Tag: Elections 2024

کراچی : گورنر سندھ کامران ٹیسوری کا کہنا ہے کہ بلے کا نشان بیلٹ پیپر پر ہو یا نہ ہو کوئی فرق نہیں پڑتا، بال شیر کے پاس پڑی ہے اب جس میں ہمت ہے لے لے۔

تفصیلات کے مطابق گورنر سندھ کامران ٹیسوری نے اے آر وائی نیوزسے خصوصی گفتگو میں عام انتخابات سے متعلق کہا کہ بلے کا نشان بیلٹ پیپر پر ہو یا نہ ہو کوئی فرق نہیں پڑتا، اس بار بلے کے پاس بال نہیں اور بنا بال بلا کیا کرے گا، بال شیر کے پاس پڑی نظر آرہی ہے اب جس میں ہمت ہےلے لے۔

لیول پلیئنگ فیلڈ کے حوالے سے کامران ٹیسوری کا کہنا تھا کہ لیول پلیئنگ فیلڈ کے حوالے سے خاص جماعت کونافیور ہے ناہونی چاہیے، قوم آزاد ہے سب کو حق رائے دہی دینے کی آزادی اور حق ہے۔

گورنرسندھ نے پی ٹی آئی سے متعلق کہا کہ بلے والے اگر غلطیاں اور کوتاہیاں نہ کرتے تو وہ موجود ہوتے، اب انکے امیدوار آزاد حیثیت سے کھڑے ہیں، اب فیصلہ عوام نے کرنا ہے۔

ان کا کہنا تھا کہ الیکشن آئین و قانون کے تحت ہونے چاہئیں ، سب سے پہلے ملکی سلامتی ، لوگوں کا اعتماد اور سب کا متفق ہونا ضروری ہے۔

پاک ایران کشیدگی پر گورنر سندھ نے کہا ایران کی جانب سےپاکستانی حدود کی خلاف ورزی کی خبر سفارتخانے سے ملی، خبر ملنے پر ایران کا دورہ مختصر کرکے کراچی پہنچا۔

کامران ٹیسوری کا کہنا تھا کہ ملک کی سلامتی سب سے زیادہ مقدم ہے، ملکی سلامتی اور خودمختاری پر کوئی سمجھوتہ نہیں کیا جاسکتا ،پاکستانی افواج اور قوم کی ترجیح ملکی سلامتی ،قومی اداروں کے فیصلے ہیں۔

انھوں کہا کہ افواج پاکستان اور اس کے سپہ سالار کو خراج تحسین پیش کرتا ہوں ، سپہ سالار جنرل عاصم منیر نے قوم کا سر فخر سے بلند کیا۔

ڈی آئی خان : ڈیرہ اسماعیل خان سے جے یو آئی ف کے امیدوار نے کتاب کے بجائے ‘ماچس کی ڈیبا’ کا نشان ملنے پر الیکشن کمیشن سے رجوع کرلیا۔

تفصیلات کے مطابق پاکستان میں 8 فرروی کو الیکشن کا انعقاد ہونے جارہا ہے ، عام انتخابات میں غلط انتخابی نشانات کی الاٹمنٹ سے سیاسی پارٹیاں اور آزاد امیدوار پریشان ہیں۔

جے یو آئی ف کے امیدوار کو کتاب کے بجائے”ماچس کی ڈیبا” کا نشان الاٹ کردیا گیا ، جس پر پیپلزپارٹی ، پی ٹی آئی کے بعد جے یوآئی امیدوار نے بھی الیکشن کمیشن سے رجوع کر لیا ہے۔

جے یوآئی رہنما کامران مرتضیٰ کی جانب سے الیکش کمیشن میں درخواست جمع کرادی گئی، جس میں کہا ہے کہ ڈیرہ اسماعیل خان سے جےیوآئی کےٹکٹ ہولڈر کوغلط انتخابی نشان الاٹ کیا گیا۔

دوسری جانب آزاد امیدوارشوکت بسرا نے بھی انتخابی نشان کی تبدیلی کیلئے الیکشن کمیشن میں درخواست دے دی۔

کراچی : سندھ ہائی کورٹ نے سرکاری املاک پر سیاسی جھنڈے ، بینرز اور پوسٹرز لگانے والوں کے خلاف فوری مقدمہ درج کرنے کا حکم دے دیا۔

تفصیلات کے مطابق سندھ ہائی کورٹ نے عوامی مقامات پر بل بورڈز ، ہورڈنگز اور سائن بورڈز لگانے کے کیس کا تحریری حکم نامہ جاری کردیا۔

حکم نامے میں سرکاری املاک پر سیاسی جھنڈے ، بینرز اور پوسٹرز لگانے والوں کے خلاف فوری مقدمہ درج کرنے کا حکم دیا گیا ہے۔

عدالت نے کہا کہ پوسٹرز ، بینرز آویزاں کرنے والے سیاسی رہنماؤں اور متعلقہ جماعت کے صوبائی صدر کے خلاف بھی مقدمہ درج کیا جائے اور میئر کراچی، کمشنر، تمام ٹاؤن اور کنٹونمنٹ بورڈز کو عوامی مقامات/سرکاری املاک سے تمام بورڈز ہٹانے کا حکم دیا۔

عدالت کا کہنا تھا کہ جس پروڈکٹ کا اشتہار ہو اس کمپنی کے سی ای او کے خلاف بھی مقدمہ درج کیا جائے۔

تحریری حکم نامے میں کے ایم سی اور تمام کنٹونمنٹ بورڈز کو اشتہارات کے تمام ٹھیکوں کی تفصیلات بھی پیش کرنے کا بھی حکم دیا۔

عدالت نے کہا کہ شہر بھر میں بھرپور ایکشن لیا جائے، تمام ادارے 29 جنوری تک عمل درآمد رپورٹ پیش کریں۔

حکم نامے میں عدالت کے فیصلے کی نقل الیکشن کمیشن کو بھی فراہم کرنے کی ہدایت کی گئی ہے۔

لاہور : سیاسی جماعتوں سے انتخابی نشان واپس لینے کا قانون چیلنج کردیا گیا ، جس میں استدعا کی گئی کہ پی ٹی آئی کا انتخابی نشان واپس لینے کوغیر قانونی قراردے۔

تفصیلات کے مطابق سیاسی جماعتوں سے انتخابی نشان واپس لینے کے قانون کیخلاف درخواست دائر کردی گئی۔

لاہورہائیکورٹ میں درخواست اظہر صدیق ایڈووکیٹ کی جانب سے دائرکی گئی ، جس میں مؤقف اختیار کیا گیا کہ الیکشن ایکٹ کی شق 215 آئین اور بنیادی حقوق کےخلاف ہے ، الیکشن کمیشن کے کسی جماعت سےانتخابی نشان واپس لینےکااختیار آئین کےمنافی ہے۔

درخواست میں کہا گیا کہ سپریم کورٹ قرار دے چکی پارٹی الیکشن کاعام انتخابات پر کوئی اثر نہیں ہو سکتا۔

درخواست میں استدعا کی گئی کہ عدالت الیکشن ایکٹ کی شق 215 کو کالعدم قرار دےاور پی ٹی آئی کا انتخابی نشان واپس لینے کوغیر قانونی قراردے۔