Tag: Elections 2024

الیکشن کمیشن نے قومی اسمبلی کی 265 جنرل نشستوں میں سے 264 کے نتائج جاری کر دیے ہیں پی ٹی آئی کے حمایت یافتہ 95 آزاد امیدوار کامیاب ہو گئے ہیں۔

اے آر وائی نیوز کے مطابق الیکشن کمیشن نے قومی اسمبلی کی 265 جنرل نشستوں میں سے اب تک 264 نشستوں کے نتائج جاری کر دیے ہیں۔ جن میں پی ٹی آئی کے آزاد امیدواروں نے سب سے زیادہ 95 نشستوں پر کامیابی حاصل کی ہے تاہم کوئی بھی جماعت تنہا حکومت بنانے کے لیے سادہ اکثریت لینے میں کامیاب نہیں ہو سکی ہے۔

اب تک کے جاری نتائج کے مطابق پی ٹی آئی کے حمایت یافتہ امیدواروں نے سب سے زیادہ 95 نشستوں پرکامیابی حاصل کر لی ہے جب کہ مسلم لیگ (ن) چار آزاد امیدواروں کی شمولیت کے بعد 75 نشستوں کے ساتھ دوسری اور پیپلز پارٹی 54 نشستوں پر کامیابی کے ساتھ تیسری پوزیشن پر ہے۔

ایم کیو ایم پاکستان نے 17، جے یو آئی (ف) نے 4، مسلم لیگ ق نے 3، استحکام پاکستان پارٹی اور بلوچستان نیشنل پارٹی نے دو، دو جب کہ مجلس وحدت مسلمین، مسلم لیگ (ضیا)، نیشنل پارٹی، پشتونخوا نیشنل عوامی پارٹی اور پشتونخوا ملی عوامی پارٹی نے ایک ایک نشست جیت لی ہے۔

دوسری جانب الیکشن کمیشن نے این اے 64 گجرات سے پی ٹی آئی کی حمایت یافتہ آزاد امیدوار قیصرہ الہٰی کی درخواست پر حتمی نتیجہ روکتے ہوئے چوہدری سالک حسین کو 15 فروری کو طلب کر لیا ہے۔

الیکشن کمیشن نے قیصرہ الہٰی کی درخواست پر متعلقہ آر او سے جواب مانگ لیا ہے اور ریٹرننگ افسر کو قیصرہ الٰہی یا ان کے وکیل کی موجودگی میں فارم 47 تیار کرنے کی ہدایت کر دی ہے۔

ایک نشست این اے 88 کا نتیجہ بھی روک دیا گیا ہے، اس حلقے کے 26 پولنگ اسٹیشنوں پر دوبارہ انتخابات ہوں گے۔

جماعت اسلامی کے سربراہ سراج الحق نے عام انتخابات کو جعلی قرار دیتے ہوئے چیف الیکشن کمشنر سے فوری استعفیٰ دینے کا مطالبہ کر دیا ہے۔

اے آر وائی نیوز کے مطابق امیر جماعت اسلامی پاکستان سراج الحق نے منصورہ میں مرکزی لیڈر شپ کے اجلاس سے خطاب کرتے ہوئے کہا ہے کہ عام انتخابات میں سب کے لیے لیول پلیئنگ فیلڈ نہیں تھی، الیکشن کمیشن نے ن لیگ، پیپلز پارٹی اور ایم کیو ایم کو سپورٹ کیا تاہم جعلی الیکشن  کے نتیجے میں جو حکومت بنے گی وہ بھی جعلی ہوگی۔

سراج الحق کا کہنا تھا کہ عالمی اداروں اور میڈیا نے بھی الیکشن پر سوالات اٹھا دیے۔ الیکشن نتائج جعلی ہیں، چیف الیکشن کمشنر فوری مستعفیٰ ہوں اور تحقیقات کے لیے آزاد اور غیر جانبدار کمیشن قائم کیا جائے۔

ان کا کہنا تھا کہ کراچی میں جماعت اسلامی کا مینڈیٹ چرایا گیا ہے اور عوام کے حق پر ڈاکا ڈالتے ہوئے ایم کیو ایم کو جتوایا گیا لیکن کراچی کے عوام اس جعلسازی کو قبول نہیں کریں گے۔

سراج الحق نے کہا کہ جماعت اسلامی اس دھاندلی کے خلاف بھرپور احتجاج کر رہی ہے، اگر نتائج کو درست نہ کیا گیا تو احتجاج کو اسلام آباد تک وسیع کر سکتے ہیں، آزاد امیدوار بھی مظاہرے میں شریک ہونا چاہیں تو انہیں خوش آمدید کہیں گے۔

عام انتخابات میں ہارنے والے امیدواروں کی جانب سے نتائج چیلنج کیے جانے کے باعث ملک بھر سے 10 قومی اور 16 صوبائی نشستوں پر حتمی نتائج روک دیے گئے۔

اے آر وائی نیوز کے مطابق 8 فروری کو ہونے والے عام انتخابات کے غیر سرکاری اور غیر حتمی نتائج آنے کے بعد ہارنے والے امیدواروں کی جانب سے ان نتیجوں کو چیلنج کیا جا رہا ہے جس کے بعد اب تک ملک بھر سے قومی اسمبلی کی 10 اور صوبائی اسمبلیوں کی 16 نشستوں کے حتمی نتائج کا اجرا روک دیا گیا ہے۔

قومی اسمبلی کی جن نشستوں پر حتمی نتائج جاری کرنے سے آر اوز کو روکا گیا ہے ان میں این اے 15 مانسہرہ، اسلام آباد سے قومی اسمبلی کی تینوں نشستیں این اے 46، این اے 47 اور این اے 48 شامل ہیں۔

اس کے علاوہ این اے 55 راولپنڈی، این اے 49 اور این اے 50 اٹک کے نتائج چیلنج کیے گئے ہیں۔ قومی اسمبلی کے حلقوں این اے 65، این اے 63، این اے 28 کے نتائج بھی چیلنج کیے گئے ہیں۔

صوبائی اسمبلی کی جن نشستوں پر نتائج کو چیلنج کی اگیا ہے اس میں پنجاب اسمبلی کی نشستیں پی پی 11، پی پی 14، پی پی 16، پی پی 20، پی پی 31، پی پی 33 اور پی پی 59 بھی شامل ہیں ان کے علاوہ کے پی اسمبلی پی بی ایک کے نتائج کو بھی الیکشن کمیشن میں چیلنج کیا گیا ہے۔

وفاق میں حکومت سازی کے لیے مسلم لیگ ن اور ایم کیو ایم پاکستان کے وفود کی آج ملاقات ہوئی ہے جس کا اندرونی احوال اے آر وائی نیوز نے حاصل کر لیا۔

اے آر وائی نیوز کے مطابق وفاق میں حکومت سازی کے لیے مسلم لیگ ن اور ایم کیو ایم پاکستان کے وفود کی آج ملاقات ہوئی ہے جس میں دونوں جماعتوں نے مل کر ساتھ چلنے پر اتفاق کیا۔ اس ملاقات میں اور کیا کیا ہوا اس کا اندرونی احوال اے آر وائی نیوز نے حاصل کر لیا۔

اے آر وائی نیوز کے مطابق ایم کیو ایم پاکستان نے وفاق میں حکومت سازی میں ن لیگ کی حمایت کرنے اور حکومت بننے کی صورت میں سندھ کی گورنر شپ مانگ لی ہے جب کہ کراچی میں وفاق کے تمام ترقیاتی منصوبوں میں اسے آن بورڈ رکھنے کا بھی مطالبہ کیا ہے۔

ذرائع نے بتایا کہ لاہور میں ہونے والی یہ ملاقات تقریباً 50 منٹ تک جاری رہی جس میں نواز شریف نے ایم کیو ایم کی شرائط کا مثبت انداز میں جواب دیا۔

مسلم لیگ ن کے قائد نواز شریف اور شہباز شریف سے آج رائے ونڈ لاہور میں ایم کیو ایم پاکستان کے وفد کی ملاقات ہوئی جس کی قیادت خالد مقبول صدیقی کر رہے تھے جب کہ وفد میں گورنر سندھ کامران ٹیسوری، فاروق ستار، مصطفیٰ کمال شامل تھے۔ لیگی وفد میں مریم نواز، ایاز صادق اور رانا تنویر شریک تھے۔

مسلم لیگ ن اور ایم کیو ایم پاکستان مل کر ساتھ چلنے پر متفق

ذرائع کا کہنا ہے کہ اس ملاقات میں دونوں جماعتوں کا مستقبل میں ملک کو مشکلات سے نکالنے کیلیے لائحہ عمل پر غور وخوض کیا۔ مسلم لیگ ن اور ایم کیو ایم پاکستان کے درمیان آئندہ ساتھ مل کر چلنے پر اتفاق ہوا اور یہ طے کیا گیا کہ دونوں جماعتیں حکومت سازی کے مشاورتی عمل میں شریک رہیں گی۔

الیکشن کمیشن نے قومی اسمبلی کے حلقہ این اے 15 مانسہرہ سے پی ٹی آئی کے حمایت یافتہ آزاد امیدوار شہزادہ گستاسب کی کامیابی کا حتمی نوٹیفکیشن جاری کرنے سے روک دیا ہے۔

اے آر وائی نیوز کے مطابق مانسہرہ سے قومی اسمبلی کے حلقہ این اے 15 پر پاکستان تحریک انصاف کے  شہزادہ گستاسب نے مسلم لیگ ن کے قائد اور سابق وزیراعظم نواز شریف کو شکست دی تاہم غیر سرکاری اور غیر حتمی نتیجہ جاری ہونے کے بعد نواز شریف نے اس کامیابی کو چیلنج کر دیا تھا۔ الیکشن کمیشن نے اس درخواست کی سماعت کے بعد آر او کو مذکورہ حلقے کا نتیجے کا حتمی نوٹیفکیشن جاری کرنے سے روک دیا ہے۔

آج چیف الیکشن کمشنر کی سربراہی میں چار رکنی بینچ نے نتائج میں مبینہ تبدیلی سے متعلق درخواست کی سماعت کی جس میں نواز شریف کے وکیل نے دلائل پیش کیے۔

درخواست کی سماعت کے موقع پر نواز شریف کے وکیل نے الیکشن کمیشن کو آگاہ کیا کہ پریزائیڈنگ افسران نے پولنگ ایجنٹس کو نکال دیا تھا۔ شفاف انتخابات کا انعقاد الیکشن کمیشن کی ذمے داری ہے لیکن این اے 15 مانسہرہ میں الیکشن شفاف نہیں ہوئے۔

وکیل نواز شریف نے یہ بھی کہا کہ این اے 15 مانسہرہ کے 125 پولنگ اسٹیشنز کے فارم 45 نہیں ملے اور فارم 45 کے بغیر فارم 47 جاری نہیں ہو سکتا۔ اس لیے اس حلقے کے نتیجے کا حتمی نوٹیفکیشن روکا جائے۔

اس موقع پر الیکشن کمیشن کے پی کے ممبر نے استفسار کیا کہ آپ کیا کہنا چاہتے ہیں کہ الیکشن شفاف نہیں ہوا؟ جس پر نواز شریف کے وکیل نے کہا کہ اس حلقے کا الیکشن شفاف نہیں ہوا ہے۔