Tag: Elections 2024

اسلام آباد: الیکشن کمیشن کی جانب سے 8 فروری کو ہونے والے عام انتخابات 2024 کیلیے سوشل میڈیا سے متعلق ضابطہ اخلاق کا ڈرافٹ تیار کر لیا گیا۔

الیکشن کمیشن سے منسلک ذرائع نے بتایا کہ عام انتخابات کیلیے سوشل میڈیا ایکٹوسٹ کو بھی کارڈ جاری کیے جا رہے ہیں اور ان سے بیان حلفی لیا جائے گا۔

ذرائع کے مطابق سوشل میڈیا ایکٹوسٹ ضابطہ اخلاق پر عمل درآمد کے پابند ہوں گے، ان کو پولنگ اسٹیشن کے اندر جائزہ لینے کی اجازت ہوگی تاہم وہ کسی سیاسی جماعت کیلیے ووٹ نہیں مانگ سکین گے۔

علاوہ ازیں، سوشل میڈیا ایکٹوسٹ ووٹر پر اثر انداز ہونے کی کوشش نہیں کریں گے، ان کو پولنگ اسٹیشنز کے اندر فوٹیج بنانے کی اجازت نہیں ہوگی۔

گزشتہ روز الیکشن کمیشن نے پولنگ اسٹیشن میں موبائل فون لے جانے پر پابندی عائد کرنے کا حکم جاری کیا تھا۔ اس سلسلے میں الیکشن کمیشن نے چاروں صوبائی الیکشن کمشنرز کو مراسلے ارسال کیے تھے جن میں موبائل فون پر پابندی سے متعلق آگاہ کیا گیا تھا۔

مراسلے کے مطابق قومی اور صوبائی اسمبلیوں کے انتخابات 8 فروری کو ہوں گے جس دوران پولنگ اسٹیشن میں موبائل فون لے جانے پر پابندی ہوگی۔ اسی طرح پریذائیڈنگ افسر کے علاوہ تمام انتخابی عملہ موبائل فون بند رکھے گا۔

سوات: سابق وزیر اعظم و قائد مسلم لیگ (ن) نواز شریف کا کہنا ہے کہ ماضی میں خیبر پختونخوا کے سادہ عوام کے جذبات سے کھیلا گیا۔

جلسے سے خطاب میں نواز شریف نے بانی پی ٹی آئی کو خوب تنقید کا نشانہ بنایا۔ انہوں نے کہا کہ نواز شریف کو آپ کی حالت پر ترس آتا ہے، آپ لوگ کیسے ایک شخص کے جال میں پھنس گئے؟

نواز شریف نے کہا کہ آپ لوگوں سے ایک کروڑ نوکریوں اور گھروں کا وعدہ کیا تھا، بتاؤ عوام سے جھوٹے وعدے کیوں کیے تھے؟خیبر پختونخوا کے عوام سیدھے سادے لوگ ہیں۔

سابق وزیر اعظم نے کہا کہ آپ نے ایسے شخص کو کیوں اجازت دی جس نے ملک کو اجاڑ دیا؟ پہلے نواز شریف کو نکالے جانے دیا اور اب کہتے ہو نواز دو، پچھلا حساب تو دینا ہوگا۔

انہوں نے کہا کہ مجھے یا شہباز شریف کو موقع ملتا تو خیبر پختونخوا سب سے خوبصورت صوبہ ہوتا لیکن آپ ایک جال میں پھنسے، نیا پاکستان کرتے کرتے پرانا پاکستان بھی تباہ کر دیا، جن کو آپ آزما چکے ہیں ان کو آزمانا ٹھیک نہیں۔

جلسے کے شرکا کو مخاطب کرتے ہوئے نواز شریف نے کہا کہ آپ کو میری بات سمجھ آ رہی ہے یا پشتو میں بات کروں، میں ایسی پشتو بولوں گا کہ آپ لوگ بھی بھول جائیں گے۔

اسلام آباد: محکمہ موسمیات نے 8 فروری کو ہونے والے عام انتخابات 2024 سے چند روز قبل ملک بھر میں مزید بارشوں اور برفباری کی پیشگوئی کر دی۔

محکمہ موسمیات کے مطابق ملک میں 4 فروری تک مزید بارش اور برفباری کا امکان ہے، مغربی ہواؤں کا سلسلہ ملک پر اثر انداز ہو رہا ہے جو 4 فروری تک برقرار رہے گا، 2 سے 3 فروری کے درمیان کراچی، سکھر، لاڑکانہ اور دادو میں ہلکی اور درمیانی بارش کا امکان ہے۔

میرپور خاص، شہید بینظیر آباد، جیکب آباد اور کشمور میں بھی ہلکی سے درمیانی بارش متوقع ہے۔ محکمہ موسمیات نے بتایا کہ سندھ کے دیگر علاقوں میں موسم سرد اور مطلع جزوی ابر آلود رہے گا، موسلادھار بارش کے باعث بلوچستان کے ندی نالوں میں طغیانی کا خدشہ ہے۔

محکمہ موسمیات کے مطابق بلوچستان کے مختلف شہروں میں 2 سے 3 فروری تک بارش اور پہاڑوں پر برفباری کا امکان ہے، کوئٹہ، گوادر، نوکنڈی، دالبندین، چاغی، قلات، خضدار، لسبیلہ اور آواران میں بارش کا امکان ہے۔

اسی طرح تربت، کیچ، جیوانی، پسنی، اورماڑہ، پنجگور، خاران، نوشکی، واشک ،مستونگ، سبی، نصیر آباد، ژوب، شیرانی، بارکھان، موسیٰ خیل، کوہلو، جھل مگسی، لورالائی، زیارت، چمن، پشین، قلعہ عبداللہ اور قلعہ سیف اللہ میں بارش کا امکان ہے۔

محکمہ موسمیات نے امکان ظاہر کیا کہ گلگت بلتستان اور آزاد کشمیر موسلادھار بارش اور پہاڑوں پر برفباری ہو سکتی ہے۔ پنجاب اور خیبر پختونخوا کے بیشتر شہروں میں بارش اور پہاڑوں پر برفباری کا امکان ہے۔

اسلام آباد: توشہ خانہ ریفرنس میں سزا یافتہ سابق خاتون اوّل بشریٰ بی بی کو اڈیالہ سے بنی گالہ سب جیل منتقل کر دیا گیا۔

چیف کمشنر اسلام آباد نے بنی گالہ میں بانی پی ٹی آئی کی رہائش گاہ کو سب جیل قرار دینے کا نوٹیفکیشن جاری کیا جس کے بعد مجرمہ کو منتقل کیا گیا۔

نوٹیفکیشن کے مطابق جیل اور اسلام آباد پولیس کے اہلکار بنی گالہ سب جیل تعینات کر دیے گئے، جیل کا عملہ گھر کے اندر جبکہ اسلام آباد پولیس کے اہلکار گھر کے باہر تعینات ہوں گے۔

بانی پی ٹی آئی اور بشریٰ بی بی 14، 14 سال قید کی سزا

آج توشہ خانہ ریفرنس میں بانی پی ٹی آئی اور بشریٰ بی بی کو  14، 14 سال قید کی سزا سنائی گئی جبکہ دونوں کو کسی بھی عوامی عہدے کیلیے 10 سال کیلیے نااہل قرار دیا گیا۔ اڈیالہ جیل میں قائم احتساب عدالت نے دونوں پر 787 ملین روپے کا جرمانہ بھی عائد کیا۔

عدالت نے بانی پی ٹی آئی کی حاضری لگائی اور استفسار کیا آپ کا 342 کا بیان کہاں ہے؟ بانی پی ٹی آئی نے کہا کہ میرا بیان میرے کمرے میں ہے، مجھے تو صرف حاضری کیلیے بلایا تھا۔ اس پر عدالت کا کہنا تھا کہ آپ فوری طور اپنا بیان جمع کروادیں اور عدالتی وقت خراب نہ کریں۔

بانی پی ٹی آئی نے کہا کہ آپ کو کیا جلدی ہے، کل بھی جلدی میں سزا سنا دی گئی، میرے وکلا ابھی آئے نہیں، وکلا آئیں گے تو ان کو دکھا کر جمع کراؤں گا، میں صرف حاضری کیلیے آیا ہوں۔ یہ کہتے ہوئے وہ کمرہ عدالت سے چلے گئے۔ سابق وزیر اعظم کے جانے کے بعد جج نے فیصلہ سنایا۔

توشہ خانہ کیس کا پس منظر

بانی پی ٹی آئی کیخلاف توشہ خانہ سے تحائف کو فروخت کرنے کا الزام ہے، چار اگست دوہزار بائیس کو اسپیکر قومی اسمبلی نے توشہ خانہ ریفرنس الیکشن کمیشن کو بھجوایا۔

محسن شاہ نواز رانجھا سمیت پی ڈی ایم کے پانچ ارکان قومی اسمبلی نے اسپیکر سے درخواست کی تھی، جس میں آرٹیکلز باسٹھ تریسٹھ کے تحت نااہلی کا مطالبہ کیا گیا۔

سات ستمبر دوہزار بائیس کو بانی پی ٹی آئی نے الیکشن کمیشن کو تحریری جواب دیا، جس میں بتایا گیا کہ دوہزار اٹھارہ سے دوہزار بائیس تک اٹھاون تحائف موصول ہوئے، جنہیں باقاعدہ طریقہ کار کے تحت رقم ادا کرکے خریدا۔

اکیس اکتوبر دوہزار بائیس کو الیکشن کمیشن نے توشہ خانہ ریفرنس میں چیئرمین پی ٹی آئی کو نااہل قرار دیا، فیصلہ میں کرمنل کمپلینٹ فائل کرنے کی ہدایت بھی کی گئی۔

پندرہ دسمبر دوہزار بائیس کو توشہ خانہ فوجداری کیس ایڈیشل سیشن جج ظفر اقبال نے قابل سماعت قراردیا، جس کے بعد نو جنوری دوہزار تئیس کو ایڈیشنل سیشن جج ہمایوں دلاور نے کیس دوبارہ قابل سماعت قرار دیا، جہاں ستائیس سماعتوں میں چیئرمین پی ٹی آئی ایک دفعہ بھی پیش نہیں ہوئے.

دس مئی دوہزار تئیس کو نیب حراست میں عمران خان کو پولیس لائنز سے عدالت لایا گیا اور فرد جرم عائد ہوئی، بارہ جولائی دوہزار تئیس کو توشہ خانہ فوجداری کیس میں ٹرائل کا اہم مرحلہ شروع ہوا۔

پانچ اگست کو اسلام آباد کی ضلعی عدالت نے بانی پی ٹی آئی کو توشہ خانہ کیس میں مجرم قرار دیتے ہوئے تین سال قید اور ایک لاکھ جرمانے کی سزا سنائی گئی۔

بعد ازاں انتیس اگست دوہزار تئیس میں اسلام آباد ہائی کورٹ نے سزا معطل کرتے ہوئے فوری رہائی کا حکم دیا۔

باجوڑ میں قومی اسمبلی کے حلقہ این اے 8 سے الیکشن میں حصہ لینے والے آزاد امیدوار ریحان زیب کے قتل سے متعلق حقائق سامنے آگئے۔

ریحان زیب کو قومی اور صوبائی اسمبلی کیلیے پاکستان تحریک انصاف نے ٹکٹ نہیں دیا تھا۔ پی ٹی آئی نے این اے 8 سے گل ظفر خان جبکہ پی کے 22 سے گل داد خان کو ٹکٹ جاری کیا تھا۔ مقتول نے سوشل میڈیا پر ٹکٹ تقسیم کے معاملے پر سوال کھڑے کیے تھے۔

مقتول نے خیبر پختونخوا حکومت کی کرپشن کا بھی 12 جنوری کو اپنے آخری ٹویٹ میں انکشاف کیا تھا۔ ریحان زیب کو چند روز سے پی ٹی آئی سے منسلک اکاؤنٹس سوشل میڈیا پر تنقید کا نشانہ بنا رہے تھے۔ قتل کے وقت مقتول امیدوار گل ظفر خان کے آبائی علاقے سے واپس آ رہے تھے۔

پی ٹی آئی آفیشل ٹویٹر اکاؤنٹ سے بھی ریحان زیب کے ٹکٹ کے معاملے پر غلط بیانی کی گئی جبکہ ٹویٹ کو بعد میں بدل دیا گیا تھا۔ ریحان زیب بطور آزاد امیدوار پی ٹی آئی کے آفیشل ٹکٹ ہولڈرز کے خلاف الیکشن لڑ رہے تھے۔

پولیس نے بتایا تھا کہ مقتول قومی اسمبلی کے حلقہ این اے 8 سے الیکشن میں حصہ لے رہے تھے، نامعلوم افراد نے صدیق آباد میں ان پر فائرنگ کی جس سے وہ جاں بحق ہوئے۔

بعدازاں، پی ٹی آئی کی جانب سے ریحان زیب کے قتل کی مذمت کی گئی تھی۔ ترجمان نے اپنے بیان میں کہا تھا کہ دہشتگرد کارروائیاں انتخابات کی ساکھ اور شفافیت پر بڑا سوالیہ نشان ہیں، سبی میں ریلی پر حملہ اور باجوڑ میں امیدوار کے قتل کی ذمہ دار نگراں حکومتیں ہیں۔

دوسری جانب، امیدوار کے قتل کا واقعہ پیش آنے کے باعث این اے 8 اور پی کے 22 پر الیکشن ملتوی کر دیا گیا ہے۔