ہے۔

    بھارتی الیکشن کے قواعد کے مطابق ووٹنگ کے وقت کے دوران مہم یا پروپگینڈا کے حوالے سے کسی بھی مواد کے شائع کیے جانے کی اجازت نہیں۔ اس کے علاوہ کسی بھی سیاسی تشہیر کو بھی الیکشن کمیشن سے منظور کرانا پڑتا ہے تاکہ تمام اخراجات کا احتساب ہوسکے۔

    غیر ملکی خبر رساں ادارے کا کہنا تھا کہ بھارت کے 6 ہفتوں پر مشتمل ووٹنگ کے عمل کا آغاز 11 اپریل کو ہوا اور یہ 19 مئی تک جاری رہے گا جس کے نتائج 23 مئی کو آنے کی امید کی جارہی ہے۔

    آن لائن ویب سیریز کی اسٹریمنگ روکتے ہوئے الیکشن کمیشن کا کہنا تھا کہ کوئی بھی ایسا مواد جس سے یکساں مواقع فراہم نہ ہوں کو انتخابات کے مکمل ہونے تک شائع نہیں کیا جانا چاہیے۔

    نریندر مودی کے بچپن سے دنیا کے سب سے بڑے جمہوری ملک کے وزیر اعظم بننے تک کے سوانح حیات پر بننے والے ویب سیریز ’مودی: جرنی اف اے کامن مین‘ کو ایروس ناو نے پروڈیوس کیا۔

    قبل ازیں رواں ماہ الیکشن کمیشن نے مودی پر بننے والی فلم پر ووٹنگ کا عمل ختم ہونے تک پابندی عائد کردی تھی۔ چند روز بعد ہی کمیشن نے 24 گھنٹے نریندر مودی اور ان کی جماعت کے رہنماو ں کی ریلیوں، تقاریر، گانے دکھانے والے نامو ٹی وی پر پابندی عائد کی تھی۔

    الیکشن کمیشن کا کہنا تھا کہ نامو ٹی وی کو اپنا تمام مواد منظوری کے لیے جمع کرانا ہوگا۔ 68 سالہ ہندو قوم پرست نریندر مودی دوبارہ حکومت بنانے کے لیے جدو جہد کر رہے ہیں۔

    الیکشن کمیشن، جس پر غیر موثر ہونے کا الزام عائد کیا جاتا ہے، میں مارچ میں مہمات کے آغاز پر شکایتوں کی بھرمار کی گئی۔گزشتہ ہفتے بھارتی سپریم کورٹ نے الیکشن کمیشن سے سیاسی رہنماوں کی انتخابی خلاف ورزیوں کے حوالے سے شکایات پر بروقت اقدامات کرنے کے احکامات جاری کیے تھے۔

  • یوکرین میں صدارتی انتخابات، معروف کامیڈین کی جیت کے امکانات روشن

    یوکرین میں صدارتی انتخابات، معروف کامیڈین کی جیت کے امکانات روشن

    کیو: یوکرین میں صدارتی انتخابات کا سلسلہ جاری ہے، جس میں معروف کامیڈین ولودیمیر زیلنسکی کے صدر بننے کے امکانات روشن ہوگئے ہیں۔

    تفصیلات کے مطابق یوکرائن کے صدارتی انتخابات میں پہلی مرتبہ سیاسی پس منظر نہ ہونے کے باوجود مزاحیہ اداکار ولودیمیر زیلنسکی کی صدر بننے کے امکانات نظر آرہے ہیں۔

    غیر ملکی خبر رساں ادارے کا کہنا ہے کہ یورکین میں ہونے والے سروسے کے مطابق اداکار صدر بن چکے ہیں، سروے کے نتائج کے مطابق ولیودیمیر نے تقریباً 73 فیصد ووٹ حاصل کیے۔

    رواں سال یکم اپریل کو یوکرائن میں اتوار کے روز منعقد ہونے والے صدارتی انتخابات کے پہلے مرحلے کے سرکاری نتائج کے مطابق پہلی مرتبہ بغیر کسی سیاسی پس منظر ایک کامیڈین نے ملک کے سابق صدر و وزیر اعظم پر واضح برتری حاصل کی تھی۔

    غیر ملکی خبر رساں ادارے کا کہنا تھا کہ پیر کے روز تمام پولنگ اسٹیشنز سے موصول ہونے والے نتائج کے مطابق ولادمیر زیلنسکی نے مجموعاً 30 فیصد ووٹ حاصل کیے جبکہ ملک کے صدر پیٹرو پوروشینکو صرف 16 فیصد ووٹ حاصل کرسکے۔

    خیال رہے کہ ولادیمیر زیلنسکی نے اپنے ٹیلی ویژن شو میں ایک شخص کا کردار ادا کیا تھا جو کرپشن کے خلاف جنگ لڑتے ہوئے صدر بن جاتا ہے اور اب ان کا یہ کردار حقیقت کا روپ دھارتا جا رہا ہے۔

    ولادمیر زیلنسکی نے یکم اپریل کو برطانوی خبر رساں ادارے سے گفتگو کرتے کہا تھا کہ ’میں بہت خوش ہوں لیکن حتمی کارروائی نہیں ہے‘۔

    یوکرائنی اداکار نے صدارتی الیکشن میں‌ واضح برتری حاصل کرلی

    اکتالیس سالہ اداکار کو بڑی تعداد میں ملنے والے ووٹ اس بات کی عکاسی کرتے ہیں کہ یوکرائن کی عوام اب نیا رہنما چاہتے ہیں جس کا ملک کی کرپشن زدہ سیاسی اشرافیہ سے کوئی تعلق نہ ہو اور جو مشرقی یوکرائن میں روس کے حمایت یافتہ علیحدگی پسندوں کے ساتھ 5سال سے جاری تنازع ختم کرنے میں نئی سوچ پیش کر سکے۔

  • امریکی انتخابات میں مداخلت کا معاملہ، روس اور امریکا نے رپورٹ مسترد کردی

    امریکی انتخابات میں مداخلت کا معاملہ، روس اور امریکا نے رپورٹ مسترد کردی

    ماسکو: امریکی انتخابات میں مداخلت سے متعلق پیش کی گئی رپورٹ کو روس اور صدر ڈونلڈ ٹرمپ نے مسترد کردیا۔

    تفصیلات کے مطابق روسی حکام اور امریکی صدر ڈونلڈ ٹرمپ نے جمعے کے روز اس بات کی تردید کی ہے کہ روس نے 2016ء کے امریکی انتخابات پر اثرانداز ہونے کی کوشش کی۔

    غیر ملکی خبر رساں ادارے کا کہنا ہے کہ انتخابات میں مداخلت سے متعلق ملر رپورٹ میں جاری کردہ کئی سو صفحات پر مشتمل ثبوت کے بارے میں روس نے کہا ہے کہ رپورٹ میں کوئی ثبوت پیش نہیں کیا گیا۔

    ٹرمپ نے اپنے ایک بیان میں کہا ہے کہ ملر رپوٹ لوگوں نے مل کر تیار کی ہے، جو واضح طور پر جھوٹی اور افواہوں پر مبنی ہے، جس میں کوئی ثبوت پیش نہیں کیا گیا۔

    چار سو صفحات پر مشتمل ملر رپورٹ کو خصوصی نمائندے رابرٹ ملر نے 22 ماہ کی طویل تفتیش کے بعد دو روز قبل جاری کی تھی جس میں روسی مداخلت کا انکشاف کیا گیا تھا۔

    امریکی صدر ڈونلڈ ٹرمپ کی انتخابی مہم کے خلاف دو سال سے جاری رابٹ ملر کی خصوصی تحقیقات گذشتہ ماہ اختتام پذیر ہوئی تھی، ابتدائی طور پر تحقیقاتی رپورٹ میں صدر ٹرمپ پر کوئی جرم ثابت نہیں ہوا تھا۔

    الیکشن میں روسی مداخلت کا معاملہ، صدر ٹرمپ پر کوئی جرم ثابت نہ ہوسکا

    خیال رہے کہ رپورٹ کے خلاصے میں کہا گیا تھا کہ صدر ٹرمپ کی انتخابی مہم کے دوران روس کے ساتھ کسی ملی بھگت کوئی ثبوت ملا۔

    بعد ازاں ڈونلڈ ٹرمپ کا کہنا تھا کہ دو سال سے ان کے خلاف مفروضوں پر مبنی الزامات لگائے گئے اور آج سب جھوٹ ثابت ہوئے۔

  • امریکا کے بعد یورپی انتخابات میں بھی روسی مداخلت کا انکشاف

    امریکا کے بعد یورپی انتخابات میں بھی روسی مداخلت کا انکشاف

    برسلز: امریکا کے بعد یورپی انتخابات میں بھی روس پر مداخلت کی کوشش کا انکشاف ہوا ہے، روس نے الزامات کی تردید کردی۔

    تفصیلات کے مطابق روس پر الزام عائد کیا گیا ہے کہ یورپی انتخابات میں مداخلت کے لیے سماجی ویب سائٹس اور رشیا ٹوڈے جیسے دیگر ٹی وی چینلز کا سہارا لیا جا رہا ہے۔

    غیر ملکی خبر رساں ادارے کا کہنا ہے کہ روس پر یورپی انتخابات کی مہم میں مداخلت کی کوشش کرنے کا الزام عائد کیا گیا ہے، البتہ روس نے الزامات کی تردید کرتے ہوئے افواہیں قرار دیے ہیں۔

    امریکی ٹی وی کے مطابق خفیہ اداروں کی ایک رپورٹ میں کہا گیا کہ روس کی جانب سے روس کے لیے نرم گوشہ رکھنے والے اور یورپی یونین کے ناقد سیاستدانوں کو تعاون فراہم کیا جا رہا ہے۔

    رپورٹ میں کہا گیا ہے کہ اس کام کے لیے سماجی ویب سائٹس اور رشیا ٹوڈے جیسے دیگر ٹی وی چینلز کا سہارا لیا جا رہا ہے۔

    اس مقصد کے لیے نوجوان نسل پر نمایاں توجہ دی جا رہی ہے، روس نے ان الزامات کو بے بنیاد قرار دیا ہے، یورپی انتخابات 23 مئی کو ہو رہے ہیں۔

    امریکی انتخابات میں روسی مداخلت کا معاملہ، ٹرمپ مخالفین پر برس پڑے

    یاد رہے کہ نومبر 2016 میں ہونے والے صدارتی انتخاب سے قبل ماہ اکتوبر میں امریکی حکومت نے روس پر ڈیموکریٹک پارٹی پر سائبر حملوں کا الزام عائد کیا تھا۔

    واضح رہے کہ سابق امریکی صدر باراک اوباما بھی اس عزم کا اظہار کر چکے ہیں کہ امریکی صدارتی انتخابات میں مبینہ مداخلت کرنے پر روس کے خلاف کارروائی کی جائے گی۔

  • کشمیر کونسل ای یو کا مقبوضہ وادی میں بھارتی انتخابات مسترد کرنے کا اعلان

    کشمیر کونسل ای یو کا مقبوضہ وادی میں بھارتی انتخابات مسترد کرنے کا اعلان

    برسلز: کشمیر کونسل ای یو نے مقبوضہ وادی میں ہونے والے بھارتی انتخابات کو مسترد کرنے کا اعلان کردیا۔

    تفصیلات کے مطابق مقبوضہ وادی کشمیر سمیت کئی بھارتی ریاستوں میں انتخابات ہورہے ہیں، جسے مرحلہ وار مکمل کیا جائے گا۔

    چیئرمین کشمیر کونسل علی رضا سید کا کہنا ہے کہ مقبوضہ کشمیر میں بھارتی الیکشن مسترد کرتے ہیں، یہ الیکشن نہیں ڈرامے بازی ہے۔

    ان کا کہنا تھا کہ مقبوضہ کشمیر میں انتخابی ڈرامے کا بائیکاٹ فطری ہے، سرچ آپریشن کی آڑ میں قابض افواج نے 12سالہ طالب علم شہید کیا۔

    ان کا مزید کہنا تھا کہ بارہمولہ میں کشمیری نوجوانوں کی غیر قانونی گرفتاریوں کا سلسلہ بھی جاری ہے، جس کی شدید مذمت کرتے ہیں۔

    خیال رہے کہ مقبوضہ کشمیر میں انتخابات کے پیش نظر بھارتی فوج نے مختلف علاقوں میں کریک ڈاؤں کا سلسلہ شروع کررکھا ہے، جس کے باعث متعدد معصوم شہریوں کو گرفتار کیا گیا ہے۔

    بھارتی انتخابات: پرتشدد واقعات میں 3 افراد ہلاک، دھماکا خیز مواد بھی برآمد

    علاوہ ازیں بھارتی جارحیت بھی تھم نہ سکی، نہتے کشمیریوں پر ظلم کے پہاڑ توڑے جارہے ہیں، رواں سال کے آغاز سے اب تک متعدد کشمیری شہید ہوچکے ہیں۔

  • بھارت میں انتخابات، پہلے مرحلے کی ووٹنگ مکمل

    بھارت میں انتخابات، پہلے مرحلے کی ووٹنگ مکمل

    نئی دہلی: بھارت میں پارلیمانی انتخابات کے پہلے مرحلے کی ووٹنگ مکمل ہوگئی، شہریوں نے اپنا حق رائے دہی استعمال کیا۔

    تفصیلات کے مطابق بھارت میں آج انتخابات کا پہلا مرحلہ مکمل ہوا، بیس ریاستوں کے شہریوں نے پولنگ اسٹیشن جاکر اپنے ووٹ کاسٹ کیے۔

    غیر ملکی خبر رساں ادارے کا کہنا ہے انتخابی عمل تقریبا چھ ہفتے تک جارے رہے گا، اس دوران نو سو ملین رجسٹر ووٹرز اپنا حق رائے دہی استعمال کریں گے۔

    انتخابی عمل کا آخری مرحلہ انیس مئی کو مکمل ہوگا اور ووٹوں کی گنتی تئیس مئی سے شروع ہوگی، تجزیہ کاروں کا کہنا ہے کہ آج عوام کی بڑی تعداد نے پولنگ اسٹیشن کا رخ کیا اور ووٹ کاسٹ کیے۔

    بھارت میں بے روزگاری کے ساتھ ساتھ ملک سیاسی بحران کا شکار ہے، شہری بھوک افلاس کے باعث خود کشیاں کرنے پر مجبور ہیں، لوگوں کی خواہش کہ ملک میں خوش حالی آئے۔

    بھارت میں لوک سبھا کی 543 کی نشستوں کے لیے پہلے مرحلے میں 91 پر پولنگ ہوئی، آندھرا پردیش، اترپردیش، آسام، بہار اور اڑیسہ سمیت 20 سے زائد ریاستوں میں ووٹنگ ہوئی۔

    بھارت میں الیکشن : ووٹرز خریدنے کیلیے سات کروڑ ڈالر کے اسکینڈل کا انکشاف

    بھارت کے عام انتخابات میں 90کروڑ افراد ووٹ کا حق استعمال کریں گے، 7مراحل میں ہونے والے بھارتی انتخابات کے نتائج کا اعلان 23مئی کو ہوگا۔

    انتخابات کا پہلا مرحلہ مکمل ہوا، جبکہ دوسرا 18 اپریل، تیسرا 23 اپریل، چوتھا 29 اپریل، پانچواں 6 مئی، چھٹا 12 مئی اور ساتواں 19 مئی کو ہوگا۔

    خیال رہے کہ بھارت میں چار ریاستیں ایسی ہیں جو بھارت کے غاصبانہ قبضے سے آزادی حاصل کرنے کی جدوجہد کررہی ہیں۔ انتخابات کے پہلے مرحلے میں ریاستی جبر کے تحت مقبوضہ کشمیر میں بھی نام نہاد ووٹنگ کرائی گئی، جبکہ مقبوضہ کشمیر کے عوام بھارت کا انتخابی ڈھونگ پہلے ہی مسترد کرچکے ہیں۔