Tag: Elections 2024

ڈیرہ اسماعیل خان میں کلاچی کے علاقے میں پولیس گاڑی کے قریب دھماکا ہوا ہے جس کے نتیجے میں 5 اہلکار شہید اور 2 زخمی ہو گئے ہیں۔

اے آر وائی نیوز کے مطابق دہشتگردی کا یہ واقعہ صوبہ خیبر پختونخوا میں کلاچی کے علاقے گرہ اسلم میں پیش آیا جہاں پولیس کی گاڑی کے قریب ایک دھماکا ہوا جس کے نتیجے میں 5 اہلکار شہید اور دو زخمی ہوگئے ہیں۔

پولیس کا کہنا ہے کہ شہید اور زخمی اہلکاروں کو ہیلی کاپٹر کے ذریعے ڈیرہ اسماعیل خان منتقل کیا جا رہا ہے۔

واضح رہے کہ آج ملک بھر میں عام انتخابات کے سلسلے میں پولنگ جاری ہے۔ آج صبح ٹانک میں پولنگ عملے پر فائرنگ کا واقعہ پیش آیا تھا جس میں سیکیورٹی اہلکار شہید ہو گیا تھا جب کہ گزشتہ روز پشین اور قلعہ سیف اللہ میں دھماکوں کے دو واقعات میں 29 افراد شہید اور درجنوں زخمی ہوئے تھے۔

چمن میں الیکشن ڈیوٹی سے غیر حاضر عملے کے وارنٹ جاری کر دیے گئے ہیں اور ڈی آر او کا کہنا ہے کہ ان کو گرفتار کیا جائے گا۔

اے آر وائی نیوز کے مطابق آج عام انتخابات کے سلسلے میں ملک بھر میں پولنگ جاری ہے تاہم کئی ایسے پولنگ اسٹیشن ہیں جہاں پولنگ کا آغاز نہیں ہو سکا ہے اور کئی مقامات پر انتخابی عملہ اپنی ڈیوٹیوں پر نہیں پہنچا ہے۔

بلوچستان کے علاقے چمن میں ڈپٹی کمشنر آف سے غیر حاضر عملے کے وارنٹ جاری کر دیے گئے ہیں اور ڈسٹرکٹ ریٹرننگ افسر کا کہنا ہے کہ الیکشن ڈیوٹی سے غیر حاضر عملے کو گرفتار کیا جائے گا۔

متعلقہ حکام نے غیر حاضر عملے کو ملازمتوں سے فارغ کرنے کے لیے الیکشن کمیشن کو خط بھی لکھ دیا ہے۔

دوسری جانب گوادر کے علاقے کیچ کے دیہی علاقوں میں تاحال پولنگ شروع نہ ہو سکی اور انتخابی عملہ 5 گھنٹے بعد بھی پولنگ اسٹیشن نہیں پہنچ سکا ہے۔ پنجگور میں بھی متعدد پولنگ اسٹیشنز پر عملے کی کمی کے سبب پولنگ سست روی کا شکار ہے۔

کراچی کے کئی حلقوں، ٹنڈو محمد خان سمیت ملک کے مختلف علاقوں میں کئی گھنٹوں کی تاخیر سے پولنگ شروع ہونے کی اطلاعات بھی موصول ہوئی ہیں۔

عام انتخابات کے سلسلے میں آج ملک بھر میں پولنگ جاری ہے سندھ کے شہر محراب پور میں ایک دولہا بارات لے کر روانہ ہونے سے قبل ووٹ ڈالنے پولنگ اسٹیشن پہنچ گیا۔

آج ملک بھر میں عام انتخابات کے لیے پولنگ جاری ہے اور ووٹرز میں اپنا حق رائے دہی کے استعمال کے حوالے سے خاصا جوش وخروش پایا جاتا ہے۔ کہیں انتہائی عمر رسیدہ افراد اپنا ووٹ کاسٹ کرنے آ رہے ہیں تو کہیں معذور افراد پولنگ اسٹیشن اپنا قومی فریضہ انجام دینے کے لیے پہنچ رہے ہیں۔

ووٹ کی امانت کی ادائیگی کی ایسی ہی مثال سندھ کے ضلع نوشہرو فیروز کے شہر محراب پور میں سامنے آئی ہے جہاں ایک نوجوان دولہا نے شادی کے موقع پر اپنے قومی فریضے کی ادائیگی کو اولیت دی اور بارات لے کر دلہن کے گھر روانہ ہونے سے قبل پولنگ اسٹیشن پہنچا اور اپنا ووٹ کاسٹ کیا۔

بابر راجپوت نامی یہ دولہا این اے 205 کا ووٹر ہے جہاں اس نے دلہنیا لانے کے لیے نوابشاہ روانگی سے قبل متعلقہ پولنگ اسٹیشن پہنچ کر اپنے جمہوری حق کا استعمال کرتے ہوئے ووٹ کاسٹ کیا۔

اس موقع پر دولہا کا کا کہنا تھا کہ شادی زندگی کا ایک اہم اور یادگار دن ہے اور وہ اپنی دلہنیا لینے کے لیے نوابشاہ جا رہے ہیں تاہم ووٹ قوم کی امانت ہے اور یہ قومی فریضہ ادا کرنے کے لیے ہی میں ووٹ ڈالنے آیا ہوں۔

پاکستان مسلم لیگ ن کے سربراہ نواز شریف نے ووٹ ڈالنے کے بعد میڈیا سے گفتگو کی جس میں ان سے مریم نواز کو وزیراعلیٰ پنجاب بنانے سے متعلق سوال کیا گیا۔

اے آر وائی نیوز کے مطابق نواز شریف نے لاہور کے علاقے ماڈل ٹاؤن میں این اے 128 پر اپنا ووٹ کاسٹ کیا۔ حق رائے دہی استعمال کرنے کے بعد سابق وزیراعظم نے میڈیا سے مختصر گفتگو کی جس میں ایک صحافی نے ان سے مریم نواز کے وزیراعلیٰ پنجاب بنانے سے متعلق بھی ایک سوال کیا۔

اس سوال کے جواب میں نواز شریف نے کہا کہ انتخابات کے نتائج کے بعد پارٹی ہی مریم نواز کو وزیر اعلیٰ پنجاب بنانے کا فیصلہ کرے گی۔