Tag: Elections 2024

ننکانہ صاحب: مسلم لیگ (ن) کے قائد نواز شریف نے بانی پی ٹی آئی کو تنقید کا نشانہ بناتے ہوئے کہا ہے کہ میں امپورٹڈ نہیں بلکہ مقامی وزیر اعظم تھا اور یہ ناکامی وزیر اعظم تھا۔

جلسے سے خطاب کرتے ہوئے سابق وزیر اعظم نواز شریف نے کہا کہ اس ملک کی ترقی کے دشمنوں نے یہ موقع پورا کرنے نہیں دیا، میری ہمت نہیں ٹوٹی الحمدللہ آج بھی ہمت جوان ہے، مجھے بتائیں میرے ساتھ آپ کو کیا دشمنی تھی، آپ کو دشمنی یہ تھی کہ میں نے 18، 18 گھنٹے کی لوڈشیڈنگ ختم کی۔

نواز شریف نے کہا کہ نتیجہ یہ نکلا کہ نواز شریف کے ہاتھوں میں ہتھکڑیاں پہنا دی گئیں، جیل میں ڈال گیا اور ملک بدر کر دیا گیا، کیا ملک کو ایٹمی طاقت بنانے والے کو ہتھکڑیاں لگائی جاتی ہیں؟ عوام کو تکلیف میں کیوں ڈال دیا گیا؟

انہوں نے کہا کہ 5 جج بیٹے سے تنخواہ لینے پر نہ نکالتے تو دعویٰ کرتا ہوں ایک بھی شخص آج بے روزگار نہ ہوتا، وہی دور چلتا رہتا، سازش نہ ہوتی تو ایک بھی شخص بے روزگار نہ ہوتا، آپ کو نہیں میرے دل کو تکلیف پہنچتی ہے، کتنے لوگ ہیں جو بجلی اور گیس کے بلوں سے پریشان ہیں۔

ان کا کہنا تھا کہ پاکستان کا یہ حشر میرے جانے کے بعد ہوا ہے، ہمیں یہ منظور نہیں ہم پورے نظام کو بدلیں گے، آپ نے میرا ساتھ دینا ہے میں آپ سے وعدہ لینے آیا ہوں، مسلم لیگ (ن) وہ کام کرے گی جو تاریخ یاد رکھے گی۔

نواز شریف نے کہا کہ ننکانہ صاحب کو ماڈل سٹی بنائیں گے، میں خود یہاں چکر لگایا کروں گا، بطور وزیر اعظم اس موٹروے پر کئی بار آیا تھا، اپنے ہاتھوں سے موٹروے بنائی اب ننکانہ کی تعمیر کریں گے۔

انہوں نے کہا کہ آپ سب کو پتا ہے میں جو وعدہ کرتا ہوں وہ پورا بھی کرتا ہوں، ہم وہ وزیر اعظم نہیں جو وعدہ کر کے یوٹرن لے لیں، یوٹرن پر یوٹرن دھوکے پر دھوکا اور جھوٹ پر جھوٹ ہمارا شیوہ نہیں، کیا کروایا کچھ نہیں اس شخص نے ملک و قوم کو تباہ کر دیا، ہم اس ملک و قوم کی بھرپور خدمت کریں گے۔

بھلوال: چیئرمین پاکستان پیپلز پارٹی بلاول بھٹو زرداری نے سابق وزیر اعظم نواز شریف کو تنقید کا نشانہ بناتے ہوئے کہا ہے کہ جب شیر کی حکومت بنتی ہے تو عوام کا خون چوسا جاتا ہے۔

جلسے سے خطاب کرتے ہوئے بلاول بھٹو زرداری نے کہا کہ ہم الیکشن اس لیے لڑ رہے ہیں کہ عوام مشکل میں ہیں، کسان کو فصل کی قیمت مزدور کو مزدوری نہیں ملتی اور گزارا مشکل ہے، تمام سیاسی جماعتوں کو احساس ہی نہیں کہ عوام کس مشکل سے گزر رہی ہیں۔

بلاول بھٹو زرداری نے کہا کہ باقی سیاسی جماعتوں کو کرسی کی فکر ہے چاہتے ہیں کسی نہ کسی طریقے سے چوتھی بار ان کو کرسی ملے، چوتھی بار الیکشن لڑنے والا آج تک اپنے منشور کے بارے میں نہیں بتا سکا، وہ نہیں بتا سکا چوتھی بار اس کو کرسی ملی تو اس نے کرنا کیا ہے۔

سابق وزیر خارجہ نے کہا کہ کیا آپ چاہتے ہیں اسی شخص کو چوتھی بار مسلط کیا جائے یا اس کا راستہ روکا جائے؟ میں پرانے سیاستدانوں کی طرح اتنی دیر سے سیاست نہیں کر رہا، سندھ میں ہم نے ہر ڈسٹرکٹ میں علاج کا مفت ادارہ قائم کیا ہے، یہاں کے سیاستدان بیمار ہوتے ہیں تو بیچارے لندن پہنچ جاتے ہیں۔

انہوں نے کہا کہ تین بار وزیر اعظم بنے آپ کیلیے تو کیا اپنے لیے بھی اسپتال نہ بنا سکا، تیر پر ٹھپہ لگائیں، پہلے سرگودھا اور پھر ان کیلیے رائیونڈ میں بھی مفت دل کے علاج کا اسپتال بناؤں گا۔

ان کا کہنا تھا کہ آپ نے مشرف اور بانی پی ٹی آئی کا دور بھی دیکھا ہے، کیا آپ یہ چاہتے ہیں ایک سیاستدان آئے تو دوسروں کی خواتین کو جیلوں میں ڈالے؟ نفرت اور انتقام کی سیاست ذاتی دشمنیوں میں تبدیل ہو چکی ہیں، کیا یہی سیاست پاکستان کی قسمت میں لکھی ہے کہ آپس میں لڑتے رہیں گے؟ یہ پاگل پن کا ثبوت ہے کہ آپ بار بار وہی چیز کرتے رہیں اور امید کریں نتیجہ مختلف ہو۔

بلاول بھٹو زرداری نے کہا کہ آپ وزیر اعظم بنائیں گے تو میں بینظیر بھٹو کی طرح حکومت چلاؤں گا، میرے لیے حرام ہوگا کہ کوئی کارکن سیاسی قیدی رہے، میں یہ کام نہیں کر سکتا کہ مخالف کی بہنوں اور بیٹیوں کو جیلوں میں ڈالوں۔

راولپنڈی: رہنما پاکستان تحریک انصاف شاہ محمود قریشی کا کہنا ہے کہ بلاول سے پوچھتا ہوں کیا آج  نواز شریف کی انتقامی سیاست نظر آ رہی ہے؟

اڈیالہ جیل میں میڈیا سے گفتگو کے دوران شاہ محمود قریشی نے کہا کہ بلاول نے شہباز شریف کی حکومت میں  وزیر خارجہ کا حلف کیوں اٹھایا؟ انہوں نے پی ڈی ایم بنا کر ضیا کے وارثوں کے ساتھ الحاق کیوں کیا؟

سائفر کیس سے متعلق شاہ محمود قریشی نے کہا کہ سائفر پر لکھا تھا کہ صرف سیکریٹری خارجہ کے دیکھنے کیلیے، قومی سلامتی کمیٹی نے سیاسی مداخلت کو مانا۔

متعلقہ: کون ہو تم، تمہاری کیا اوقات ہے؟ شاہ محمود قریشی اور پراسیکیوٹر میں تلخ جملوں کا تبادلہ

انہوں نے کہا کہ سائفر آنے کے بعد بانی پی ٹی آئی نے کہا تھا پارلیمانی رہنماؤں کو بریف کیا جائے، تمام پارلیمانی رہنماؤں کو سائفر پر بریفنگ بھی دی گئی تھی۔

ان کا کہنا تھا کہ جاوید ہاشمی نے حق اور سچ کا جھنڈا بلند کیا ان کے شکر گزار ہیں۔

شاہ محمود قریشی نے مزید کہا کہ ملتان میں جہانگیر ترین ملسم لیگ (ن) کی مدد مانگ رہا ہے لودھراں میں مخالفت کر رہا ہے، آئی پی پی نے چند سیٹوں کیلیے اپنی پارٹی کی قربانی دے دی۔

کراچی: چیئرمین پاکستان پیپلز پارٹی بلاول بھٹو زرداری کی سابق وزیر اعظم نواز شریف کو مناظرے کی دعوت رہنما مسلم لیگ (ن) نہال ہاشمی نے قبول کر لی۔

نہال ہاشمی نے اپنے بیان میں کہا کہ میں نواز شریف کا ادنیٰ کارکن ہوتے ہوئے بلاول بھٹو کی مناظرے کی دعوت قبول کرتا ہوں، بلاول بھٹو خارجی، معاشی اور معاشرتی سمیت مرضی کا عنوان  منتخب کریں۔

(ن) لیگی رہنما نے کہا کہ بلاول بھٹو وقت اور مقام کا انتخاب کریں اور حقیقت کا فیصلہ عوام کریں گے، بلاول پہلے نواز شریف کے قد کے برابر پہنچ جائیں پھر مکالمے کی خواہش کریں۔

انہوں نے کہا کہ ہر چھوٹا آدمی بڑے آدمی پر تنقید کر کے اپنا قد بڑا کرنا چاہتا ہے، کیا بلاول بھٹو لاہور میں کھڑے ہو کر اسے کراچی جیسا بنانے کی بات کر سکتے ہیں؟

ان کا کہنا تھا کہ کیا بلاول بھٹو فیصل آباد کو لاڑکانہ بنانے کا دعویٰ کر سکتے ہیں؟

چند روز قبل بلاول بھٹو نے مسلم لیگ (ن) کے قائد نواز شریف کو ملکی مسائل پر مناظرے کا چیلنج دیا تھا۔ ان کا کہنا تھا کہ میں وزارت عظمیٰ کا میدوار ہوں، (ن) لیگی امیدوار ٹی وی پر آکر کر مجھ سے بحث کریں۔

سابق وزیر خارجہ نے یہ بھی انکشاف کیا تھا کہ وہ پی ڈی ایم حکومت چھوڑنا چاہتے تھے لیکن ان کے والد سابق صدر آصف علی زرداری نے انہیں روکا اور کہا کہ ہم نے زبان دی ہے۔