Tag: Elections 2024

کراچی: امیر جماعت اسلامی پاکستان سراج الحق کا کہنا ہے کہ 8 فروری کے بعد ملسم لیگ (ن) یا پیپلز پارٹی کی حکومت بنی تو ملک میں صرف تباہی ہوگی۔

تقریب سے خطاب کرتے ہوئے سراج الحق نے کہا کہ (ن) لیگ یا پیپلز پارٹی جیتی تو صرف لڑائی جھگڑا ہی ہوگا، ہمارا مؤقف ہے تمام ادارے غیر جانبدار ہونے چاہییں، الیکشن کمیشن کو بھی غیر سیاسی ہونا چاہیے۔

سراج الحق نے کہا کہ عوام 8 فروری کو ہم پر اعتماد کرے سب کام کر کے دکھائیں گے، پاکستان کا معاشی مسئلہ اخراجات زیادہ اور آمدنی کم ہے، ہمارے مسائل زیادہ ہیں اور وسائل کم ہیں، سوال یہ ہے اپنے وسائل کو کیسے بڑھائیں گے؟

متعلقہ: ہمارے حکمرانوں کو کرپشن کے علاوہ اور کوئی کام نہیں آتا، سراج الحق

انہوں نے کہا کہ ہمارے پاس ہر شعبے کے ماہرین ہیں جن کی تعداد 1200 ہے، ہر سال پاکستان کی اشرفیاں 17.5 ارب ڈالر کھا جاتی ہے، مجھے بتایا گیا کہ افغانستان کی کرنسی پاکستان سے مضبوط ہے جبکہ بنگلہ دیشی کرنسی بھی مضبوط ہے۔

ان کا کہنا تھا کہ میں دو مرتبہ خیبر پختونخوا کا وزیر خزانہ رہا ہوں، جب وزیر بنا تو میرے صوبے پر قرضہ تھا اور میں نے  قرضہ ختم کیا۔

سراج الحق نے کہا کہ انتخابات کے بعد افغانستان اور ایران کو ایک ٹیبل پر بٹھاؤں گا تاکہ حالات بہتر ہوں۔

فیصل آباد: مسلم لیگ (ن) پنجاب کے صدر رانا ثنا اللہ کا کہنا ہے کہ بلاول بھٹو کی جارحانہ سیاست کی سزا یہی ہے کہ ان کی تنقید کا جواب نہ دیا جائے۔

پریس کانفرنس میں بانی پی ٹی آئی پر تنقید کرتے ہوئے رانا ثنا اللہ نے کہا کہ ملک پر مسلط کیے گئے ایک شخص نے سیاسی اور جمہوری اقدار کو تباہ کیا لہٰذا قوم کو متحد کرنا ہی ہمارے منشور کا اہم حصہ ہے

رانا ثنا اللہ نے کہا کہ پی ٹی آئی کے ایک گروہ کی سوچ ملک کے خلاف ہے، نو مئی والوں کے ساتھ جو ہو رہا ہے وہ ان کا اپنا کیا دھرا ہے۔

سابق وزیر داخلہ نے کہا کہ پاکستان اس وقت سیاسی اور معاشی عدم استحکام کا شکار ہے جسے ختم کرنے کی ضرورت ہے، ایک بدبخت نے پوری قوم کو تقسیم کیا، ہم جی ٹوینٹی ممالک میں شامل ہو رہے تھے لیکن اب ہم سینتالیسویں نمبر پر ہیں، آئی ایم ایف ایک ارب ڈالر کیلیے ناک سے لکیریں نکلوا رہا ہے۔

انہوں نے دعویٰ کیا کہ پارٹی منشور پر عمل درآمد کی پوری کوشش کی جائے گی، فیصل آباد کی قومی و صوبائی اسمبلی کی تمام نشستوں پر (ن) لیگ مضبوط ہے 100 فیصد کامیابی حاصل کریں گے۔

پشاور: چیئرمین پاکستان پیپلز پارٹی بلاول بھٹو زرداری نے قائد مسلم لیگ (ن) نواز شریف اور بانی پاکستان تحریک انصاف پر کڑی تنقید کر دی۔

جلسے سے خطاب میں بانی پی ٹی آئی پر تنقید کرتے ہوئے بلاول بھٹو زرداری نے کہا کہ جو کہتا تھا سب کو جیل میں ڈالوں گا اب خود جیل میں پڑا ہے، کہتا تھا این آر او نہیں دوں گا اب کہتا ہے سب سے بات کرنے کو تیار ہوں۔

بلاول بھتو زرداری نے کہا کہ ان کو سمجھاتے رہے کہ ایسے نہ کرو مرد کو گرفتار کرو لیکن عورتوں کے پیچھے نہ پڑو، ان کو کہتے رہے آپ ہر کسی پر چور چور کا الزام لگاتے ہو ایک دن آپ پر بھی یہ الزام لگ جائے گا۔

انہوں نے کہا کہ ہم بانی پی ٹی آئی کو کہتے رہے کہ اسمبلی سے استعفیٰ نہ دیں اور قائد حزب اختلاف کا عہدہ سنبھالیں، اس نے اپنی ہی صوبائی حکومت کو بھی ختم کر دیا اور کہا کہ سرپرائز کیسا لگا، اب میں پوچھتا ہوں کہ آپ کو سرپرائز کیسا لگ رہا ہے؟

ان کا کہنا تھا کہ وہ کہتا تھا وہ ایک پیج کی سیاست کر رہا ہے اور اب وہی پیج اس کے گلے پڑ گیا ہے۔

نواز شریف پر تنقید کرتے ہوئے چیئرمین پیپلز پارٹی نے کہا کہ جو بے نظیر بھٹو پر ظلم کرتے تھے انہیں اپنی آنکھوں کے سامنے اپنی بیٹی پر ظلم ہوتے دیکھنا پڑا، آپ نے تین دفعہ نواز شریف دیکھا ہے بتائیں یہ کتنا سچا نواز ہیں؟ بتائیں ایٹم بم کا تحفہ پاکستان کو کس نے دیا؟

بلاول بھٹو نے کہا کہ یہ کہتے ہیں سی پیک کا منصوبہ ہم  نے دیا، جب سابق صدر آصف علی زرداری چین کے دورے کرتے تھے تو یہ ان پر تنقید کرتے تھے، یہ لوگ کہتے تھے چین کے دورے پر کیا کرنے جاتے ہیں؟ زرداری چین سی پیک کے منصوبوں کیلیے جاتے تھے۔

سابق وزیر خارجہ نے کہا کہ ہم ملک کو بچانے کیلیے عوام کو مشکل سے نکالنے کیلیے الیکشن لڑ رہے ہیں، (ن) لیگ اور پی ٹی آئی نے نفرت اور تقسیم کی سیاست ملک میں مسلط کی ہے، پورے معاشرے میں نفرت اور تقسیم کی سیاست سے معاشرہ تقسیم ہو چکا ہے۔

ایبٹ آباد: مسلم لیگ (ن) کی چیف آرگنائزر مریم نواز کا کہنا ہے کہ نواز شریف نے پلان بنا لیا ہے کہ بجلی کے بلوں میں 30 فیصد کمی کیسے کرنی ہے۔

جلسے سے خطاب میں مریم نواز نے کہا کہ منشور کوئی کاغذ کا ٹکڑا نہیں بلکہ آپ سے کیا سچا وعدہ ہوتا ہے، کیا نواز شریف نے آج تک قوم سے ایسا وعدہ کیا ہے جو نہ نبھایا ہوا؟ انہوں نے 2013 میں 22، 22 گھنٹے کی لوڈشیڈنگ اور دہشتگردی ختم کی اور ہزارہ موٹروے بنائی۔

مریم نواز نے کہا کہ منشور وہ نہیں ہوتا کہ ویب سائٹ پر جاری کر دیا کاغذ کا ٹکڑا پکڑ کر جھوٹے وعدے کر دیے، اگر منتخب کیا تو اللہ کے فضل سے عوام کی ساری تکلیفیں دور کریں گے۔

پیپلز پارٹی اور پی ٹی آئی پر تنقید کرتے ہوئے مریم نواز نے کہا کہ 15 سال صوبے میں حکومت اور اسکولوں کی کلاس رومز میں بھینسیں بندھی ہوں تو کیسا منشور؟ ایک اور جماعت ہے جس کی کے پی میں 10 سال حکومت رہی ہے، اُس کا منشور پیٹرل بم ہے جو قانون نافذ کرنے والے اداروں کے جوانوں پر چلائے، بچوں کے ہاتھ میں پیٹرول بم اور کیلوں والے ڈنڈے پکڑا کر ریاست پرحملہ کروایا گیا۔

مریم نواز نے کہا کہ لوگوں کے بچے جیلوں میں اور اُن کے بچے آرام سے لندن میں ہیں، اپنے بچوں کو محفوظ مقام پر اور قوم کے بچوں کو جلاؤ گھیراؤ کی ترغیب دینے والا آپ کا ہمدرد ہو سکتا ہے؟ قوم جانتی ہے نواز شریف نے جو بھی وعدہ کیا نبھایا، صرف (ن) لیگی سپورٹر سینہ تان کر کہتا ہے کہ نواز شریف کو ووٹ ڈالتا ہوں کیونکہ کام کیے۔

انہوں نے کہا کہ ملک کے چپے چپے پر نواز شریف کی خدمت کا نشان ہے، کیا باعزت ٹرانسپورٹ ایبٹ آباد کا حق نہیں اور کیا کینسراسپتال حق نہیں؟ کیا اچھے اسکول، کالجز اور جامعات ہزارہ کا حق نہیں؟ خدا کے واسطے ووٹ ڈالتے ہوئے سوچ لینا یہ کے پی کی تقدیر کا فیصلہ کرے گا۔

ان کا کہنا تھا کہ سوچ سمجھ کر ووٹ ڈالنا کیونکہ آپ کی تقدیر کا فیصلہ ہے، شیر کو اتنی مہریں لگانا کہ شیر حکومت میں آکر آپ کیلیے دن رات کام کرے۔